(ខេត្តកំពត)៖ រដ្ឋលេខាធិការក្រសួងបរិស្ថានយល់ឃើញថា តំបន់ការពារទេសភាពអន្លង់ព្រីង ជាតំបន់ដីសើមមួយកន្លែង ដែលមានសារៈប្រយោជន៍ខ្លាំងណាស់ ព្រោះជាទីជម្រករបស់ជីវចម្រុះ និងសត្វស្លាបជិត១០០ប្រភេទ។
ជាមួយគ្នានេះលោកក៏បានជំរុញ និងអំពាវនាវដល់មន្ត្រីជំនាញ អង្គការដៃគូ និងអាជ្ញាធរ និងពលរដ្ឋ ត្រូវប្តេជ្ញា អភិរក្សតំបន់ដីសើមមួយនេះ
ឱ្យនៅគង់វង្សស្ថិតស្ថេរ សម្រាប់បម្រើជាប្រយោជន៍ដល់អ្នកភូមិនៅក្បែរ ពិសេសក្មេងជំនាន់ក្រោយ តាមរយៈការចង់ក្រងបង្កើតជាតំបន់អេកូទេសចរណ៍ដ៏ទាក់ទាញនៅថ្ងៃខាងមុខ។
នេះជាការលើកឡើងរបស់លោក នេត្រ ភក្ត្រា រដ្ឋលេខាធិការក្រសួងបរិស្ថាន បានប្រាប់ឲ្យដឹងនៅក្នុងពិធី ប្រារពទិវាតំបន់ដីសើមពិភពលោកឆ្នាំ២០២០ ក្រោមប្រធានបទ “តំបន់ដីសើម និងជីវចម្រុះ” នៅបរិវេណសាលាបឋមសិក្សាថ្មបើក ស្ថិតនៅភូមិកោះចំការ ឃុំបឹងសាលាខាងត្បូង ស្រុកកំពង់ត្រាច ខេត្តកំពត នាពេលមន្លងមក។
លោកបានបន្ថែមទៀតថា ព្រះរាជាណាកច្រកម្ពុជា មានផ្ទៃតំនប់ដីសើមប្រមាណ ៤០% ហើយតំបន់ដីសើម គឺសំដៅលើដីមានសំណើម ដូចជានៅតំបន់បឹងទន្លេសាប ទន្លេមេគង្គ និងតំបន់ជុំវិញតំបន់ទំនាប និងវាលទំនាបមួយចំនួនផងដែរ។
ដោយឡែកតំបន់ការពារទេសភាពអន្លង់ព្រីង ជាតំបន់ដីសើមមួយ ដែលមានផ្ទៃដីប្រមាណ២១៧ ហិកតា ដែលបាននឹងកំពុងអភិរក្ស ហើយតំបន់នេះមានលក្ខណៈពិសេសត្រង់ថា ជាជម្រកសត្វស្លាបច្រើន ប្រមាណជិត១០០ប្រភេទ ហើយខ្លះ ជាប្រភេទបក្សីកម្រ ជិតផុតពូជពីភពផែនដី ដូចជាសត្វក្រៀលជាដើម ដែលមានចំនួនជាង១០០ក្បាល នៅតំបន់ការពារទេសភាពអន្លង់ព្រីងនេះ។
លោកបានបន្តថា មន្ដ្រីជំនាញ អង្គការដៃគូ និងអាជ្ញា រួមនឹងប្រជាពលរដ្ឋត្រូវរួមសហការគ្នា ក្រៅពីការងារអភិរក្ស សូមរួមគ្នាចង់ក្រងបង្តើតជាតំបន់អេកូទេសចរណ៍ នៅតំបន់ការពារទេសភាពអន្លង់ព្រីងនេះ ដើម្បីបម្រើប្រយោជន៍ដល់ព្រជាពលរដ្ឋក្នុងសហគមន៍ និងក្មេងៗជំនាន់ក្រោយ។
សូមជម្រាបថា៖ ទិវាតំបន់ដីសើមពិភពលោកឆ្នាំ២០២០ មានការសហការរៀបចំដោយ ក្រសួងបរិស្ថាន អង្គការដៃគូមាន WWT, Birdlife និង Naturelife ដោយមានការផ្តល់កិត្តិយសចូលរួមពីសំណាក់ លោកស្រី Tina Redshaw ឯកអគ្គរាជទូតចក្រក្រភពអង់គ្លេស និងថ្នាក់ដឹកនាំខេត្តកំពតផងដែរ៕ សេង ណារិទ្ធ
