រតនគិរី ៖ គំនរឈើរាប់រយកំណាត់ត្រូវបានកំលាំងរដ្ឋបាលព្រៃឈើផ្នែកបរកែវ សហការជាមួយអាជ្ញាធរស្រុកអូរយ៉ាដាវ កម្លាំងកងរាជអាវុធហត្ថស្រុក កម្លាំងអធិការនគរបាលស្រុកអូរយ៉ាដាវ កម្លាំងសឹករងស្រុក និងប៉ុស្តិ៍នគរបាលរដ្ឋបាលឃុំយ៉ាទុង បានចុះប្រតិបត្តិការរុករកឃើញ នៅថ្ងៃទី២៣ខែមករាឆ្នាំ២០១៦ត្រង់ចំណុចភូមិតេនឃុំយ៉ាទុង ស្រុកអូរយ៉ាដាវ ។
យោងតាមប្រភពបានឱ្យដឹងថា គំនរឈើដែលរុករកឃើញនោះគឺជនមិនស្គាល់មុខយកមកលាក់ទុកក្នុងព្រៃត្រង់ចំណុច ០៧៦៣៨៥៣,១៥១០១១៩ ស្ថិតនៅក្នុងភូមិសាស្ត្រភូមិតេនឃុំយ៉ាទុង ស្រុកអូរយ៉ាដាវ ។ ឈើទាំងនោះជាឈើអារច្រៀកឡាំងបួនជ្រុងជាប្រភេទលេខ១(សុក្រម)សរុបមាន ចំនួន ១៥០ ដុំ ស្មើនឹង ៤១,០៦៨ ម៉ែត្រគូប ។
ប្រភពបានបន្តទៀតថា ឈើដែលរកឃើញនោះត្រូវកំលាំងរដ្ឋបាលព្រៃឈើធ្វើការដឹកជញ្ជូនយកមករក្សាទុកនៅក្នុងបរិវេណស្នាក់ការផ្នែករដ្ឋបាលព្រៃឈើ បរកែវ ។ ចំណែកម្ចាស់ឈើសមត្ថកិច្ចមិនអាចរកអត្តសញ្ញាណឃើញនោះទេ ៕
ដោយ ៖ សន ចាន់ឌី
