(ខេត្តកែប)៖ នៅព្រឹកថ្ងៃទី២១ ខែមករា ឆ្នាំ២០២០ រដ្ឋបាលខេត្តកែប បានរៀបចំពិធីប្រកាសចូលកាន់តំណែង ប្រធានមន្ទីរព័ត៌មានខេត្តកែប។ ពិធីនេះស្ថិតក្រោមអធិបតីដ៏ខ្ពង់ខ្ពស់ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន លោក កែន សត្ថា អភិបាល នៃគណៈអភិបាលខេត្តកែប និង លោក សំ សារីន ប្រធានក្រុមប្រឹក្សាខេត្ត។
ពិធីនេះ បានរៀបចំធ្វើឡើង នៅសាលប្រជុំធំសាលាខេត្តកែប ដោយមានការចូលរួមពីលោក លោកស្រី សមាជិកក្រុមប្រឹក្សាខេត្ត ថ្នាក់ដឹកនាំសាលាខេត្ត គណៈប្រតិភូអមដំណេីរ និងមន្ត្រី នៃមន្ទីរអង្គភាពពាក់ព័ន្ធ ក្នុងខេត្តយ៉ាងច្រើនកុះករ។
យោងតាមសេចក្តីប្រកាសស្ដីពី ការចូលកាន់តំណែងប្រធានមន្ទីរព័ត៌មាន លោក រស់ ឧត្តុង អនុប្រធានមន្ទីរព័ត៌មាន ត្រូវឡើងកាន់តំណែងជាប្រធានមន្ទីរព័ត៌មានខេត្តកែប ជំនួស លោក លៀវ ស៊ុនសារី ដែលត្រូវចូលនិវត្តន៍។
ក្នុងឱកាសនោះ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានកោតសរសើរវាយតម្លៃខ្ពស់ ចំពោះការខិតខំប្រឹងប្រែងរបស់លោក លៀវ ស៊ុនសារី ប្រធានមន្ទីរព័ត៌មានខេត្តកែបចាស់ កន្លងមកបានខិតខំអនុវត្តការងារ តាមភារកិច្ចរបស់ខ្លួន លេីការគ្រប់គ្រងទូរទស្សខ្សែកាប និង ប្រព័ន្ធផ្សព្វផ្សាយផ្សេងៗក្នុងខេត្ត
ដោយសម្រេចបាននូវលទ្ធផល និង សមិទ្ធផលរបស់មន្ទីរជាបន្តបន្ទាប់។
លោក ខៀវ កាញារីទ្ធ ក៏បានស្នើដល់ប្រធានមន្ទីព័ត៌មានខេត្តកែបថ្មី ត្រូវប្រកាន់ភ្ជាប់នូវសាមគ្គីជាធ្លុងមួយ សម្រេចបាននូវស្នាដៃបន្តទៀតក្នុងការអនុវត្ត និង គ្រប់គ្រងលេីជំនាញមន្ទីររបស់ខ្លួន ត្រូវគោរពនូវអភិក្រមរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ និងបាវចនាពីរបន្ថែមទៀត គឺកែទម្រង់ខាងក្នុង និងបង្កើនមិត្តខាងក្រៅ ពិសដសត្រូវខិតខំបំពេញការងារ សហការសាមគ្គីភាពផ្ទៃក្នុង ជាមួយមន្ទីរអង្គភាពពាក់ព័ន្ធក្នុងខេត្ត ត្រូវអនុវត្តនូវយុទ្ធសាស្ត្រ ការផ្សព្វផ្សាយព័ត៌មានរបស់ខេត្តក៏ដូចជារបស់រាជរដ្ឋាភិបាលកម្ពុជា លើការអភិវឌ្ឍន៍ ឱ្យស្របទៅតាមច្បាប់របស់ក្រសួងព័ត៌មាន ឲ្យមានប្រសិទ្ធិភាព តម្លាភាព ក្នុងការចូលរួមចំណែកអភិវឌ្ឍខេត្តឲ្យកាន់តែរីកចម្រើនបន្ថែមទៀត៕ សេង ណារិទ្ធ
