កាលពី ព្រឹកថ្ងៃពុធកន្លងទៅនេះ សម្តេចនាយករដ្ឋមន្ត្រី ហ៊ុន សែន នឹងដឹកនាំប្រតិភូជាន់ខ្ពស់ទៅចូលរួមកិច្ចប្រជុំកំពូលរំឮកខួប អនុស្សាវរីយ៍២៥ឆ្នាំ នៃទំនាក់ទំនងដៃគូអាស៊ាន សាធារណរដ្ឋកូរ៉េ នៅទីក្រុងប៊ូសាន ហើយនៅថ្ងៃទី១៣ និងទី១៤ នឹងបំពេញទស្សនកិច្ចផ្លូវការនៅទីក្រុងសេអ៊ូលដើម្បីចូលរួម កិច្ចប្រជុំកំពូលរំឮកខួបអនុស្សាវរីយ៍២៥ឆ្នាំនៃទំនាក់ទំនងដៃគូ អាស៊ាន-សាធារណរដ្ឋកូរ៉េ និងបំពេញទស្សនកិច្ចផ្លូវការនៅសាធារណរដ្ឋកូរ៉េ ។
រដ្ឋមន្ត្រីប្រតិភូអមនាយករដ្ឋមន្ត្រី លោក ស្រ៊ី ថាមរ៉ុង្គ បានថ្លែងប្រាប់ក្រុមអ្នកព័ត៌មានមុនឡើងយន្តហោះថា លោកនាយករដ្ឋមន្ត្រី និងគណៈប្រតិភូនឹងត្រឡប់មកដល់ប្រទេសកម្ពុជាវិញព្រឹកថ្ងៃទី១៥ ខែធ្នូ ឆ្នាំ២០១៤ ។សម្តេចនាយករដ្ឋមន្ត្រី ហ៊ុន សែនក្នុងពេលទស្សនកិច្ចនេះ និងប្រធានាធិបតីនៃសាធារណរដ្ឋកូរ៉េ លោកស្រី ប៉ាក គឿនហេ (Park Geun-hye) គ្រោងនឹងជួបពិភាក្សាទ្វេភាគី និងធ្វើជាអធិបតីក្នុងពិធីចុះហត្ថលេខាលើកិច្ចព្រមព្រៀងចំនួន៥ ស្ដីពីកិច្ចសហប្រតិបត្តិការលើវិស័យអប់រំ សុខាភិបាល ពាណិជ្ជកម្ម កម្មសិទ្ធិបញ្ញា និងធនាគារ ។
អគ្គរាជទូតខ្មែរប្រចាំសាធារណរដ្ឋកូរ៉េខាងត្បូង លោក ស៊ុត ឌីណា បានសរសេរសារលើបណ្ដាញទំនាក់ទំនងសង្គមរបស់លោក ព្រមានដល់ពលករខ្មែរនៅទីនោះ មិនឲ្យធ្វើបាតុកម្មណាមួយប្រឆាំងនឹងសម្តេចហ៊ុន សែន ដោយសរសេរថា “សមាសភាពប្រឆាំង និងដែលអាចបង្កភាពវឹកវរ នឹងត្រូវបានចាត់វិធានការយ៉ាងក្តៅបំផុតពីសំណាក់អាជ្ញាធរកូរ៉េ” ។ថ្មីៗនេះ ពលករខ្មែរនៅកូរ៉េខាងត្បូងបានព្រមានធ្វើបាតុកម្មប្រឆាំងដំណើរ ទស្សនកិច្ចសម្តេចនាយករដ្ឋមន្ត្រី ហ៊ុន សែន បើរដ្ឋាភិបាលក្រុងភ្នំពេញមិនដោះលែងសកម្មជនគណបក្សសង្គ្រោះជាតិ លោក មាជ សុវណ្ណារ៉ា ដែលគេចាត់ទុកថាជាវីរជនរបស់ពួកគេ៕
