(ខេត្តកំពត)៖ ជនសង្ស័យ៣នាក់ដែលជាប់ពាក់ព័ន្ធនឹងករណីចែកចាយគ្រឿងញៀន ត្រូវកម្លាំងកងរាជអាវុធខេត្តកំពត សហការជាមួយកម្លាំងកងរាជអាវុធហត្ថស្រុកកំពង់ត្រាច បង្ក្រាបនៅរសៀលថ្ងៃទី២៨ ខែកុម្ភៈ ឆ្នាំ២០២០ វេលាម៉ោង ១៥និង៤៥នាទី ត្រង់ចំណុចភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។ក្នុងប្របត្តិការនេះ កម្លាំងសមត្ថកិច្ចក៏បានដកហូតនូវវត្ថុតាងថ្នាំញៀនចំនួន២៤កញ្ចប់តូច និងធំមាន៣កញ្ចប់។
ទាក់ទិននឹងការបង្ក្រាបខាងលើ សមត្ថកិច្ចអាវុធហត្ថបានឱ្យដឹងថា ការបង្ក្រាបបទល្មើសគ្រឿងញៀនទទួលបានជោគជ័យនេះ ដោយសារមានសេចក្តីរាយការណ៍ពីប្រជាពលរដ្ឋបានទាន់ពេលវេលា ទើបកម្លាំងបានសហការគ្នាចុះទៅបង្ក្រាបភ្លាមៗ។សមត្ថកិច្ចបានបញ្ជាក់ថា ជនសង្ស័យចំនួន៣នាក់ ប្រុស២នាក់ ស្រីម្នាក់ ដែលត្រូវឃាត់ខ្លួន រួមមាន៖ ទី១-ឈ្មោះ ង៉ូវ សុជា ភេទប្រុស អាយុ៣៥ឆ្នាំ ,ទី២-ឈ្មោះ គង់ វុទ្ធី ភេទប្រុស អាយុ២៧ឆ្នាំ ,និងទី៣-ឈ្មោះ ហូរ ចានី ភេទស្រី អាយុ៣៥ឆ្នាំ ទាំង៣នាក់រស់នៅភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។
បច្ចុប្បន្ន ជនសង្ស័យ រួមជាមួយវត្ថុតាង សមត្ថកិច្ចកងរាជអាវុធខេត្តកំពត កំពុងកសាងសំណុំរឿងបញ្ជូនទៅសាលាដំបូងខេត្តកំពត ចាត់ការតាមផ្លូវច្បាប់៕ សេង ណារិទ្ធ
