សម្លរបុក ឬប៉ូង របស់បងប្អូនជនជាតិដើមភាគតិចរស់នៅតំបន់ខ្ពស់រាបនាភាគឦសាន ជាម្ហូបអាហារដ៏ពេញនិយមសម្រាប់ប្រជាជនក្នុងតំបន់ ។ មិនត្រឹមតែជាម្ហូបអាហារបែបអ្នកស្រុកភ្នំប៉ុណ្ណោះទេ តែវាបាននឹងកំពុងទាក់ទាញការចាប់អារម្មណ៏ ពីភ្ញៀវទេសចរណ៏ជាខ្លាំងផងដែរ ។
លោក ពូ ផល្លា ដែលមានទីលំនៅក្នុងក្រុងសែនមនោរម្យបានឲ្យដឹងថា លោក ពូ បានមករស់នៅខេត្តមណ្ឌលគិរី ជាង ២០ ឆ្នាំមកហើយតាំងពីមិនទាន់មានផ្លូវធ្វើដំណើរដូចសព្វថ្ងៃឡើយ ។ ហើយលោកពូក៏ចេះធ្វើម្ហូបឈ្មោះ សម្លបុកឬប៉ូង យ៉ាងស្ទាត់ជំនាញ ព្រោះមុខម្ហូបនេះសម្បូរទៅដោយវិតាមីន ដោយសារគេប្រើសុទ្ឋសឹង បន្លែ បេះពីព្រៃធម្មជាតិថ្មីៗតែម្តង។
លោកពូបានបន្តថា គ្រឿងផ្សំសម្រាប់ស្លសម្លបុកឬប៉ូងរួមមាន សាច់យ៉ាវគោ(សាច់ស្វិត ឬសាច់ប្រភេទងៀតក៏បាន) ប្រហុក ចុងផ្តៅ ស្លឹកម្ទេស ត្រប់ស្រួយ ស្លឹកខ្ចូញ ស្លឹកជន្លង់ ទំពាំង …នឹងស្លឹករុក្ខជាតិបៃតងមួយចំនួនទៀត ហើយអ្វីដែលគេមិនអាចអត់បាននោះគឺ បំពង់ឬស្សីព្រៃ។លោកពូបានបញ្ជាកថា ឬស្សីព្រៃត្រូវរកឬស្សីដើមណា ដែលមានសាច់វែង(ថ្នាំងវែង)ធំ ទើបអាចស្លបាន នឹងជួយបង្កើនរសជាតិផង។
ចំពោះរបៀបនៃការស្ល គេត្រូវបេះបន្លែទាំងនោះលាងទឹកឲ្យស្អាត ហាន់សាច់ជាបន្ទះតូចៗ ជញ្ចាំប្រហុកឲ្យម៉ត់ រួចលាយគ្រឿងស្ករ សនឹងប៊ីចេងបន្តិច ចូលគ្នាក្នុងឆ្នាំងតែមួយ រួចញ៉ាត់គ្រឿងផ្សំតែនោះចូលទៅក្នុងបំពង់ឬស្សីដែលគេត្រៀមទុក នឹងយកទៅដុតក្នុងភ្លើងប្រមាណជិត១ម៉ោងជាការស្រាច់។
សម្លប្រភេទនេះ គេសង្កេតឃើញភ្ញៀវទេសចរណ៏បរទេស ចូលចិត្តឲ្យមគ្គុទេសទេសចរណ៏ ដែលនាំពួកគេដើរលេងកម្សាន្តក្នុងព្រៃ ស្លឲ្យហូបនៅតាមមាត់អូរក្នុងព្រៃ នឹងកន្លែងដែលសម្បូរបន្លែធម្មជាតិ៕
ហេង ចាន់ណុប
