(ខេត្តកែប)៖ ដើម្បីអបអរទិវាជាតិសុខភាព មាតា ទារក និងកុមារ ២១ កុម្ភៈ ឆ្នាំ២០២០ ក្រោមប្រធានបទ «សុខភាពកុមារកម្ពុជានាពេលអនាគត» នៅព្រឹកថ្ងៃ អាទិត្យ ៨កើត ខែផល្គុន ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០១ ខែមីនា ឆ្នាំ២០២០ សាខាកាកបាទក្រហមកម្ពុជាខេត្តកែប បានរៀបចំទិវាជាតិសុខភាពមាតា ទារក និងកុមារ ២១កុម្ភៈ ក្រោមប្រធានបទ”សុខភាពកុមារកម្ពុជានាពរលអនាគត” ក្រោមអធិបតីភាព លោក កែន សត្ថា ប្រធានគណៈកម្មាធិការសាខាកាកបាទក្រហមកម្ពុជាខេត្តកែប ដោយមានការអញ្ជើញចូលរួមពីសមាជិក សមាជិកា គណៈកម្មាធិកាសាខា អនុសាខា មន្ត្រីសាខា មន្ត្រីមណ្ឌលសុខភាព អភិបាលក្រុង ក្រុមប្រឹក្សាក្រុង អជ្ញាធរមូលដ្ឋាន យុវជនកាកបាទក្រហមកម្ពុជា និងស្ត្រីមានផ្ទៃពោះ ,ស្ត្រីមានកូនតូច ៥០នាក់ នៅសាលប្រជុំសាលាក្រុងកែប ខេត្តកែប។
ក្នុងឱកាសនោះ លោក កែន សត្ថា បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលផ្តាំផ្ញើសួរសុខទុក្ខ ក្តីអាណិតស្រឡាញ់ ចំពោះប្រជាពលរដ្ឋទាំងអស់ ជាពិសេសបងប្អូន ក្មួយៗជាស្ត្រីមានផ្ទៃពោះ និងស្ត្រីមានកូនតូចដែលបានចូលរួមក្នុងកម្មវិធី។
ជាមួយគ្នានេះ លោក កែន សត្ថា បានអានសាររបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ស្របពេលដែល សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានទទួលគោរមងារពី អង្គការ សហប្រជាជាតិ ជា ឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រីនិងកុមារ ផ្ញើជូនប្រជាពលរដ្ឋទាំងអស់ ជាពិសេសស្ត្រីមានផ្ទៃពោះ ក្នុងឱកាសទិវាជាតិសុខភាពមាតា ទារក និងកុមារ ដោយសូមឱ្យស្ត្រីមានផ្ទៃពោះទាំងអស់ ប្រតិបត្តិតាមប្រការដូចខាងក្រោម ៖
១- សូមឱ្យស្ត្រីមានគភ៌ទាំងអស់ អញ្ជើញទៅពិនិត្យសុខភាព ពិគ្រោះយោបល់ជាមួយគ្រូពេ ទ្យឆ្មប ជំនាញនៅមណ្ឌល សុខភាព ឬមន្ទីរពេទ្យដែលនៅជិតផ្ទះតាមកាលកំណត់ទទួលយក សេវាបង្ការ ព្យាបាលទាំងអស់ឱ្យបានទៀងទាត់តាមការណែនាំរបស់គ្រូពេទ្យជំនាញ និងស្ម័គ្រចិត្តធ្វើតេស្តឈាមដើម្បីពិនិត្យស្ថានភាពមេរោគអេដស៍ និងមេរោគស្វាយ ដើម្បីលុបបំបាត់ ពិការភាព និងការចម្លងជំងឺទាំងពីរនេះពីម្តាយទៅកូន។
២- សូមទៅសម្រាលកូននៅ មណ្ឌលសុខភាព ឬមន្ទីរពេទ្យដែលមានគ្រូពេទ្យ ឆ្មបជំនាញទទួល បានការបណ្តុះបណ្តាលត្រឹមត្រូវ។
៣- សូមអញ្ជើញទៅពិនិត្យសុខភាពក្រោយពេលសម្រាលទាំងមាតា និងទារក និងទទួលថ្នាំបង្ការជំងឺ១១មុខ តាមការកំណត់របស់គ្រូពេទ្យ។
