(ខេត្តកែប)៖ រសៀលថ្ងៃទី០៥ ខែមីនា ឆ្នាំ ២០២០ រដ្ឋបាលខេត្តកែប បានរៀបចំពិធីបិទ សន្និបាតបូកសរុបលទ្ធផលការងារប្រចាំ២០១៩ និងលើកទិសដៅសំរាប់អនុវត្តឆ្នាំ២០២០ ក្រោមធិបតីភាព លោក ជិន ប៊ុនស៊ាន ទេសរដ្ឋមន្ត្រី ទទួលបន្ទុកបេសកម្មពិសេស និងជាប្រធានក្រុមការងារថ្នាក់ជាតិចុះមូលដ្ឋានខេត្តកែប និង លោក កែន សត្ថា អភិបាលខេត្តកែប និងមានការអញ្ជើញចូលរួមពី លោក លោកស្រី រដ្ឋលេខាធិការ អនុរដ្ឋលេខាធិការដែលជាគណៈប្រតិភូអមដំណើរ លោក លោកស្រីប្រធានសមាជិកក្រុមប្រឹក្សាខេត្ត លោក លោកស្រីអភិបាលរងខេត្ត ក្រុមប្រឹក្សាក្រុង-ស្រុក អភិបាល ក្រុង-ស្រុក ប្រធានអនុប្រធានមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំងបី មេឃុំ ចៅសង្កាត់ទូទាំងខេត្ត។
មានប្រសាសន៍ស្វាគមន៍ក្នុងពិធីបិទសន្និបាតនោះ លោក កែន សត្ថា អភិបាលនៃគណៈអភិបាលខេត្ត ក៏បានគូសបញ្ជាក់ជូនថា ពិធីបិទសន្និបាតបូកសរុបលទ្ធផលការងារឆ្នាំ២០១៩ និង លើកទិសដៅ អនុវត្តបន្តឆ្នាំ២០២០ របស់រដ្ឋបាលសាលាខេត្តកែប នាពេលនេះ គឺជាការឆ្លុះបញ្ចាំងឱ្យឃើញនូវស្នាដៃ លទ្ធផលការងារគ្រប់បណ្តាអង្គភាព មន្ទីរ ស្ថាប័នជុំវិញខេត្ត សម្រេចបានក្នុងរយៈពេលកន្លងមកនេះ ជាពិសេសក្នុងការអនុវត្តកម្មវិធីនយោបាយកំណែទម្រង់យុទ្ធសាស្ត្រ ចតុកោណ របស់រាជរដ្ឋាភិបាលកម្ពុជា។
លោកបានបន្ថែមទៀតថា អង្គសន្និបាតនេះក៏មានគោលបំណងផ្សព្វផ្សាយស្តីពីសមិទ្ធផល និងលទ្ធផលការងារដែលសម្រេចបាននាឆ្នាំកន្លងមក ថែមទាំងបានឆ្លុះបញ្ចាំងពីចំណុចខ្លាំង-ខ្សោយ បញ្ហាប្រឈមនានា ដើម្បីពិភាក្សាដាក់ចេញនូវទិសដៅអទិភាព សម្រាប់អនុវត្តបន្តនាឆ្នាំខាងមុខទៀត សំដៅឆ្លើយតបទៅនឹងតម្រូវការចាំបាច់របស់ប្រជាពលរដ្ឋនៅតាមមូលដ្ឋានឱ្យកាន់តែមានប្រសិទ្ធភាព។
នាឱកាសនោះដែរ លោក ជិន ប៊ុនស៊ាន បានមានប្រសាសន៍កោតសរសេីរ និង វាយតម្លៃខ្ពស់ចំពោះថ្នាក់ដឹកនាំខេត្តកែប និង មន្ត្រីរាជការដែលខំអនុវត្តន៍តួនាទីភារកិច្ចរបស់ខ្លួនបានត្រឹមត្រូវ និងប្រេីប្រាស់សិទ្ធិអំណាច តួនាទីរបស់ស្ថាប័ន អង្គភាពរដ្ឋបាលគ្រប់លំដាប់ថ្នាក់ ក្នុងការរៀបចំនូវផែនការយុទ្ធសាស្ត្រថ្មីៗ សម្រេចបានជោគជ័យជាស្ថាពរ។
ទន្ទឹមនេះលោកក៏បានផ្តាំផ្ញើដល់អង្គសន្និបាតអំពីការអនុវត្តឱ្យបានជោគជ័យឆ្នាំខាងមុខៗទៀត គឺត្រូវយកចិត្តទុកដាក់ខ្ពស់ ដោយផ្តោតទៅលើការងារសន្តិសុខ សណ្តាប់ធ្នាប់សាធារណៈ សំខាន់ការអនុវត្តគោលនយោបាយ ភូមិ-ឃុំ មានសុវត្ថិភាព និងការអនុវត្តច្បាប់ ស្តីពីការគ្រប់គ្រងរដ្ឋបាលរាជធានី ខេត្ត-ក្រុង ស្រុក ខណ្ឌជាដើម៕ សេង ណារិទ្ធ
