កំពត ៖ លោក ខៃ សម្ភស្ស ព្រះរាជអាជ្ញាអមសាលាដំបូងខេត្តកំពត បានដឹកនាំកម្លាំងកងរាជអាវុធហត្ថខេត្ត និងស្រុកចុះ បង្ក្រាបកន្លែងបញ្ជល់មាន់ ដែលលេងរាប់ខែមួយកន្លែង នៅភូមិកោះគ្រឹះស្នារ ឃុំប្ញស្សីស្រុកខាងលិច ស្រុកកំពង់ត្រាច ខេត្តកំពត ។
តាមប្រភពព័ត៌មានថា គេលេងបង់លុយឱ្យនគរបាលរាប់ខែមកហើយ ។ ពេលនេះដល់ថ្ងៃអន្សា ដោយត្រូវ អាវុធហត្ថខេត្តបង្ក្រាប និងចាប់អ្នកលេងបាន ៥នាក់ អាគកជិត ១០ក្បាល និងម៉ូតូ ២៦គ្រឿង កាលពីព្រឹកថ្ងៃទី ១០ ខែមករា ឆ្នាំ២០១៦ ។
មន្ត្រីកងរាជអាវុធហត្ថការិយាល័យព្រហ្មទណ្ឌកម្រិតធ្ងន់ខេត្តបានឱ្យដឹងថា ក្រោយពីទទួលពាក្យបណ្តឹងពីអ្នកភូមិថា មានកន្លែងបញ្ជល់មាន់មួយកន្លែងបានលេងភ្នាល់ស៊ីសងទឹកលុយធំៗ ហើយភាគច្រើនអ្នកមកលេងមានមកពីភូមិ ឃុំ និងស្រុកមូលដ្ឋានទាំងនេះ ឥឡូវក៏ចុះបង្ក្រាបតែម្តង ។
ព្រះរាជអាជ្ញា និងកងរាជអាវុធត្ថឱ្យដឹងទៀតថា ចំពោះអ្នកញៀនល្បែងបញ្ជល់មាន់ ដែលឃាត់ខ្លួន ត្រូវបានកសាងសំណុំរឿងបញ្ជូនទៅសាលាដំបូងខេត្ត ព្រោះថា រយៈពេលកន្លងមកឱ្យតែមានល្បែងស៊ីសង គឺតែងមានចោរលួច ចោរប្លន់កើតឡើងជាញឹកញាប់បង្កអសន្តិសុខ និងជាការរំលោភបំពានដល់គោលនយោបាយ ភូមិ-ឃុំគ្មានសុវត្ថិភាពទៀតផងដែរ ៕
ដោយ ៖ សារ៉ាត់