៤- សូមបំបៅទារកដោយទឹកដោះម្តាយតែមួយមុខគត់ ចាប់ពីពេលទារកប្រសូតភ្លាមរហូតដល់ទារកមានអាយុ ៦ខែ និងផ្តល់អាហារបន្ថែមគ្រប់មុខ គ្រប់ជីវជាតិ (បបរខាប់គ្រប់គ្រឿង) រួមជាមួយ ការបន្តបំបៅទឹកដោះម្តាយរហូតដល់កុមារមានអាយុយ៉ាងតិច ២ឆ្នាំ។
៥- សូមប្រញាប់យកទារកទៅមន្ទីរពេទ្យភ្លាម នៅពេលឃើញសញ្ញាគ្រោះថ្នាក់ណាមួយនៃជំងឺ រលាកផ្លូវដង្ហើម ជំងឺរាក ឬជំងឺឆ្លងដទៃទៀត និងយកទារក ឬកុមារតូចដែលមានរាងកាយស្គម ឬមិនឡើងទម្ងន់សោះ ទៅពិគ្រោះយោបល់ និងទទួលការព្យាបាល នៅមន្ទីរពេទ្យ។
លោក កែន សត្ថា បានបន្ថែមថា ការធ្វើឱ្យមានការប្រែប្រួល រីកចម្រើនស្ថានភាពសុខភាពស្ត្រី និងកុមារ គឺមិនមែនមានតែតួអង្គណាម្នាក់អាចធ្វើតែ ម្នាក់ឯងបានទេ ដែលការងារនេះ តម្រូវឱ្យមានការចូលរួមពីគ្រប់ ភាគីពាក់ព័ន្ធទាំងអស់ និងធនធានគ្រប់ផ្នែក ជាពិសេស ការយកចិត្តទុកដាក់ និងប្តេជ្ញាចិត្តរបស់បុគ្គលជាស្ត្រីគ្រប់រូប ដែលត្រូវថែទាំខ្លួនឯង និងទទួលអាហារូបត្ថម្ភត្រឹមត្រូវ ប្តេជ្ញារួមគ្នាកាត់បន្ថយអត្រាមរណៈរបស់ស្ត្រីនិងទារក នៅពេលសម្រាល។
សូមបញ្ជាក់ជូនថា អំណោយផ្តល់ជូន ស្ត្រីមានផ្ទៃពោះ និងស្ត្រីមានកូនតូចចំនួន ៥០នាក់ ក្នុងម្នាក់ៗទទួលបាន ឃីត១កញ្ចប់ (មានអាវយឺត ៦) ឃីតអនាម័យ ១កញ្ចប់មាន (សាប៊ូ ដុំ២ ដុំ,ថ្នាំដុសធ្មេញ១ដបធំ, ច្រាសដុសធ្មេញ២, ប្រេងកូឡា ១ដប, កន្សែងពោះគោ ១,ទឹកដោះគោឆៅ១ឡូ) និងថវិកា ៥ម៉ឺនរៀល ៕ សេង ណារិទ្ធ
——–
សម្ដេចក្រឡា ហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ ញ៉ែម សាខន សខេង បានអញ្ជើញជាអធិបតី ពិធីចុះពិនិត្យ និងព្យាបាលជម្ងឺដោយឥតគិតថ្លៃ របស់ក្រុមគ្រូពេទ្យស្ម័គ្រចិត្ត ស សុខា ប្រារព្ធនៅបរិវេណអនុវិទ្យាល័យ សម្ដេចឪ
នៅព្រឹកថ្ងៃអាទិត្យ ទី១ ខែមីនា ឆ្នាំ២០២០នេះ សម្ដេចក្រឡា ហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ ញ៉ែម សាខន សខេង បានអញ្ជើញជាអធិបតី ពិធីចុះពិនិត្យ និងព្យាបាលជម្ងឺដោយឥតគិតថ្លៃ របស់ក្រុមគ្រូពេទ្យស្ម័គ្រចិត្ត ស សុខា ប្រារព្ធនៅបរិវេណអនុវិទ្យាល័យ សម្ដេចឪ ស្ថិតនៅស្រុកកំចាយមារ ខេត្តព្រៃវែង ។ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្ដែងសេចក្ដីរំភើពរីករាយចំពោះព្រឹត្តិការណ៍សប្បុរសធម៌នាថ្ងៃនេះ ពិសេសការអញ្ជើញចូលរួមយ៉ាងច្រើនកុះករពីបងប្អូនប្រជាពលរដ្ឋ ទាំងនៅក្នុងពិធីសំណេះសំណាល និងការពិនិត្យព្យបាលជម្ងឺ ។
