មណ្ឌលគិរី ៖ បន្ទាប់ពីបានផ្តល់អត្តសញ្ញាណប័ណ្ណគំរូថ្មីដល់ប្រជាពលរដ្ឋ ចំនួន២១៧៩ នាក់ កាលពីឆ្នាំ២០១៥រួចមក អធិការដ្ឋាននគរបាលស្រុកអូររាំង កំពុងបន្តសកម្មភាពធ្វើអត្តសញ្ញាណប័ណ្ណថ្មី ជូនប្រជាពលរដ្ឋក្នុងឆ្នាំ២០១៦ ខណៈបងប្អូនប្រជាពលរដ្ឋដែលគ្រប់អាយុ១៥ឆ្នាំ ក៏មានការកើនឡើងផងដែរ។
លោកអនុសេនីយ៏ឯក ឈិន ពេជ្រ អធិការរងទទួលបន្ទុកអត្តសញ្ញាណកម្មបានឲ្យដឹងថា កន្លងមកមន្ត្រីជំនាញបានចុះធ្វើអត្តសញ្ញាណប័ណ្ណ ជូនប្រជាពលរដ្ឋនៅតាមមូលដ្ឋាន នឹងផ្តល់ជូនរួចម្តងហើយ កាលពីឆ្នាំ២០១៥ ដែលមានចំនួនសរុប ២ ១៧៩នាក់ ប្រុស៩២៤នាក់ ស្រី ១ ២៥៥នាក់ ។ លោកបន្តថា ប្រជាពលរដ្ឋដែលគ្រប់អាយុ អាចធ្វើអត្តសញ្ញាណប័ណ្ណនៅស្រុកអូររាំង មានចំនួនសរុប៣ ៤០៥នាក់។
លោកវរៈសេនីយ៏ត្រី ប៊ូ ប៊ុនឈាត អធិការនគរបាលស្រុកអូររាំងបានមានប្រសាសន៏ថា បានជាការចុះឈ្មោះធ្វើអត្តសញ្ញាណប័ណ្ណថ្មី ត្រូវអូសបន្លាយរយៈពេលយូរ ព្រោះនៅស្រុកអូររាំង ប្រជាពលរដ្ឋភាគច្រើនជាបងប្អូនជនជាតិភាពតិច រស់នៅតាមព្រៃភ្នំ ដាច់ៗពីគ្នា ពិបាកក្នុងការផ្តល់ព័ត៌មានជូនពួកគាត់។
លោកឧត្តមសេនីយ៏ត្រី តូច យ៉ុន ស្នងការនគរបាលខេត្តបានមានប្រសាសន៏ថា នាពេលកន្លងមកស្នងការដ្ឋាននគរបាលខេត្តមណ្ឌលគិរី បានប្រគល់អត្តសញ្ញាណប័ណ្ណជូនប្រជាពលរដ្ឋ សរុប ២៣ ៩២៣ នាក់ ស្រី ៦ ៩៩៥ នាក់ ។ លោកស្នងការបានបញ្ជាក់ ក្នុងនោះមន្ត្រីរបស់លោកក៏បានជួបប្រទះបញ្ហាប្រឈមនានា ដូចជាការមិនយល់ពីតម្លៃរបស់អត្តសញ្ញាប័ណ្ណ(បងប្អូនជនជាតិភាគតិចខ្វះចំនេះដឹង) ភូមិសាស្ត្រផ្លូវតំបន់ព្រៃភ្នំពិបាកធ្វើដំណើរ(ត្រូវចុះធ្វើដល់មូលដ្ឋាននាពេលកន្លងមក) ហើយពេលថ្មីៗនេះ ការធ្វើអត្តសញ្ញាណប័ណ្ណ តម្រូវឲ្យមានការបង់ប្រាក់មួយម៉ឺនរៀល ប្រជាពលរដ្ឋមួយចំនួនខ្វះបញ្ជីអត្រានុកូដ្ឋាន ដូច្នេះហើយធ្វើឲ្យប្រជាពលរដ្ឋដែលជាជនជាតិភាគតិច មួយចំនួនគាត់គិតថា មិនចាំបាច់ធ្វើទេ ព្រោះគាត់រស់នៅជិតមួយជីវិតហើយ មិនដែលផង ចឹងមិនបាច់ធ្វើក៏មិនអីដែរ នាំតែអស់លុយ ។
លោកស្នងការខេត្តបន្តថា ទោះជាយ៉ាងណា លោកនៅតែបន្តជំរុញឲ្យមន្ត្រី នឹងប្រជាពលរដ្ឋ ត្រូវចេះសហការគ្នាឲ្យបានល្អ ដើម្បីសម្រេចឲ្យបានតាមគោលការណ៏របស់ រាជរដ្ឋាភិបាល លើការកំណត់អត្តសញ្ញណរបស់ពលរដ្ឋ នឹងដើម្បីភាពងាយស្រួលរបស់ពលរដ្ឋក្នុង ការចូលរួមការបោះឆ្នោតជាពេលខាងមុខ ៕
លោក ហេង ចំណាប់
