បាត់ដំបង ៖នៅព្រឹកថ្ងៃ សៅរ៍ ៧កើតខែ ផល្គុន ឆ្នាំកុរឯកស័កព.ស.២៥៦៣ ត្រូវនឹងថ្ងៃទី ២៩ ខែ កុម្ភៈ ឆ្នាំ ២០២០ ក្នុងសាលប្រជុំធំនាបរិវេណស្នងការដ្ឋាននគរបាលខេត្តបាត់ដំបង ឯកឧត្តម ឧត្តមសេនីយ៍ទោ អ៊ុច សុខុន ស្នងការ នៃស្នងការដ្ឋាននគរបាលខេត្តបាត់ដំបងបានអញ្ជើញជាអធិបតីក្នុងពិធីប្រគល់ប្រាក់គោលនយោបាយជូនមន្ត្រីនគរបាលចូលនិវត្តន៍ និងក្រុមគ្រួសារមន្ត្រីនគរបាលមរណៈសរុបចំនួន៨៩នាក់ ក្នុងនោះមន្ត្រីនគរបាលចូលនិវត្តន៍ចំនួន ៧០នាក់ គ្រួសារមន្ត្រីនគរបាលមរណ:ចំនួន១៩នាក់ដែលមានទឹកប្រាក់សរុបចំនួន ៨០០,៩៣៩,៦១០រៀល(ប្រាំបីរយលានប្រាំបួនរយសាមសិបប្រាំបួនសែននិងប្រាំមួយរយដប់រៀល) ។
អញ្ជើញចូលរួមក្នុងពិធីនេះមានលោក លោកស្រីជាស្នងការរង នាយការិយាល័យជំនាញពាក់ព័ន្ធ មេបញ្ជាការ មេបញ្ជាការរងវរសេនាតូចនគរបាលការពារព្រំដែនគោកពាក់ព័ន្ធ អធិការ អធិការរងនគរបាលក្រុង ស្រុកពាក់ព័ន្ធ ព្រមទាំងកងកម្លាំងនគរបាលចំណុះស្នងការដ្ឋានជាច្រើនរូប។
ក្នុងពិធីប្រគល់ប្រាក់នេះ ឯកឧត្តម ឧត្តមសេនីយ៍ទោ អ៊ុច សុខុន បានថ្លែងនូវការផ្តាំផ្ញើសាកសួរ សុខទុក្ខពីសំណាក់សម្តេចក្រឡាមហោ ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តម នាយឧត្តម សេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ចំពោះមន្ត្រីនគរបាលដែលបានចូលនិវត្តន៍នាពេលកន្លងទៅ ព្រមទាំងលោក លោកស្រី ជាក្រុមគ្រួសារមន្ត្រីនគរ បាលដែលលោកបានទទួលមរណៈនាពេលកន្លងទៅ ។
ឯកឧត្តមបានបន្តថា បើទោះបីជាលោក លោកស្រីបានចូលនិវត្តន៍ពីតួនាទីនិងភារកិច្ចជាកងកម្លាំងនគរបាល ឬ លោក លោកស្រី ដែលជាមន្ត្រីនគរបាលលោកបានទទួលមរណៈភាពកន្លងទៅហើយក្តី ក៏ប៉ុន្តែថ្នាក់ដឹកនាំក្រសួងមហាផ្ទៃ ថ្នាក់ដឹកនាំ អគ្គស្នងការដ្ឋាននគរបាលជាតិ តែងតែបានគឹតគូរអំពីសុខទុក្ខ និងការលំបាក ងាយស្រួលគ្រប់យ៉ាងរបស់លោក លោកស្រី មន្ត្រីនគរបាលជានិវត្តន៍ជន និងក្រុមគ្រួសារមន្ត្រីនគរបាលមរណៈតាមរយៈថ្នាក់ដឹកនាំសមាគមអតីតយុទ្ធជនកម្ពុជាខេត្តបាត់ដំបងដែលមានរូបឯកឧត្តមជាអនុប្រធាននិងលោក អធិការនគរបាលក្រុង ស្រុកក្នុងខេត្តបាត់ដំបងជាប្រធាន ឬអនុប្រធាននៃសមាគមអតីត យុទ្ធជនកម្ពុជាក្នុងក្រុង ស្រុកនៃខេត្តបាត់ដំបង ។
ចុងក្រោយឯកឧត្តម បានស្នើដល់លោក លោកស្រីជាថ្នាក់ដឹកនាំគ្រប់អង្គភាព គ្រប់អធិការដ្ឋាននគរបាលក្រុង ស្រុក ត្រូវបន្តខិតខំយកចិត្តទុក្ខដាក់ពិនិត្យតាមដានចំពោះសុខទុក្ខរបស់និវត្តន៍ជន និងក្រុមគ្រួសារសមាជិក សមាគមអតីតយុទ្ធជន ដែលស្ថិតក្នុងមូលដ្ឋានរបស់ខ្លួនដើម្បីរិះរកគ្រប់លទ្ធភាពជួយពួកគាត់ឲ្យបានទាន់ពេលវេលាក្នុងករណីពួក គាត់ជួបការលំបាកទាំងខាងជីវភាព និងមានបញ្ហាខាងសុខភាពជាដើម បន្ថែមទៀតនោះឯកឧត្តមស្នើឲ្យមន្ត្រីនគរបាលជានិវត្តន៍ជន និងក្រុមគ្រួសារនគរបាលមរណ:ទាំងអស់មានទំនាក់ទំនងដោយផ្ទាល់មកឯកឧត្តមក្នុងករណីចាំបាច់ណាមួយ ៕
