នៅព្រឹកថ្ងៃទី១១ មីនា អ្នកសារព័ត៌មានក្នុងស្រុកប្រចាំនៅក្រុងប៉ោយប៉ែត ២នាក់ ត្រូវតំណាងអយ្យការអមសាលាដំបូងខេត្តបន្ទាយមានជ័យ កោះហៅ ឲ្យចូលបំភ្លឺ ក្នុងរឿងបរិហារកេរ្តិ៍សាធារណៈ ក្រោយពីបានផ្សាយរឿងឧកញ៉ារំលោភដីពលរដ្ឋ ។ អ្នកព័ត៌មានទាំងពីរ គឺ អ្នកព័ត៌មានខ្មែរម្ចាស់ស្រុក គឺលោក លី ម៉េង ហ៊ុយ និងអ្នកព័ត៌មាន “ថ្ងៃថ្មី” លោក ទាវ សំអុល ។
មន្ត្រីសង្គមស៊ីវិល ចាត់ទុកដីកាកោះនេះ ថា គំរាមកំហែងដល់អ្នកសារព័ត៌មានធ្វើឱ្យពួកគេមិនអាចបំពេញការងារតាមវិជ្ជាជីវៈបាន ។ ថ្លែងនៅថ្ងៃទី៧ មីនា ថា លោកមានការភ្ញាក់ផ្អើលយ៉ាងខ្លាំង បន្ទាប់ពីទទួលបានដីការបស់តុលាការនេះ ពីព្រោះលោកថា លោកមិនបានធ្វើអ្វីខុសច្បាប់ឡើយ ។
មានប្រសាសន៍ប្រាប់អាស៊ីសេរី កាលពីថ្ងៃទី ០៧ មីនា លោក លី ម៉េងហ៊ុយ លោកបានថ្លែងថា លោកមានការភ្ញាក់ផ្អើលយ៉ាងខ្លាំង បន្ទាប់ពីទទួលបានដីការបស់តុលាការនេះ ពីព្រោះលោកថា លោកមិនបានធ្វើអ្វីខុសច្បាប់ឡើយ ។ លោកមានប្រសាសន៍ថា ៖ «កន្លងមកមកក៏ដូចបច្ចុប្បន្ននេះខ្ញុំមើលឃើញថា របបព័ត៌មានអត់មានអីលើកយកពីច្បាប់របបព័ត៌មានមកអនុវត្តទេ អីចឹងអ្នកសារព័ត៌មានប្រឈមនឹងមានបញ្ហាខ្លាំងណាស់។ វាប៉ះពាល់ធ្ងន់ធ្ងរ ទី១ ខ្ញុំធ្វើព័ត៌មានអត់កើត ព្រោះរវល់តែប្ដឹងខ្ញុំដោយខុសរឿង ដោយគ្មានការបំភ្លឺគ្មានការបកស្រាយអីទាំងអស់អីចឹង គឺខ្ញុំមានការខកចិត្តយ៉ាងខ្លាំង»។
ចំណែកអ្នកសារព័ត៌មាន ថ្ងៃថ្មី ដែលតុលាការកោះហៅដែរនោះ គឺលោក ទាវ សំអុល មានប្រសាសន៍ថា ដីកាកោះនេះទំនងដោយសារតែលោកបានចុះផ្សព្វផ្សាយព័ត៌មានរឿងឧកញ៉ា ឡាច ប៊ុនលឹម ធ្វើរបងរំលោភយកដីរបស់ប្រជាពលរដ្ឋក្រីក្រមួយគ្រួសារ នៅក្រុងប៉ោយប៉ែត កាលពីថ្ងៃទី២១ ធ្នូ កន្លងទៅ។ លោកបន្ថែមថាពេលនោះ លោកចុះផ្សាយតាមសំដីរបស់ប្រជាពលរដ្ឋដោយពុំមានការបញ្ចេញបញ្ចូលបន្ថែមដោយខ្លួនឡើយ ។
