(ខេត្តកែប) ៖ នៅព្រឹកថ្ងៃទី០៤ ខែកុម្ភៈ ឆ្នាំ២០២០ អយ្យការអមសាលាដំបូងខេត្តកំពត បានធ្វើសិក្ខាសាលា ស្តីពីការផ្សព្វផ្សាយច្បាប់ និងនីវិធីកសាងសំណុំរឿង ដល់មន្ត្រីនគរបាលយុត្តិធម៌ នៅខេត្តកែប។
សិក្ខាសាលានេះបានរៀបចំឡើងនៅក្នុងសាលប្រជុំស្នងការដ្ឋាននគរបាលខេត្តកែប ក្រោមអធិបតីភាព លោក ឯក ឆេងហួត ព្រះរាជអាជ្ញា នៃអយ្យការអមសាលាដំបូងខេត្តកំពត និងក៏មានការចូលរួមពីលោកព្រះរាជអាជ្ញារង លោកស្នងការរងទទួលផែន ព្រមទាំងមន្ត្រីនគរបាលយុត្តិធម៌ នៃអង្គភាពនគរបាលខេត្តកែប និងអង្គភាពកងរាជអាវុធហត្ថខេត្តកែប។
ក្នុងសិក្ខាសាលា លោក ឯក ឆេងហួត ព្រះរាជអាជ្ញា អយ្យការអមសាលាដំបូងខេត្តកំពត បានបញ្ជាក់ថា ដើម្បីឱ្យមន្ត្រីនគរបាលយុត្តិធម៌កាន់តែយល់ដឹងស្តីពីច្បាប់ នៃក្រមព្រហ្មទណ្ឌ និងនីតិវិធីកសាងសំណុំរឿង គប្បីមន្ត្រីអនុវត្តច្បាប់ទាំងអស់ ត្រូវតែសិក្សាស្វែងយល់ឱ្យបានទូលំទូលាយ និងមានបទពិសោធន៍សម្រាប់ជាមូលដ្ឋានគ្រឹះក្នុងការអនុវត្តទៅតាមនីតិវិធី។លោកបានបន្តថា មន្ត្រីនរបាលយុត្តិធម៌ត្រូវប្រើវិធីសាស្ត្រទាំងឡាយណាដែលមានភាពច្បាស់លាស់ ដោយផ្អែកលើភស្តុតាង ដើម្បីដោះស្រាយជូនបុគ្គលទាំងឡាយដែលកំពុងរងការចោទប្រកាន់។
លោកព្រះរាជអាជ្ញាបានបន្ថែមថា កន្លងមកយើងពិនិត្យឃើញថា កងកម្លាំងក្នុងអង្គភាពនគរបាលក្តី អង្គភាពកងរាជអាវុធហត្ថក្តី គឺផ្នែកនគរបាលយុត្តិធម៌ ហាក់មានលក្ខណៈមួយនៅមានកម្រិត បើប្រៀបធៀបទៅនឹងនគរបាលយុត្តិធម៌នៅឯរាជធានីភ្នំពេញគឺគេបានអនុវត្តច្បាប់បានគ្រប់ជ្រុងជ្រោយជាងយើង ដូចជាបច្ចេកទេសនៃការកសាងសំណុំរឿងយើងក៏មានតិចតួចនៅឡើយ ដោយឡែកបើនៅរាជធានីភ្នំពេញគឺមានច្រើនជាងយើង ម្លោះហើយកិច្ចការងាររបស់គេទាំងអម្បាលមាន ត្រូវបានកែសម្រួលបន្តិចម្តងៗហើយបានរលូនជាបន្តបន្ទាប់។ចំពោះគរបាលយុត្តិធម៌នៅតាមខេត្តរបស់យើងមានករណីតិចតួច យូរៗទើបមានករណីម្តង ហើយក៏ពុំទាន់មាននីតិវិធីសាស្ត្រច្បាស់លាស់ណាមួយទៅតាមលក្ខណៈច្បាប់ដែលយើងចង់បាននៅឡើយ។
លោក ព្រះរាជអាជ្ញា ឯក ឆេងហួត បានបញ្ជាក់ទៀតថា ដើម្បីឱ្យមន្ត្រីអនុវត្តច្បាប់ទាំងអស់អនុវត្តប្រកបដោយប្រសិទ្ធភាព លោកសូមលើកយកនូវបទលើសជាក់ស្តែង(មាត្រា៨៨)ជាប្រធានបទ ព្រោះនីតិវិធីក្នុងការកសាងសំណុំរឿងនេះវាមានទម្រង់ខុសគ្នានឹងបទល្មើសមិនជាក់ស្តែង។ចំពោះបទល្មើសជាក់ស្តែង គឺពាក់ព័ន្ធនឹងនីតិវិធីឃាត់ខ្លួននិងនីតិវិធីឆែកឆេរ ហើយក្នុងនោះសមត្ថកិច្ចត្រូវអនុវត្តដោយការទទួលខុសត្រូវ ដូចជាការទទួលខុសត្រូវរាល់សំណុំរឿងរបស់ជនជាប់ចោទ អំពីទោស ព្រមទាំងនីតិវិធីសើុបអង្កេត ដោយផ្តោតទៅលើនីតិវិធីដែលយើងចង់បាន ពិសេសការវិភាគអង្គហេតុដើម្បីឈានទៅការកសាងសំណុំរឿង។
ជាមួយនេះ លោកព្រះរាជអាជ្ញា ក៏បានជំរុញដល់មន្ត្រីនគរបាលយុត្តិធម៌ ទាំងអង្គភាពនគរបាល ទាំងអង្គភាពកងរាជអាវុធហត្ថ ត្រូវខិតខំរៀនសូត្របន្តរកបទពិសោធន៍បន្ថែមទៀត ដើម្បីស្វែងយល់ឱ្យកាន់តែច្បាស់នូវនីតិវិធីព្រហ្មទណ្ឌ សម្រាប់ជាគ្រឹះមួយដ៏រឹងមាំ ដើម្បីរួមគ្នាអនុវត្តច្បាប់ប្រកបដោយតម្លាភាព៕ សេង ណារិទ្ធ
