មណ្ឌលគិរី ៖ គ្រាន់តែសម្តេចតេជោហ៊ុន សែន ប្រកាសអោយមានយុទ្ឋនាការបង្ក្រាបឈើទូទាំងប្រទេសធ្វើអោយ ផ្អើលអស់មនុស្សទូទាំងខេត្តមណ្ឌលគិរី ជាពិសេសអស់លោកឧកញាដែលជាប់ខ្លួនក្នុងការរកស៊ីបទល្មើសព្រៃឈើនាពេលកន្លងមកនោះ ឮថា ខ្លះបានរត់ចោលស្រុកអស់មួយចំនួន ហើយខ្លះទៀតកំពុងភ័យបាយមិននឹកទឹកក៏មិនស្រេក ។ ក្នុងរយៈពេល៣ទៅ៤ថ្ងៃនេះ ក្រុមហ៊ុនធំៗមួយចំនួនដែលធ្លាប់កាក់កបក្នុងជំនួញឈើ ត្រូវបានគណៈកម្មការចម្រុះថ្នាក់ជាតិបង្ក្រាបបទល្មើសព្រៃឈើ ដែលដឹកនាំដោយនាយឧត្តសេនីយ៏ សៅ សុខា ចុះពិនិត្យនឹងបង្ក្រាបលើទីតាំងនានាដូចជា ខេត្តក្រចេះ ខេត្តស្ទឹងត្រែង…ជាដើម ហើយបានរកឃើញឈើ ខុសប្រក្រតីរាប់ពាន់ម៉ែត្រគូប។
ដោយសារតែមានការចាប់បង្ក្រាបខាងលើនេះ បានធ្វើឲ្យក្រុមហ៊ុនមួយចំនួននៅខេត្តមណ្ឌលគីរី កំពុងរមាស់ខ្នង នឹងបានដុតបំផ្លាញឈើទាំងអស់ដែលក្រុមឈ្មួញ បានដឹកមកទុកគរក្នុងដីក្រុមហ៊ុនរាប់រយម៉ែត្រគូប មុនពេលមានសកម្មភាពចាប់បង្ក្រាបដ៏ធំ ហើយខ្លះទៀតត្រូវបានប្រភពរាយការណ៏ថា គេដឹកយកទៅកប់ក្នុងដី។ក្រុមហ៊ុនដែលបានដុត នឹងកប់ឈើហ៊ុបខាងលើ គឺមានឈ្មោះ ប៊ិញភ្វឿក នឹងប៊ិញភ្វឿក១ ដែលស្ថិតនៅក្នុងស្រុកកែវសីមា ខេត្តមណ្ឌលគិរី នឹងស្រុកស្នូល ខេត្តក្រចេះ (ក្រុមហ៊ុនទាំងពីរនេះជាប់គ្នា នៅចំនុចព្រំប្រទល់ខេត្តមណ្ឌលគិរី និងខេត្តក្រចេះ)។
ឈើដែលត្រូវគេដុតបំផ្លាញនោះជាប្រភេទសុក្រំ និងផ្ចឹកជាដើម បានត្រូវគេប្រទះឃើញនៅក្នុងក្រុមហ៊ុនប៊ិញភឿក១ ដែលជាក្រុមហ៊ុនទទួលបានសម្បទានសេដ្ឋកិច្ច ពីរាជរដ្ឋាភិបាលវិនិយោគដាំកៅស៊ូនៅក្នុងស្រុក កែវ សីមា ។
សេចក្តីរាយការណ៍បានឲ្យដឹងទៀតថា ឈើប្រណីតជាច្រើនទៀតបានត្រូវគេដុតបំផ្លាញ និងកប់ក្នុងដីបំបាត់ភស្តុតាង មុនពេលក្រុមមន្ត្រីគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើដឹកនាំដោយលោកនាយឧត្តមសេនីយ៍ សៅ សុខា អាចនឹងចុះទៅពិនិត្យនៅទីនោះ ។
