សៀមរាប៖ ថ្ងៃទី២៥ ខែកុម្ភៈ ឆ្នាំ២០២០ លោក លី សំរិទ្ធ អភិបាលរងខេត្តសៀមរាប និងជាអ្នកនាំពាក្យ បានឱ្យដឹងនៅថ្ងៃទី២៥ ខែកុម្ភៈ ឆ្នាំ២០២០នេះថា អាជ្ញាធរខេត្តសៀមរាបបាន និងកំពុងតែដំណើរការស្ថាបនានិងជួសជុលផ្លូវជាច្រើនខ្សែនៅក្នុងក្រុងសៀមរាប ដើម្បីបង្កភាពងាយស្រួលដល់ការធ្វើដំណើររបស់ប្រជាពលរដ្ឋក៏ដូចជាភ្ញៀវទេសចរ។
លោក លី សំរិទ្ធ បានបន្តថា ផ្លូវទាំងនេះជាគម្រោងថវិការបស់ថ្នាក់ជាតិ រដ្ឋបាលខេត្ត សាលាក្រុង និងសង្កាត់ ដែលនៅក្នុងទីប្រជុំជន មានស្ថាបនាជាផ្លូវចាក់បេតុង និងចាក់កៅស៊ូ ចំណែកផ្លូវនៅតាមភូមិជាយក្រុងគេធ្វើផ្លូវចាក់ក្រួសក្រហមសិន។ ក្រៅពីនេះ នៅក្នុងរមណីយដ្ឋានអង្គរអាជ្ញាធរជាតិអប្សរា ក៏បានកំពុងតែធ្វើការស្ថាបនា និងកែលម្អផ្លូវជាច្រើនផងដែរ ដូចជាការជួសជុលផ្លូវរថយន្ត ការស្ថាបនាផ្លូវកង់ និងរៀបចំសណ្តាប់ធ្នាប់ ដាំស្មៅ ដាំដើមឈើនៅមុខប្រាសាទអង្គរឱ្យមានភាពបៃតងជាដើម។
លោក លី សំរិទ្ធ បានបញ្ជាក់ថា ផ្លូវមួយចំនួនធំ និងធ្វើការស្ថាបនារួចរាល់នៅមុនចូលពេលបុណ្យចូលឆ្នាំថ្មីប្រពៃណីខ្មែរ និងមួយចំនួនទៀត និងបញ្ចប់នៅក្រោយបុណ្យចូលឆ្នាំខ្មែរ ។ ដូច្នេះនៅចុងឆ្នាំ២០២០នេះ ផ្លូវនៅក្រុងសៀមរាបស្ទើរទាំងអស់នឹងស្អាត ងាយស្រួលដល់ការធ្វើដំណើរ ជាពិសេសគឺភ្ញៀវទេសចរដែលមកកម្សាន្តនៅខេត្តសៀមរាប នៅក្នុងឱកាសចូលឆ្នាំថ្មីប្រពៃណីខ្មែរខាងមុខនេះ ។
ប្រជាពលរដ្ឋនៅក្នុងក្រុងសៀមរាប បានបង្ហាញពីការពេញចិត្តចំពោះការស្ថាបនាផ្លូវរបស់អាជ្ញាធរនៅពេលនេះ ព្រោះថា នៅក្នុងឆ្នាំ២០១៩កន្លងមកនេះ ប្រជាពលរដ្ឋនៅក្នុងខេត្តសៀមរាបជួបការលំបាកយ៉ាងខ្លាំងក្នុងការធ្វើដំណើរជាពិសេសនៅរដូវវស្សា ដោយសារតែផ្លូវមានការខូចច្រើន តែឥឡូវនេះទទួលបានផ្លូវល្អស្អាតសម្រួលដល់ការធ្វើដំណើរ៕
