សកម្មភាពប្រព្រឹត្តបទល្មើសព្រៃឈើរបស់ឈ្មួញឈើឈ្មោះ គា ដែលកំពុងជ្រកក្រោមស្លាកក្រុមហ៊ុន TDC របស់លោកឧកញ៉ា ល័ក្ខ ហើយថ្លើមធំហ៊ានយកឈ្មោះនាយឧត្តមសេនីយ៍ ម្នាក់ទៅគំរាមអាជ្ញាធរមានសមត្ថកិច្ចត្រូវបានប្រជាពលរដ្ឋ និងសមត្ថកិច្ចមួយចំនួនរិះគន់កាន់តែខ្លាំងឡើងៗ។
ប្រជាពលរដ្ឋ និងសមត្ថកិច្ចជំនាញនៅខេត្តមណ្ឌលគិរី បានបញ្ជាក់ថា ឈ្មួញឈើឈ្មោះ គា បានយកឈ្មោះមន្ត្រីមានអំណាចទៅប្រព្រឹត្តបទល្មើសព្រៃឈើនៅក្នុងខេត្តមណ្ឌលគិរីដែលបញ្ហានេះបង្កការរាំងស្ទះដល់សមត្ថកិច្ចក្នុងការទប់ស្កាត់ និងបង្ក្រាបបទល្មើស។
បច្ចុប្បន្ននេះឈ្មោះ គា បានបង្កើនសកម្មភាពដឹកឈើចេញពីព្រៃការពារចំណុចភូមិប៉រប៉េត ឃុំក្រង់តេះ ស្រុកពេជ្រាដា ខេត្តមណ្ឌលគិរី ។
សមត្ថកិច្ចស្រុកពេជ្រាដា បានបញ្ជាក់ថា ឈ្មោះ គា បានយកឈ្មោះនាយឧត្តមសេនីយ៍ នៅក្រសួងការពារជាតិទៅប្រើដើម្បីការពារមុខរបរកាប់ព្រៃឈើ ។
ប្រភពដដែលបានបញ្ជាក់ថា មិនថាមាននាយឧត្តមសេនីយ៍ការពារឈ្មួញឈ្មោះ គា ពិតប្រាកដមែន ឬយ៉ាងណានោះទេ តែស្ថានភាពជាក់ស្តែង សមត្ថកិច្ចជំនាញមិនហ៊ានបង្ក្រាបសកម្មភាពប្រព្រឹត្តបទល្មើសព្រៃឈើរបស់ឈ្មួញឈ្មោះ គា នោះឡើយ។
សកម្មជនព្រៃឈើនៅខេត្តមណ្ឌលគិរីបានអះអាងថា សព្វថ្ងៃនេះ សកម្មភាពរបស់ឈ្មួញឈើឈ្មោះ គា បានប្រើរថយន្តដឹកឈើចេញពីព្រៃជ្រៅក្នុងស្រុកពេជ្រាដាក្នុងមួយថ្ងៃៗមិនតិចជាងពី១០ទៅ២០គ្រឿងទេដែលក្នុងនោះគេសង្កេតឃើញភាគច្រើនជាឈើសុក្រំមានមុខកាត់ចាប់៥០ទៅដល់៧០សង់ទីម៉ែត្រ។
ប្រភពដដែលបានបញ្ជាក់ថា កន្លងមកមានសមត្ថកិច្ចជំនាញធ្លាប់ឃាត់រថយន្តដឹកឈើរបស់ឈ្មួញឈ្មោះ គា ដែរ តែមួយរយៈចុងក្រោយនេះគ្មានទេ។
ចំពោះមុខបញ្ហានេះ ប្រជាពលរដ្ឋរស់នៅ ឃុំក្រង់តេះ ស្រុកពេជ្រាដា ខេត្តមណ្ឌលគិរី បានរិះគន់ថា សមត្ថកិច្ចជំនាញត្រូវតែបង្ក្រាបបទល្មើសព្រៃឈើ បើទោះជាជនប្រព្រឹត្តបទល្មើសជាអ្នកណា ឬមានអ្នកកាងពីក្រោយឋានៈខ្ពស់ប៉ុណាក៏ដោយ ព្រោះជាគោលការណ៍ច្បាប់គ្មានការលើកលែងនោះទេ។
ប្រភពដដែលបានបញ្ជាក់ថា បើសមត្ថកិច្ចមូលដ្ឋានមិនហ៊ានបង្ក្រាប គួរតែរាយការណ៍បញ្ហានេះទៅថ្នាក់លើ ដោយមិនត្រូវបណ្តែតបណ្តោយឲ្យជនល្មើសធ្វើសកម្មភាពបានយ៉ាងរលូនដូចសព្វថ្ងៃ ដែលបញ្ហានេះកំពុងបង្កការក្តៅក្រហាយដល់ប្រជាពលរដ្ឋមូលដ្ឋាន៕
ដោយ ៖ គឹម ចំរើន