ប្រភពបានបញ្ជាក់បន្ថែមថា ឈើប្រណីតដែលគរទុក និងមួយចំនួនកំពុងដុតនោះជារបស់មន្ត្រីកងរាជអាវុធហត្ថម្នាក់នៅក្នុងខេត្តមណ្ឌលគិរី ដោយមានលោកឧកញ៉ា សឹង សំអុល ជាអ្នករត់ការដឹកជញ្ជូន ។
យ៉ាងណាក៏ដោយនៅរសៀលថ្ងៃទី២០ មករា ២០១៦នេះ គេមិនទាន់ដឹងពីចំណាត់ការរបស់សមត្ថកិច្ចនៅឡើយទេ ហើយក៍មិនទាន់ដឹងថាមន្ត្រីគណៈកម្មការជាតិទប់ស្កាត់និង បង្ក្រាបបទល្មើសព្រៃឈើចុះមកត្រួតពិនិត្យនៅពេលណានោះដែរ ។
មេបញ្ជាការកងរាជអាវុធហត្ថខេត្តមណ្ឌលគិរី លោកឧត្តមសេនីយ៍ត្រី សាក់ សារ៉ាង បានមានប្រសាសន៍ថា លោកមិនមានការពាក់ព័ន្ឋនឹងឈើខាងលើនេះទេ ហើយថាលោកនឹងចាប់អ្នកណាដែលនិយាយថាឈើនេះជារបស់លោក ដោយលោកកំពុងតាមអ្នកដែលបញ្ចេញព័ត៌មានចោទប្រកាន់នេះ។
បើតាមលោកមេបញ្ជាការកងរាជអាវុធហត្ថខេត្តមណ្ឌលគិរី នៅពេលនេះ ខាងមន្ត្រីជំនាញរដ្ឋបាលព្រៃឈើ កំពុងចុះពិនិត្យផ្ទៀងផ្ទាត់ឈើនៅក្នុងក្រុមហ៊ុនប៊ិញភឿក១ ។
លោក វង់ សុកសេរី នាយខណ្ឌរដ្ឋបាលព្រៃឈើមណ្ឌលគិរី នឹងលោកជុយ សុខឃាង នាយផ្នែករដ្ឋបាលព្រៃឈើកែវសីមា បានឲ្យដឹងថា ករណីនេះលោកបានទទួលព័ត៌មានហើយ នឹងកំពុងចាត់កម្លាំងចុះធ្វើការ។
សកម្មភាពដុតបំផ្លាញឈើខាងលើនេះ ត្រូវបានក្រុមអ្នកតាមដានការចាប់បង្ក្រាបបទល្មើសព្រៃឈើទូទាំងប្រទេសនិយាយថា ជាការបំផ្លាញវត្ថុតាង និងជាសកម្មភាពប្រឆាំងទៅនឹងច្បាប់យ៉ាងធ្ងន់ធ្ងរ ។ ម្យ៉ាងវិញទៀត សកម្មភាពចុះបង្ក្រាបរបស់មន្ត្រីជំនាញ ហាក់យឺត ពេលមួយជំហានទៅហើយ ព្រោះតែឈើនៅតាមក្រុមហ៊ុនមួយចំនួន ត្រូវបានគេដឹកជម្លៀសចេញ ខ្លះយកទៅកប់ ខ្លះយកទៅដុតបំផ្លាញចោល គួរឲ្យសង្វេគជាពន់ពេកចំពោះព្រៃឈើស្រុកខ្មែរ ខណៈដែលគេដឹកយកទៅលក់ឲ្យជនជាតិ យួនរាប់ខែរាប់ឆ្នាំ ធ្វើមានធ្វើបាន រហូតដល់មនុស្សមួយចំនួនតូច បានទទួលងារជាឧកញ៉ាថែមទៀត ហើយនៅពេលគេដឹកយកទៅលក់មិនបានគេដុតចោលដោយគ្មានអាសូរសូម្បីបន្តិច៕
ដោយ ៖ ហេង ចាន់ណុប
