មណ្ឌលគីរី ៖ នៅម៉ោងជាង៦ល្ងាចថ្ងៃទី១១ ខែមករា ឆ្នាំ២០១៦ នៅចំណុចភូមិស្រែល្វី ឃុំស្រែខ្ទុម ស្រុកកែវសីមា បានទទួលអំណោយ និង ថវិកាមួយចំនួនពីសាខាកាកបាទក្រហមកម្ពុជាខេត្ត ដែលដឹកនាំដោយលោក ឡុង វិបុល នាយកសាខាកាកបាទក្រហមកម្ពុជាខេត្ត ព្រមទាំងសមាជិក សមាជិកាសាខា និងអនុសា ខាស្រុកកែវសីមា កាលពីព្រឹកថ្ងៃទី១២ ខែមករានេះ។
លោក ឡុង វិបុល នាយកសាខាកាកបាទក្រហមកម្ពុជាខេត្ត បានឲ្យដឹងថា បន្ទាប់ពី បានទទួលព័ត៌មានពីអនុសាខាស្រុកកែវសីមា កាលពីពេលល្ងាចថា មានក្រុមគ្រួសាររង គ្រោះដោយសារភ្លើងឆេះផ្ទះ ដូច្នេះក្រុមការងារសាខាកាកបាទក្រហមកម្ពុជាខេត្ត បាននាំ យកអំណោយមនុស្សធម៌ របស់កាកបាទក្រហមកម្ពុជា ដើម្បីចែកជូនដល់ដៃប្រជាពលរដ្ឋ ដែលរងគ្រោះអោយបានទាន់បេលវេលា ហើយលោក និងក្រុមការងារក៏បានចូលរួមសំ ដែងនូវភាពសោកស្តាយ ចំពោះក្រុមគ្រួសាររងគ្រោះដោយសារភ្លើងឆេះផ្ទះ។
លោកបានបញ្ជាក់ថា អំណោយដែលចែកជូនដល់ក្រុមគ្រួសារនាពេលនោះរួមមាន៖ អង្គរ ៥០គីឡូក្រាម សារុង០២ ក្រមា០២ មុង០២ ភួយ០២ កន្ទេល០២ តង់០២ ទឹកត្រី ទឹកស៊ីអ៊ីវ ប្រេងឆា មី ប៊ីចេង និងបានផ្តល់នូវថវិកាបន្ថែម២០ម៉ឺនរៀលផងដែរ។ លោកបានបន្ថែមថា អំណោយទាំងនេះមិនគ្រប់គ្រាន់ទេ តែអាចជួយដោះស្រាយនូវទុក្ខមួយគ្រាផងដែរ។
ទន្ទឹមនឹងនោះ ក្រុមគ្រួសាររងគ្រោះ ក៏បានថ្លែងអំណគុណដល់កាកបាទក្រហម កម្ពុជាផងដែរ ដែលបានចុះជួយទាន់ពេលវេលា ដើម្បីយកនូវគ្រឿងឧបភោគបរិភោគ មួយចំនួនដើម្បីជួយដោះទុក្ខដល់គ្រួសារបស់គាត់ គ្រាន់បានទប់ទល់មួយរយៈដែរ។
គួរបញ្ជាក់ថា ផ្ទះដែលត្រូវភ្លើងឆាបឆេះ ពន្លត់មិនទាន់នៅចំណុចខាងលើនោះ មានឈ្មោះ លោក ឈិន ឆៃ បឿន អាយុ៤៥ឆ្នាំ នឹងប្រពន្ធឈ្មោះ សឿន ហ៊ុំ អាយុ៣៥ ជាជនជាតិព្នង ផ្ទះរបស់គាត់មានទំហំ ៧គុណ៨ម៉ែត្រ ហើយគាត់ប្រកបរបរលក់ដូរ ចាបហួយ និងលក់សាំងជារបរបន្ទាប់បន្សំ គ្រាន់ចិញ្ចឹមគ្រួសារ តែដោយសារការធ្វេស ប្រហែស នៅពេលលក់សាំងនៅពេលយប់ គាត់បានអុចទៀនបំភ្លឺ វាល់ចាក់សាំងអោយគេ ក៏ត្រូវបានភ្លើងឆាបឆេះ ពន្លត់មិនទាន់ ឆេះគ្មានសល់តែម្តង៕
ដោយ ៖ គីម ចំរើន