លោកមានប្រសាសន៍ថា ៖ «ប្រជាពលរដ្ឋគាត់ហៅខ្ញុំឱ្យជួយផ្សព្វផ្សាយថា លោក ឧកញ៉ាហ្នឹងរំលោភយកដីគាត់២ម៉ែត្រ ប៉ុន្តែខ្ញុំមិនបានទៅចោទដល់លោកឧកញ៉ាហ្នឹងទេ។ ប៉ុន្តែគេបានកោះហៅខ្ញុំតាំងពីឱ្យចូលបំភ្លឺនៅអធិការក្រុងប៉ោយប៉ែត ហើយម្សិលមិញទទួលបានដីកាពីតុលាការទៀត»។
មានប្រសាសន៍ប្រាប់អាស៊ីសេរី មន្ត្រីសម្របសម្រួលសមាគមការពារសិទ្ធិមនុស្ស អាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា យល់ថា វិធានការរបស់តុលាការនេះ ជាការអនុវត្តខុសច្បាប់ ពីព្រោះតាមច្បាប់ប្រសិនបើអ្នកព័ត៌មានចុះផ្សាយខុស គឺអាចផ្សាយកែតម្រូវវិញបាន ដោយពុំមានទោសពៃរ៍ឡើយ។ លោកហៅវិធានការរបស់តុលាការនេះថា ជាការគំរាមកំហែងដល់អ្នកសារព័ត៌មានធ្វើឱ្យភ័យខ្លាច ហើយមិនហ៊ានចុះផ្សាយព័ត៌មានពិត៖ «បើសិនជាលឿនចោទចេញហើយយកមកអនុវត្តភ្លាមធ្វើឱ្យសារព័ត៌មានលែងហ៊ាននិយាយអ្វីដែលត្រង់ៗកើតឡើងនៅក្នុងសង្គម វាបាត់វិជ្ជាជីវៈអ្នកសារព័ត៌មានហើយ និងធ្វើឱ្យសារព័ត៌មានលែងក្លាយជាកញ្ចក់ឆ្លុះបញ្ចាំងឆ្លុះបញ្ចាំងពីសង្គម ហើយក្លាយទៅជាអ្នកដើរសរសើរលើកជើងពីក្រោយ សូម្បីតែខោឪពុកខ្លួនឯងដាច់ឃើញគូថក៏ដោយក៏និយាយថា ខោថ្មីដែរ ប៉ុន្តែគេមើលទៅឃើញខោរហែកគ្រប់គ្នា ប៉ុន្តែគេមិននិយាយ បើនិយាយទៅឪពុកហ្នឹងវារករឿង»។
ក្រមព្រហ្មទណ្ឌមាត្រ៣០៦ ចែងថា ការបរិហារកេរ្តិ៍ដែលប្រព្រឹត្តតាមសារព័ត៌មាន ត្រូវស្ថិតនៅក្រោមបទបញ្ញត្តិនៃច្បាប់ស្ដីពីរបបសារព័ត៌មាន។
ច្បាប់ស្ដីពីរបបសារព័ត៌មាន មាត្រា១០ ចែងថា ជនណាម្នាក់ដែលយល់ថា អត្ថបទណាមួយ ចុះផ្សាយខុសពីការពិត ដែលធ្វើឱ្យខូចដល់កិត្តិយសរបស់ខ្លួន គឺជននោះមានសិទ្ធទាមទារឱ្យសារព័ត៌មាននោះធ្វើការកែតម្រូវ ឬមានសិទ្ធិឆ្លើយតប និងប្ដីពីបទបរិហារកេរ្តិ៍ ចំពោះការប៉ះពាល់នោះបាន ហើយចម្លើយកែតម្រូវឬចុះផ្សាយ មានរយៈពេលយ៉ាងយូរ ៧ថ្ងៃ បន្ទាប់ពីទទួលបានឱ្យការទាមទារឱ្យកែតម្រូវ៕
