(ខេត្តកែប)៖ រោងសិប្បកម្មអារឈើមួយកន្លែង ស្ថិតក្នុងភូមិចំការចេក ឃុំពងទឹក ស្រុកដំណាក់ចង្អើរ ខេត្តកែប ត្រូវអគ្គីភ័យលេបត្របាក់ខ្ទេចគ្មានសល់ នៅរាត្រីឆ្លងអាធ្រាតឈានចូលថ្ងៃទី១១ ខែកុម្ភៈ ឆ្នាំ២០២០។ចំពោះករណីឆាបឆេះរោងសិប្បកម្មអារឈើខាងលើ ពេលកំពុងកើតហេតុម្ចាស់សិប្បកម្មដេកលង់លក់នៅផ្ទះមិនដឹងអីសោះ លុះព្រឹកឡើងទើបមានការភ្ញាក់ផ្អើយតែម្តង។
តាមប្រភពព័ត៌មានពីសមត្ថកិច្ចស្រុកដំណាក់ចង្អើរ បានឱ្យដឹងថា ករណីឆាបឆេះរោងសិប្បកម្មអារឈើនេះ អាចកើតឡើងនៅពេលយប់ ក្នុងចន្លោះម៉ោង១ទៅម៉ោង២ឆ្លងអាធ្រាត ឈានចូលថ្ងៃទី១១ ខែកុម្ភៈ ឆ្នាំ២០២០ ប៉ុន្តែពេលអគ្គីភ័យឆាបឆេះពេញបន្ទុករហូតឆេះខ្ទេចគ្មានសល់ ម្ចាស់សិប្បកម្មអារឈើមិនដឹងនោះទេ លុះវេលាម៉ោងជាង៥ទៀបភ្លឺ ទើបម្ចាស់បានដឹងហើយរាយការណ៍ប្រាប់សមត្ថកិច្ច។
ប្រភពដដែលបានបញ្ជាក់ទៀតថា ម្ចាស់សិប្បកម្មអារឈើខាងលើ ឈ្មោះ ទី ពៅ ភេទប្រុស អាយុ៣៨ឆ្នាំ រស់នៅក្នុងភូមិ ឃុំ កើតហេតុខាងលើ។ចំពោះករណីបង្កឱ្យមានអគ្គីភ័យឆាបឆេះនេះរោងសិប្បកម្មអារឈើនេះ អាចបណ្តាលមកពីទុស្សេចរន្តអគ្គិសនី ហើយសម្ភារៈដែលបានក្លាយជាចំណីព្រះអាគីនោះរួមមាន៖ ម៉ាសុីនរ៉ៃអារឈើ១គ្រឿង ឈើប្រភេទដើមត្រសេកមួយគនរធំ និងឆេះរោងម៉ាសុីនសិប្បកម្មមានទំហំ ០៤×១៥ម៉ែត្រ សង់អំពីឈើប្រក់សង្កសី។
ក្រោយពេលមានករណីអគ្គីភ័យឆាបឆេះ សមត្ថកិច្ចបានយករថយន្តទៅបាញ់ទឹកពន្លត់ចំហាយភ្លើងដែលនៅសេសសល់ដើម្បីបញ្ចៀសការរាលដាលដល់ភូមិឋានប្រជាពលរដ្ឋ៕ សេង ណារិទ្ធ
