(ខេត្តកំពត)៖ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានលើកឡើងថា ការដោះស្រាយវិវាទដីធ្លីក្រៅប្រព័ន្ធតុលាការ ជាដំណោះស្រាយមួយដ៏ល្អបំផុត ដែលបង្ហាញអំពីសាមគ្គីភាព មិត្តភាព ភាតរភាព គ្មានអ្នកចាញ់ គ្មានអ្នកឈ្មះ គឺព្រមទទួលទាំងអស់គ្នា ហើយរដ្ឋអំណាចគ្រប់លំដាប់ថ្នាក់ អាចប្រើយន្តការ នៃការដោះស្រាយមួយនេះឲ្យមានប្រសិទ្ធភាពបាន ទៅតាមករណីជាក់ស្តែងផ្សេងៗគ្នា។ ឯកឧត្តម សូមឲ្យអាជ្ញាធរឃុំ សង្កាត់ត្រូវយកចិត្តទុកដាក់ប្រើប្រាស់ឲ្យអស់លទ្ធភាព ក្នុងការចូលរួមសម្របសម្រួល ដោះស្រាយវិវាទដីធ្លី ឲ្យចប់នៅត្រឹមថ្នាក់មូលដ្ឋានរបស់ខ្លួនទើបជាការប្រសើរសម្រាប់ប្រយោជន៍ប្រជាពលរដ្ឋ។
ការថ្លែងបែបនេះក្នុងពិធីបើកសិក្ខាសាលាស្តីពី និតិវិធីដោះស្រាយវិវាទដីធ្លី របស់គណៈកម្មការសុរិយោដី ជូនប្រធាន និងសមាជិកក្រុមប្រឹក្សាឃុំ សង្កាត់ អាជ្ញាធរក្រុងស្រុកនៃខេត្តកំពត នៅព្រឹកថ្ងៃទី ១២ ខែកុម្ភៈ ឆ្នាំ២០២០ នៅឯសណ្ឋាគារឌីយ៉ាងម៉ង់កំពត របស់ លោក ទេព ធន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាអគ្គលេខាធិការនៃអាជ្ញាធរជាតិ ដោះស្រាយទំនាស់ដីធ្លី។
លោកបានបញ្ជាក់ទៀតថា ក្រសួងរៀបចំដែនដី នគរូបនីយកម្មនិងសំណង់មានបេសកកម្ម លើវិស័យសំណង់ វិស័យដីធ្លី ការងារលំនៅដ្ឋាន ការងាររៀបចំដែនដី និងកិច្ចការផ្សេងៗទៀតដែលរាជរដ្ឋាភិបាលប្រគល់ជូន ដូចជាការដោះស្រាយវិវាទដីធ្លីជាដើម។ ដោយឡែកចំពោះការដោះស្រាយវិវាទដីធ្លី ក្រសួងដែនដី ដោះបាន ៧៩២៩ករណី លើសំណុំរឿង ៨៧០០ករណី ហើយតាមរយៈអាជ្ញាធរជាតិដោះស្រាយទំនាស់ដីធ្លី ដោះស្រាយបាន ១៧៦៦ករណី លើសំណុំរឿង ១៨៩៨ករណី។ សរុបទៅ នៅទូទាំងប្រទេស មានវិវាទដីធ្លីសេសសល់ មិនដល់៩០០ករណីនោះទេ ហើយការជួបជុំគ្នាថ្ងៃនេះក៏ជាផ្នែកមួយក្នុងការពិភាក្សា និងស្វែងរកដំណោះស្រាយ ចំពោះបញ្ហា ដែលនៅសេសសល់ ក៏ដូចជាទប់ស្កាត់មិនឲ្យមានទំនាស់ដីធ្លីកើតឡើងបន្ថែមទៀតដែរ។
យោងតាមបទពិសោធន៍ និងដើម្បីឆ្លើយតបតាមការចង់បានរបស់ប្រមុខរាជរដ្ឋាភិបាល លោក ទេព ធន ជំរុញលើកទឹកចិត្ត ដល់អាជ្ញាធរឃុំ សង្កាត់ ក្រុង ស្រុកទាំងអស់ ត្រូវយកចិត្តទុកដាក់ ក្នុងការដោះស្រាយវិវាទដីធ្លីនៅក្រៅប្រព័ន្ធតុលាការឱ្យបានច្រើន ព្រោះវាជាដំណោះស្រាយមួយដ៏ល្អ ប្រសើរបំផុត ដែលបង្ហាញអំពីសាមគ្គីភាព មិត្តភាព ភាតរភាព គ្មានអ្នកចាញ់ គ្មានអ្នកឈ្មះ គឺព្រមទទួលទាំងអស់គ្នា ហើយប្រទេសជាច្រើនលើពិភពលោក បានប្រើវិធីសាស្ត្រនេះដែរ។ ម្យ៉ាងយន្តការនៃការដោះស្រាយឱ្យមានប្រសិទ្ធភាព បានតាមករណីជាក់ស្តែង ដោយមិនប្រកាន់ថា ទាល់តែប្រើឥទ្ធិពលថ្នាក់ដឹកនាំជាន់ខ្ពស់នោះទេ ករណីខ្លះ សូម្បីចាស់ព្រឹទ្ធាចារ្យ មេភូមិ មេឃុំ អាចារ្យវត្ត លោកគ្រូអ្នកគ្រួ គ្រូសូត្រឆ្វេង គ្រូសូត្រស្តាំជាដើម ក៏អាចមានឥទ្ធិពលដោះស្រាយវិវាទបានដែរ។
លោកបានគូសបញ្ជាក់ទៀតថា នៅពេលការចុះវាស់វែងដីធ្លីលក្ខណៈជាប្រព័ន្ធត្រូវបានបញ្ចប់រួចរាល់ ទំនាស់ដីធ្លីនឹងស្មើសូន្យ បានន័យថាគ្មានទំនាស់ដីធ្លីទៀតទេ បើតាមរបាយការណ៍ការចុះវាស់វែងជាប្រព័ន្ធ មកដល់បច្ចុប្បន្ន ក្រសួងធ្វើបាន៨០,៣៧% នៃផ្ទៃដីនិងក្បាលដីដែលប៉ាន់ប្រមាណ៧លាននៅទូទាំងប្រទេស ហើយគ្រោងនឹងបញ្ចប់ត្រឹមឆ្នាំ ២០២១ខាងមុខនេះ៕ សេង ណារិទ្ធ
