ភ្នំពេញ ៖ នៅថ្ងៃទី១០ ខែមីនា ឆ្នាំ២០២០នេះ នៅអគារសាលប្រជុំសាលាខណ្ឌសែនសុខ មានរៀបចំពិធីអបអរសាទរទិវាអន្តរជាតិ ៨មីនា ឆ្នាំ២០២០ ខួបអនុស្សាវរីយ៍លើកទី១០៩ ក្រោមប្រធានបទ “មានសន្តិភាព មានការលើកកម្ពស់សមភាពយេនឌ័រ” ក្រោមអធិបតីភាពលោកស្រី ឈាន សុខេន ប្រធានក្រុមប្រឹក្សាខណ្ឌសែនសុខ លោក ម៉ូវ ម៉ានិត អភិបាលខណ្ឌសែនសុខ។ អញ្ជើញចូលរួមក្នុងពិធីនេះ មានលោក លោកស្រី អភិបាលរងខណ្ឌ សមាជិកក្រុមប្រឹក្សាជានារី នារីខណ្ឌ នារីជាកងកំលាំង នារីសង្កាត់-ភូមិ សរុបអ្នកចូលរួម១៦៤នាក់។
បន្ទាប់ពីការអានសារលិខិតសម្តេចម៉ែ ដោយលោកស្រីអភិបាលរងខណ្ឌ មានប្រសាសន៍នៅក្នុងពិធីនេះលោកអភិបាលខណ្ឌ បានលើកឡើងថា៖ ការប្រារព្ធទិវាអន្តរជាតិនារី ៨មីនា ជារៀងរាល់ឆ្នាំ គឺមានគោលបំណងរំលឹកដល់សេចក្តីក្លាហាន និងការខិតខំតស៊ូរបស់ស្ត្រីទូទាំងសកលលោក ដើម្បីសិទ្ធិសេរីភាព និងតួនាទីស្មើភាពគ្នារវាងបុរស និងស្ត្រីនៅក្នុងសង្គម។ សំខាន់ជាងនេះទៅទៀត ទិវានេះឆ្លុះបញ្ចាំង និងអបអរសាទរចំពោះសមិទ្ធផលទាំងឡាយដែលសម្រេចបានដោយការចូលរួមរបស់ស្ត្រីនៅគ្រប់ទិដ្ឋភាពទាំងអស់នៃសង្គម រួមមាន សេដ្ឋកិច្ច សង្គមកិច្ច វប្បធម៌ និងនយោបាយ ព្រមទាំងដើម្បីរៀបចំផែនការសម្រាប់អនុវត្ត នៅឆ្នាំបន្តបន្ទាប់ទៀត ឆ្ពោះទៅលើកកម្ពស់សមភាពយេនឌ័រ និងផ្តល់ភាពអង់អាចដល់ស្ត្រី។
លោកអភិបាលខណ្ឌបានបន្តថា ខួបលើកទី១០៩ នៃទិវាអន្តរជាតិនារី ៨មីនា ឆ្នាំ២០២០នេះ រាជរដ្ឋាភិបាលបានជ្រើសរើសយកប្រធានបទ “មានសន្តិភាព មានការលើកកម្ពស់សមភាពយេនឌ័រ” ក្នុងគោលបំណងរំលេចឲ្យឃើញកាន់តែច្បាស់ថែមទៀតពីការយកចិត្តទុកដាក់ ផ្តល់ឱកាសដល់ស្ត្រីឲ្យក្លាយជាថ្នាក់ដឹកនាំមានគ្រប់លំដាប់ថ្នាក់ តាំងពីថ្នាក់ជាតិ ដល់ថ្នាក់ក្រោមជាតិ ជាពិសេសនៅខណ្ឌសែនសុខផ្ទាល់មានប្រធានក្រុមប្រឹក្សាជាស្ត្រី ដែលបង្ហាញឲ្យឃើញច្បាស់ពីសម្ថភាពរបស់ស្ត្រី ថាមានសមភាពជាមួយបុរស។
ក្នុងឱកាសទិវាអន្តរជាតិ ៨មីនា ឆ្នាំ២០២០នាររសៀលនេះក៏មានកម្មវិធីជូនវត្ថុអនុស្សាវរីយ៍បាច់ផ្កា និងថវិកាដល់សមាជិកាដែលបានចូលរួមផងដែរ៕
