ខេត្តព្រះសីហនុ៖ បើតាមមន្ត្រីអ្នកនាំពាក្យរដ្ឋបាលខេត្តព្រះសីហនុ បានអោយដឹងថា នៅវេលាម៉ោង៧យប់ ថ្ងៃទី២៦ ខែកុម្ភៈ ឆ្នាំ២០២០នេះ នាវាទេសចរណ៍ Ms Westerdam ដែលមានមូលដ្ឋានមកពីសហរដ្ឋអាមេរិក នឹងចាកចេញពីកំពង់ផែក្រុងព្រះសីហនុ ប្រទេសកម្ពុជា និងបន្តឆ្ពោះទៅកាន់កំពង់ផែ Manila ក្នុងប្រទេសហ្វីលីពីន មុននឹងបន្តដំណើរទៅកាន់គោលដៅប្រទេសដើមវិញ។
សូមជម្រាបថា ការចាកចេញរបស់នាវានេះ ក្រោយបញ្ចប់ការងារផ្ទេរអ្នកដំណើរទេសចរណ៍ចំរុះជាតិសាសន៍ជាង ២,០០០នាក់ តាមច្រកប្រទេសកម្ពុជា ទៅកាន់ប្រទេសកំណើតវិញ ក្រោយប្រមុខរាជរដ្ឋាភិបាលកម្ពុជា បានអនុញ្ញាតអោយនាវានេះ ចូលចតកំពង់ផែក្រុងព្រះសីហនុ កាលពីថ្ងៃទី១៣ កុម្ភៈ កន្លងទៅ ក្នុងការងារមនុស្សធម៍ ដើម្បីជួយសង្គ្រោះអ្នកទេសចរណ៍ទាំងអស់ ដែលនៅលើនាវាជាង១០ថ្ងៃ លើផ្ទៃសមុទ្រ ក្រោយកោះ និងប្រទេសចំនួន៦ បដិសេធមិនអោយចូលចត ក្រោមហេតុផល ខ្លាចចម្លងមេរោគ Covid-19។
ក្រោយចូលចតនៅកំពង់ផែប្រទេសកម្ពុជាច្រើនថ្ងៃ មុនចាកចេញពីកម្ពុជា ទាំងអ្នកទេសចរណ៍ចម្រុះជាតិសាសន៍ច្រើនជាង ៤០ប្រទេស និងកងនាវិក សរុបជាង ២,០០០នាក់ មន្ត្រីសុខាភិបាលកម្ពុជា បានត្រួតពិនិត្យសុខភាព មិនមានរកឃើញអ្នកណាម្នាក់ នៅលើនាវានេះ មានឆ្លងមេរោគCovid-19ឡើយ៕
