(ខេត្តកំពត)៖ គ្រោះថ្នាក់ចរាចរណ៍បង្កដោយខ្លួនឯងមួយ បានបណ្តាលឱ្យមនុស្សម្នាក់បានស្លាប់បាត់បង់ជីវិតដោយមានម៉ូតូសង្កត់ពីលើ ដែលហេតុការណ៍នេះបានកើតឡើងកាលពីយប់រំលងអាធ្រាតឈានចូលថ្ងៃទី២៤ ខែមករា ឆ្នាំ២០២០ ស្ថិតតាមបណ្តោយផ្លូវលំមួយខ្សែ ក្នុងភូមិទឹកក្រហម ឃុំកណ្តោល ស្រុកទឹកឈូ ខេត្តកំពត។
មន្ត្រីនគរបាលចរាចរណ៍នៃស្នងការដ្ឋានខេត្តកំពតបានឱ្យដឹងថា ជនរងគ្រោះក្នុងហេតុការណ៍ខាងលើមានឈ្មោះ កែវ ធី ភេទប្រុស អាយុ៤១ឆ្នាំ មានទីលំនៅភូមិទឹកក្រហម ឃុំកណ្តោល ស្រុកទឹកឈូ ខេត្តកំពត។
ប្រភពពីសមត្ថកិច្ចដដែលបានរៀបរាប់ថា កាលពីវេលាម៉ោង១រំលងអាធ្រាត ឈានចូលថ្ងៃទី២៤ ខែមករា ឆ្នាំ២០២០ បុរសរងគ្រោះខាងលើបានជិះម៉ូតូតាមបណ្តោយផ្លូវលំក្រួសក្រហម លុះមកដល់ចំណុចភូមិ ឃុំកើតហេតុស្រាប់តែម៉ូតូបានរេខុសផ្លូវរួចក៏ធ្លាក់ចូលក្នុងប្រឡាយបណ្តាលឱ្យស្លាប់បាត់បង់ជីវិតដោយត្រូវម៉ូតូសង្កត់ពីលើ ហើយករណីនេះ គ្មានប៉ះទង្គិចជាមួយអ្នកណាឡើយ។
បច្ចុប្បន្នសពជនរងគ្រោះ ត្រូវបានក្រុមគ្រួសារចាត់ចែងធ្វើបុណ្យតាមប្រពៃណី៕ សេង ណារិទ្ធ
