(ខេត្តកែប)៖ នៅព្រឹកថ្ងៃទី០៤ ខែមីនា ឆ្នាំ២០២០ រដ្ឋបាលខេត្តកែប បានបើកសន្និបាតបូកសរុបលទ្ធផលការងារប្រចាំឆ្នាំ២០១៩ និងលើកទិសដៅការងារឆ្នាំ២០២០ និងក្រុមការងាររាជរដ្ឋាភិបាលចុះមូលដ្ឋាន។ដោយពិធីនេះស្ថិតក្រោមអធិបតីភាព លោក កែន សត្ថា អភិបាល នៃគណៈអភិបាលខេត្តកែប និងលោក សំ សារីន ប្រធានក្រុមប្រឹក្សាខេត្ត ព្រមទាំងមានការអញ្ជើញចូលរួម ពីសំណាក់ លោក លោកស្រីសមាជិកក្រុមប្រឹក្សាខេត្ត លោក លោកស្រីជាអភិបាលរងខេត្ត កម្លាំងប្រដាប់អាវុធទាំង៣ ប្រធាន អនុប្រធាន មន្ទីរអង្គភាពជុំវិញខេត្ត អភិបាលក្រុង ស្រុក មេឃុំ ចៅសង្កាត់ និងមន្ត្រីរាជការចំណុះសាលាខេត្តកែបទាំងមូល។
មានមតិបើកសន្និបាតនាឱកាសនោះ លោក កែន សត្ថា អភិបាលខេត្តកែប ក៏បានថ្លែងអំណរគុណ កោតសរសើរ និងវាយតម្លៃខ្ពស់ចំពោះ លោក លោកស្រី ជាថ្នាក់ដឹកនាំ ជាមន្ត្រីរាជការ កងកម្លាំងប្រដាប់អាវុធគ្រប់ជាន់ថ្នាក់ ដែលបានខិតខំប្រឹងប្រែងយកចិត្តទុកដាក់អនុវត្តតួនាទី ភារកិច្ចប្រកបដោយការទទួលខុសត្រូវខ្ពស់ក្នុងរយៈពេលពេញមួយឆ្នាំ ដែលសម្រេចបាននូវលទ្ធផលគួរជាទីមោទនៈ ស្របតាមផែនការអភិវឌ្ឍន៍ខេត្ត និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលដែលបានដាក់ចេញ។
លោកអភិបាលខេត្តបានបន្តថា អង្គសន្និបាតនាពេលនេះ គឺមានគោលបំណងដើម្បីធ្វើការផ្សព្វផ្សាយពីសមិទ្ធផល និងលទ្ធផលនានានៃការអនុវត្តតួនាទី ភារកិច្ចរបស់រាជរដ្ឋាភិបាលធៀបទៅនឹងផែនការប្រចាំឆ្នាំ ព្រមទាំងធ្វើការឆ្លុះបញ្ចាំង ពីចំណុចខ្លាំង ចំណុចខ្សោយ និងបញ្ហាប្រឈមនានាដែលបានជួបប្រទះនាឆ្នាំកន្លងមក និងពិភាក្សាដាក់ចេញនូវទិសដៅអទិភាពនានា សម្រាប់អនុវត្តបន្តក្នុងឆ្នាំ២០២០នេះ សំដៅឆ្លើយតបទៅនឹងតម្រូវការរបស់ប្រជាពលរដ្ឋ នៅតាមមូលដ្ឋានឱ្យកាន់តែមានប្រសិទ្ធភាព៕ សេង ណារិទ្ធ
