ខេត្តសៀមរាប ៖ នៅរសៀលថ្ងៃទី១២ខែ មករា ឆ្នាំ២០១៦ម្សិលមិញនេះ នៅសណ្ឋាគារ អេមព្រីសអង្គរ ខេត្តសៀមរាប មានបើកអង្គសន្និសិទលើកទី៦ស្តីពីភាពជាដៃគូអន្តរជាតិ សម្រាប់គំនិតផ្តួចផ្តើម សាតូយ៉ាម៉ា (IPSI-6 ) ក្រោម អធិបតីភាពឯ.ឧខៀវ មុតរដ្ឋលេខាធិការក្រសួងបរិស្ថានឯ.ឧគឹម ឆៃហៀងអភិបាលរងនៃគណៈអភិបាល ខេត្ត និង លោកបណ្ឌិតKazuhiko Takeuchi នាយកនៃលេខាធិការដ្ឋាន IPSI និង សាកលវិទ្យាល័យ UNU-IAS ដោយមានការចូលរួមពីសំណាក់អស់លោក លោកស្រីជាសមាជិក សមាជិកានៃលេខាធិការដ្ឋាន IPSI តំណាង ក្រសួង ស្ថាប័ន អាជ្ញាធរមូលដ្ឋាន អង្គការដៃគូជាតិ អន្តរជាតិ លោកគ្រូ អ្នកគ្រូសិស្ស និស្សិត ក្រុមយុវជនកាយរិទ្ធ យុវជនកាកបាទក្រហម និង សហភាពសហពន្ធ័យុវជនកម្ពុជាខេត្តផងដែរ។
ក្នុងកិច្ចស្វាគមន៍របស់ឯ.ឧ គឹម ឆៃហៀង ក៏បានលើកឡើងថាក្នុងសារៈសំខាន់របស់គំនិតផ្តួចផ្តើមសាតូយ៉ាម៉ា គឺឆ្លុះបញ្ចាំងពីភាពសុខដុមរមនារវាងសង្គម និង ធនធានធម្មជាតិ និង ធនធានជីវៈចម្រុះ ជាពិសេសតម្លៃ និង ផលប្រយោជន៍នានា របស់វាសម្រាប់ជីវិតនៅលើភពផែនដី ។
ក្នុងនោះឯកឧត្តមក៏បានលើកពីស្ថានភាពនិង ទិដ្ឋភាពទូទៅរបស់ខេត្តសៀមរាប ដែលជាតំបន់ទេសចរណ៍វប្បធម៌ និង ធម្មជាតិ ដ៏មានតម្លៃរបស់កម្ពុជាហើយមានតំបន់ការពារធម្មជាតិចំនួន៥ គឺ តំបន់ការពារទេសភាពអង្គរ , ឧទ្យានជាតិភ្នំគូលែន , ដែនជម្រកសត្វ ព្រៃគូលែនព្រហ្មទេព និង ដែនជម្រកសត្វព្រៃបឹងពែរ ព្រមទាំងតំបន់ប្រើប្រាស់ច្រើនយ៉ាងបឹងទន្លេសាប ។ ម្យ៉ាងទៀត សន្និសិទលើកទី៦ នៅលើទឹកដីប្រវត្តិសាស្ត្រនេះ បានឆ្លុះបញ្ចាំងឲ្យឃើញពីកិច្ចសហការដ៏ល្អនិង ជិតស្និទ្ធ រវាងរាជរដ្ឋាភិបាល និង ដៃគូអន្តរជាតិនានានៅជុំវិញពិភពលោក ។
បន្ទាប់ពីចំណាប់អារម្មណ៍របស់លោកបណ្ឌិតKazuhiko Takeuchiនាយកនៃលេខាធិការដ្ឋាន IPSI និង សាកលវិទ្យាល័យ UNU-IAS រួចមក មានប្រសាសន៍នោះដែរឯ.ឧខៀវ មុតបានលើកឡើងថា វិបត្តិបរិស្ថានជា សកលជះឥទ្ធិពលអវិជ្ជមានមកលើយើងទាំងអស់គ្នា រួមទាំងប្រទេសកម្ពុជាផងដែរ ។ កម្ពុជាបានក្លាយជាសមាជិក សកម្មនៃអនុសញ្ញា សន្ធិសញ្ញា និង កិច្ចព្រមព្រៀងថ្នាក់សកល ថ្នាក់តំបន់ជាច្រើន ស្តីពីបរិស្ថាន និង ធនធានធម្មជាតិ ដើម្បីឈានដល់គោលដៅចុងក្រោយ នៃនិរន្តរភាពបរិស្ថាន និង ធនធានធម្មជាតិ និង ភាពធន់ទៅនឹងបម្រែ បម្រួលអាកាសធាតុ ។ អង្គសន្និសិទសកល IPSI លើកទី៦ នៅលើទឹកដីអង្គរ ដែលជាតំបន់ទេសភាពយ៉ាងសំខាន់ របស់កម្ពុជា ខាងវប្បធម៌ និង ធម្មជាតិដ៏សម្បូរបែប ដែលមានឧទ្យានជាតិភ្នំគូលែន , តំបន់បេតិកភណ្ឌពិភពលោក និង តំបន់ឋមនីយជីវមណ្ឌលបឹងទន្លេសាប ។
ឯ.ឧ ខៀវ មុត ក៏បានបញ្ជាក់ផងដែរថា កិច្ចប្រជុំអន្តរជាតិនេះ មិនត្រឹមបង្ហាពីសារៈសំខាន់នៃសង្គមដែលមានភាពសុខដុម ជាមួយធម្មជាតិប៉ុណ្ណោះទេ ថែមទាំងលើកទឹកចិត្តឲ្យ ការចូលរួមពេញលេញពីដៃគូពាក់ព័ន្ធ ពិសេសសហគមន៍មូលដ្ឋាន ក្នុងការបន្តកិច្ចប្រឹងប្រែងអភិរក្សធម្មជាតិ និង កិច្ចការពារវប្បធម៌ ខណៈពេលដែលជម្រុញដល់ការធ្វើឲ្យប្រសើរនូវជីវភាពរស់នៅរបស់ប្រជាជន ។
ឯកឧត្តមបាន បន្តទៀតថា កម្ពុជាទើបបានបញ្ចប់ការពិនិត្យឡើងវិញលើយុទ្ធសាស្ត្រ និង ផែនការសកម្មភាពជាតិ ស្តីពីជីវៈចម្រុះ ហើយគោលគំនិតរបស់យុទ្ធសាស្ត្រនេះ ក៏ត្រូវក្រសួងបរិស្ថានបានបញ្ចូលយ៉ាងជោគជ័យ ទៅក្នុងគំនិតផ្តួចផ្តើម សាតូយ៉ាម៉ា ។
ឯកឧត្តមរដ្ឋលេខាធិការក៏មានសង្ឃឹមជឿជាក់ថា គោលគំនិតនៃការផ្តួចផ្តើមសាតូយ៉ាម៉ា នឹងជួយឲ្យ ឈានដល់គោលដៅថ្មីៗ នៃការអភិវឌ្ឍន៍ប្រកបដោយចិរភាព តាមរយៈមធ្យោបាយផ្សព្វផ្សាយ ការគ្រប់គ្រងប្រកប ដោយចីរភាព និង ការអភិរក្សដីកសិកម្ម ព្រៃ ទីជម្រាល និង តំបន់ទេសភាពក្នុងប្រទេស និង ទូទាំងពិភពលោក ៕
ដោយ ៖ (លុច ណាម) សៀមរាប
