រតនគិរី ៖ បន្ទាប់ពីប្រមុខរាជរដ្ឋាភិបាលកម្ពុជាសម្តេចតេជោ សែន ចេញបទបញ្ជាបង្កើតគណៈកម្មាធិការថ្នាក់ជាតិបង្ក្របបទល្មើសព្រៃឈើដោយមាននាយឧត្តមសេនីយ៍សៅ សុខា អគ្គមេបញ្ជាការរងកងយោធពលខេមរភូមិន្ទនិងជាមេបញ្ជាការកងរាជអាវុធហត្ថលើផ្ទៃប្រទេសជាប្រធាន និងលោកឧត្តមសេនីយ៍ឯកហ៊ូ សាគុណ អគ្គស្នងការរង និងជាប្រធាននាយកដ្ឋានកណ្តាលព្រំដែនជាអនុប្រធាន ព្រមទាំងមានសមាជិក៦រូបទៀតផងដែរ។ គេសង្កេតឃើញមន្ត្រីជំនាញ និងស្ថាប័នពាក់ព័ន្ធបានក្រោកពីដំណេកហើយ។ ជាក់ស្តែងនាព្រឹកថ្ងៃទី២៤ ខែមករា ឆ្នាំ២០១៦ នេះកម្លាំងចម្រុះដែលមានសមាជិក១៤រូបដឹកនាំដោយលោកឧត្តមសេនីយ៍ត្រីគឹម រស្មី មេបញ្ជាការអាវុធហត្ថខេត្តរតនគិរីបានចុះត្រួតពិនិត្យច្បាប់ និងឈើ នៅរោងចក្រកែច្នៃឈើក្រុមហ៊ុនដូនពេញអាហ្គ្រីកូមានទីតាំងក្នុងចំការដូងប្រេងក្រុមហ៊ុនហ័ងអាញ់ លំផាត់ ស្ថិតក្នុងភូមិស្រែឈូក ឃុំជ័យឧត្តម ស្រុកលំផាត់ ខេត្តរតនគិរី។
តាមរបាយការណ៍សមត្ថកិច្ចចម្រុះដែលចុះត្រួតពិនិត្យរោងចក្រខាងលើបានឲ្យដឹងថា មានឈើប្រណិត៥៤៤,០៥៦ម៉ែត្រត្រីគុណ ឈើលេខ១មាន១៧៧៩,៦៩៨ម៉ែត្រត្រីគុណ ឈើលេខ២មាន ២៩៤៣,៩៣២ ម៉ែត្រត្រីគុណ និងឈើលេខ៣មាន ១២៧,៩០១ម៉ែត្រត្រីគុណ សរុបទាំងអស់៥៣៩៥,៥៨៧ម៉ែត្រត្រីគុណ (ច្បាប់អនុញ្ញាតិ)។
គួរបញ្ជាក់ថាក្រុមឈ្មួញដែលឆក់ឱកាសកាប់បំផ្លាញព្រៃឈើក្នុងដែនជម្រកសត្វព្រៃលំផាត់ ហើយយកមកជ្រកក្រោមស្លាកក្រុមហ៊ុននានា គឺពួកគេតែងប្រើរូបភាពដូចៗគ្នាថាជាឈើក្នុងដែនវិនិយោគរបស់ក្រុមហ៊ុន ជាក់ស្តែងឈើដែលកាប់ថ្មីៗទាំងអស់នោះសុទ្ធសឹងយកចេញពីដែនជម្រក និងយកចេញពីព្រៃសហគមន៍នានា ឫក៏យកចេញពីឧទ្យានជាតិវរៈជ័យ នៅក្នុងខេត្តរតនគិរី ចំណែកឈើចាស់ដែលក្រុមហ៊ុនប្រមូល និងបង់ពន្ធរួចគេមិនបានយកធ្វើការកែច្នៃនោះទេគឺទុកអោយពុកចោលតែម្តង៕
សន ចាន់ឌី
