កណ្តាល ៖ កាលពីព្រឹកថ្ងៃទី១៧ខែមករាឆ្នាំ២០១៦នៅវត្តពោធិព្រឹក្ស ស្ថិតនៅភូមិស្វាយរលំ ឃុំស្វាយរលំ ស្រុកស្អាង ខេត្តកណ្តាល បានប្រារព្ធពិធីបុណ្យឆ្លងព្រះគន្ធកុដិនិងបុណ្យចំរើនព្រះជន្មាយុ ព្រះចៅអធិការវត្តពោធិព្រឹក្ស ព្រះនាម តង គង់ និងឆ្លងសមិទ្ធផលនានានៅក្នុងបរិវេនវត្តពោធិព្រឹក្ស (លោកមហានិកាយ) មានការអញ្ជើញជាអធិបតីភាពឯកឧត្តម សំរិទ្ធ សារុន និងលោកជំទាវ ពៅ ពិសិដ្ឋា ជាទីប្រឹក្សាសម្តេច ពញាចក្រី ហេង សំរិន ប្រធានរដ្ឋសភាជាតិ និងជាអនុប្រធានឧទ្ធកាល័យគណៈកម្មាការកណ្តាលគណបក្សប្រជាជនកម្ពុជា និងមានការទទូលស្វាគមន៍ពីសំណាក់លោកលោកស្រីអភិបាលស្រុកស្អាងប្រធានធម្មការស្រុកស្អាងអញ្ជើញចូលរួមយ៉ាងច្រើកុះករ ។
នៅក្នុងឱកាសឯកឧត្តម សំរិទ្ធ សារុន បានមានប្រសាសន៍ទៅកាន់លោកលោកស្រី និងគណប្រតិភូអមដំណើរ ដែលអញ្ជើញមកចូលរួមបុណ្យឆ្លងព្រះគន្ធកុដិនេះថា សូមឲ្យមន្ត្រីរាជការប្រជាពលរដ្ឋខិតខំជួយលើកតម្កើងវិសយ័ពុទ្ធសាសនា ពីព្រោះសាសនា ជាសាសនាជាតិ សាសនាជាសាសនារបស់រដ្ឋ សាសនាក៏ផ្សាភ្ជាប់ក្នុងសង្គមផងដែរ ដើម្បីផ្សាភ្ជាប់នូវទំនៀមទម្លាប់ប្រពណីព្រះពុទ្ធសាសនា ។ យ៉ាងណាវិញ នេះជាការផ្សារភ្ជាប់យ៉ាងល្អមួយជាមួយនឹងវិស័យពុទ្ធចក្រ និងអាណាចក្រ ដែលជានិច្ចជាកាល វិស័យទាំងពីនេះ ពុំដែលបានកាត់ផ្តាច់ចេញពីគ្នាឡើយ។
នៅទីបញ្ចប់ កម្មវិធីបុណ្យឆ្លងកុដិ និងសមិទ្ធផលនានានៅវត្តពោធិព្រឹក្សនេះ មានរយៈពេលបីយប់បួនថ្ងៃមកហើយនៅថ្ងៃទី១៧ ខែមករា ជាថ្ងៃបញ្ចប់កម្មវិធីបុណ្យឆ្លងបុណ្យនេះ ក៏មានកម្មវិធីបំពាក់គ្រឿងមេដៃស្ថានា ជូនដល់លោកយាយលោកតា លោក លោកស្រី ជាគ្រឿងមេដៃ ថ្មាក់កសាងស្ថាបនាវត្តពោធិព្រឹក្ស និងចែកទានដល់លោកយាយ លោកតាជាបច្ច័យ និងក្រណាត់សមួយដុំៗ ជូនដល់តាជីយាយជីរួចកាត់ខ្សែរបូរ សម្ភោធព្រះគន្ធកុដិ ដាក់ឱ្យព្រះសង្ឃគង់នៅក្នុងវត្តពោធិព្រឹក្សនេះ ទៅតាមប្រន្តិប្បិត្តិទៅតាមព្រះពុទ្ធសាសនា ៕
ដោយ លោក ហុក វិបុល