សម្ដេចក្រឡាហោម បានវាយតម្លៃខ្ពស់ចំពោះសមាជិកសមាជិការនៃក្រុមគ្រូពេទ្យស្ម័គ្រចិត្ត ស សុខា ទាំងអស់ ដែលបានលះបង់ពេលវេលា និងប្រើប្រាស់ចំណេះដឹងក្នុងវិស័យសុខាភិបាលរបស់ខ្លួន ចូលរួមចំណែកក្នុងកិច្ចការមនុស្សធម៌នៅថ្ងៃនេះ និងកន្លងមក តាមរយៈការចុះពិនិត្យ និងព្យាបាលជម្ងឺជូនប្រជាពលរដ្ឋ ដោយមានកិច្ចសហការ និងការចូលរួមគាំទ្រយ៉ាងសកម្ម ពីក្រុមគ្រូពេទ្យនៃមូលដ្ឋានសុខាភិបាលខេត្តព្រៃវែង។ ការពិនិត្យព្យាបាលជម្ងឺជូនប្រជាពលរដ្ឋដូចថ្ងៃនេះ គឺជាការរួមចំណែកមួយ ជាមួយក្រសួងសុខាភិបាល ដើម្បីធ្វើយ៉ាងណាឱ្យសុខាភភាពប្រជាពលរដ្ឋមានភាពល្អប្រសើរ តាមរយៈការពិនិត្យពិគ្រោះ ការផ្ដល់ថ្នាំព្យាបាល និងការវះកាត់ទ្រង់ទ្រាយតូច ហើយសម្រាប់ប្រជាពលរដ្ឋដែលត្រូវបានរកឃើញថាមានបញ្ហាសុខភាពធ្ងន់ធ្ងរបន្ទាប់ពីទទួលការពិនិត្យ ក្រុមគ្រួពេទ្យនឹងផ្ដល់យោបល់ជូនគាត់ទៅមន្ទីរពេទ្យរដ្ឋដែលមានជំនាញ។
នៅក្នុងឱកាសនោះដែរ សម្ដេចក្រឡហោម បានគូសបញ្ជាក់ថា ការធ្វើនយោបាយ និងការដឹកនាំមូលដ្ឋាន មិនខុសគ្នាទេ គឺធ្វើយ៉ាងណាត្រូវឆ្លើយតបតាមសំណូមពរប្រជាពលរដ្ឋ មិនបំពានសិទ្ធ និងផលប្រយោជន៍ស្របច្បាប់របស់ពួកគាត់ ។ រាជរដ្ឋាភិបាលដែលជាថ្នាក់ជាតិ និងអាជ្ញាធរខេត្ត ក្រុង ស្រុក ឃុំ និងភូមិនៅថ្នាក់ក្រោមជាតិ ក៏កំពុងខិតខំបំរើសេចក្ដីត្រូវការក្នុងជីវភាពប្រចាំថ្ងៃជូនប្រជាពលរដ្ឋ តាមគោលនយោបាយផ្លូវ ទឹក ភ្លើង និងធនធានមនុស្ស ។
សម្ដេចក្រឡាហោម អំពាវនាវប្រជាពលរដ្ឋក្នុងមូលដ្ឋាន ត្រូវខិតខំប្រឹងប្រែងជំរុញការសិក្សារៀនសូត្ររបស់កូនៗ ពីព្រោះតំបន់នេះ ដែលកាលពីកុមារភាព សម្ដេច និងកូនចៅប្រជាពលរដ្ឋផ្សេងទៀតមានការលំបាកក្នុងការសិក្សារៀនសូត្រនោះ ឥលូវមធ្យោបាយសិក្សារៀនសូត្រលែងជួបការខ្វះខាតទៀតហើយ។ ដូច្នេះសូមសិស្សានុសិស្សប្រឹងប្រែងខិតខំសិក្សារៀនសូត្រ ហើយមិនត្រូវផ្ដេតផ្ដួលលើការពឹងពាក់ណាមួយនោះឡើយ។
សម្ដេចក្រឡហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ ញ៉ែម សាខន សខេង បានអញ្ជើញជូនថវិកាដល់អង្គពិធី និងបានប្រគល់កុំព្យូទ័រដល់អនុវិទ្យាល័យសម្ដេចឪ មុននឹងបន្តអញ្ជើញសួរសុខទុក្ខបងប្អួនប្រជាពលរដ្ឋ ដែលកំពុងទទួលការពិនិត្យព្យាបាលជម្ងឺពីក្រុមគ្រួពេទ្យស្ម័គ្រចិត្ត ស សុខា ក្នុងបរិយាកាសប្រកបដោយមនោសញ្ចេទនាគោរព និងស្រលាញ់យ៉ាងក្រែលែង។
សូមបញ្ជាក់ថាចាប់ពីឆ្នាំ២០១៦ ដល់ឆ្នាំ២០២០នេះ ក្រុមគ្រូពេទ្យស្ម័គ្រចិត្ត ស សុខា ដឹកនាំផ្ទាល់ដោយឯកឧត្តម ស សុខា និងលោកជំទាវ កែ សួនសុភី បានចុះពិនិត្យ និងព្យាបាលជំងឺដោយឥតគិតថ្លៃជូនប្រជាពលរដ្ឋចំនួន ៤៣.៥១៩នាក់ ហើយ ។ សម្រាប់ថ្ងៃនេះ តាមគម្រោងក្រុមគ្រូពេទ្យស្ម័គ្រចិត្ត ស សុខា នឹងពិនិត្យព្យាបាលជម្ងឺជូនប្រជាពលរដ្ឋប្រមាណ៣ពាន់នាក់ ៕
