(ខេត្តកែប)៖ ទិវាអន្តរជាតិ នារី៨មីនា ឆ្នាំ២០២០ ក្រោមប្រធានបទ”មានសន្តិភាព មានការលើកកម្ពស់សមភាពយេនឌ័រ” ត្រូវបានរដ្ឋបាលខេត្តកែប ប្រារព្ធឡើងនៅរសៀលថ្ងៃទី០២ ខែមីនា ឆ្នាំ២០២០ ដោយពិធីនេះបានរៀបចំឡើងនៅសាលប្រជុំធំ សាលាខេត្តកែប ក្រោមអធិបតីភាព លោក កែន សត្ថា អភិបាល នៃគណៈអភិបាលខេត្តកែប និងលោក សំ សារីន ប្រធានក្រុមប្រឹក្សាខេត្ត។
លោកស្រី អ៊ូ សុគន្ធី ប្រធានមន្ទីរកិច្ចការនារីខេត្តកែប បានឱ្យដឹងថា ជារៀងរាល់ឆ្នាំប្រទេសកម្ពុជា ក៏ដូចជាប្រទេសនានាលើសកលលោក តែងតែប្រារព្ធពិធីអបអរសាទរទិវាអន្តរជាតិនារី ៨មីនា ក្នុងគោលបំណងរំលឹកពីការតស៊ូរបស់ស្ត្រី ក្នុងការទាមទារសិទ្ធិសេរីភាព និងការអនុវត្តសិទ្ធិស្មើភាពរវាងបុរស និងស្ត្រី ដោយពិនិត្យមើលផងដែរ លើសមិទ្ធផលសម្រេចបាន និងបញ្ហាប្រឈមដែលនៅសេសសល់ ដើម្បីរៀបចំផែនការសម្រេចអនុវត្តជាបន្តបន្ទាប់ទៅឆ្នាំខាងមុខទៀត ឆ្ពោះទៅលើកកម្ពស់សមភាពយេនឌ័រ និងផ្តល់ភាពអង់អាចដល់ស្ត្រី។
ក្នុងឱកាសនោះដែរ លោក កែន សត្ថា អភិបាលខេត្តកែប បានថ្លែងថា ក្នុងនាមរដ្ឋបាលខេត្ត លោកសូមគាំទ្រទាំងស្រុងនូវប្រធានបទ”មានសន្តិភាព មានការលើកកម្ពស់សមភាពយេនឌ័រ” ក្នុងគោលបំណងបន្តរំលេចពីតម្លៃដែលមិនអាចកាត់ថ្លៃបាននៃសន្តិភាព និង”អរគុណសន្តិភាព” ដែលបានប្រែក្លាយប្រទេសកម្ពុជាពីគំនរផេះផង់ បែកបាក់ជាតិ និងបែកចែកទឹកដី ទៅជាទឹកដីប្រកបដោយសន្តិភាព ស្ថិរភាព សេរីភាព ប្រជាធិបតេយ្យ នីតិរដ្ឋ និងកំពុងអភិវឌ្ឍដ៏ខ្លាំងក្លាលើគ្រប់វិស័យ ព្រមទាំងចូលរួមដោយស្មើភាព និងស្មើសិទ្ធិជាមួយបណ្តាប្រទេសនានា ទាំងក្នុងតំបន់ និងលើសកលលោក ជាពិសេសសមភាពយេនឌ័រត្រូវបានលើកកម្ពស់ជាបន្តបន្ទាប់ដោយលទ្ធផលវិជ្ជមានគួរឱ្យកត់សម្គាល់។
លោកអភិបាលខេត្តបានបញ្ជាក់ទៀតថា បច្ចុប្បន្នវេទិកាសេដ្ឋកិច្ចពិភពលោក(World Economic Forum) បានបង្ហាញថា គម្លាតយេនឌ័រក្នុងប្រទេសកម្ពុជាយើងត្រូវបានកាត់បន្ថយគួរឱ្យកត់សម្គាល់ ដោយថយចុះពីចំណាត់ថ្នាក់ទី ១១២ ក្នុងឆ្នាំ២០១៦ មកត្រឹមចំណាត់ថ្នាក់ទី៨៩ ក្នុងឆ្នាំ២០២០។ការផ្តល់ចំណាត់ថ្នាក់លើកត្តាចម្បងៗចំនួន៤គឺ៖ ទី១-ការបង្កើនការចូលរួមរបស់ស្ត្រីក្នុងវិស័យសេដ្ឋកិច្ច ,២-សមភាពយេនឌ័រក្នុងវិស័យអប់រំ ,៣-ស្ថានភាពសុខភាពរបស់ស្ត្រី ,៤-សមភាពយេនឌ័រក្នុងតួនាទីជាអ្នកជាអ្នកធ្វើសេចក្តីសម្រេច ក្នុងវិស័យសាធារណៈ និងនយោបាយ៕ សេង ណារិទ្ធ
