បែកធ្លាយទៀតហើយ ស្ថានីយជញ្ជីងថ្លឹងរថយន្តអូរចំណារប្រព្រឹត្តអំពើពុករលួយយ៉ាងសម្បើមដៃតែម្តង តាមរយៈការជញ្ជក់ឈាមរាស្ត្រជាមួយនឹងការទាមទារបង់ថ្លៃបាយទឹកនិងការគំរាមផាកពិន័យអូសរថយន្តយកទៅក្រសួង និង មន្ទីរសាធារណៈការ និងដឹកញ្ជូន ។
សេចក្តីរាយការណ៍បានឲ្យដឹងថា ស្ថានីយជញ្ជីងអូរចំណារបានបើកដៃការឲ្យកូនប្រព្រឹតអំពើពុករលួយទាំងបើកចំហរ ហើយសំអាងថា ជាគោលការណ៍អនុញ្ញាតិដែលក្រសួងសាធារណៈ និងដឹកជញ្ជូន ដើម្បីដោះស្រាយបាយទឹកប្រចាំថ្ងៃ ។
សេចក្តីរាយការណ៍បានបន្ថែមថា ស្ថានីយជញ្ជីងអូរចំណារមួយនេះ គឺរកបានចំណូលក្រៅប្រពន្ធ័បានយ៉ាងសន្ធឹកសន្ធប់ ពីរថយន្តបង់ថ្លៃបាយទឹកថ្លៃជញ្ជីង ដោយលើសមួយតោនតម្លៃ ១០,០០០រៀល តែបើលើចាប់ពី ៣តោនឡើងទៅត្រូវផាកពិន័យ១តោន ១០០,០០០រៀល បើលើ៥តោន គុណនិង៣០០,០០០រៀល ស្មើ ១,៥០០,០០០រៀល ហើយក៏មានរថយន្តដាក់ខែផងដែរ ដោយក្នុងមួយខែត្រូវបង់មុនចាប់ពី១៥០ដុល្លារ ដល់២៥០ក្នុងមួយខែ សំរាប់រថយន្តមួយគ្រឿង តាមតម្លៃនៃទម្ងន់ផ្ទុកលើស ។
សេចក្តីរាយការណ៍បានបន្តថា លោកប្រធានជញ្ជីងអូរចំណារ បានតម្រូវឲ្យរថយន្តបង់ថ្លៃបាយទឹកលើសចំនួន២តោន បង់១តោន ១០,០០០រៀល តែបើលើសចាប់ពី៣តោនឡើងទៅត្រូវបង់ថ្លៃបាយទឹកតាមកំណត់របស់មន្ត្រីស្ថានីយជញ្ជីងនេះទាមទារ ហើយបើលើសចាប់ពី៥តោនឡើងទៅ និងគំរាមចាប់អូសយកទៅក្រសួងសាធារណៈការ និងដឹកជញ្ជូន ឬមន្ទីរមិនខាន ។
សេចក្តីរាយការណ៍បានបញ្ជាក់ថា ប៉ុន្តែផ្ទុយទៅវិញ បើសិនជារថយន្តបានបង់ខែហើយនោះ រថយន្តនោះអាចដឹកលើសតោនបានតាមចិត្ត តាមតម្លៃដែលបានព្រមព្រៀងខែគ្នា ចាប់ពី១៥០ដុល្លារក្នុងមួយខែ រហូតល់២៥០ដុល្លារមួយខែ ហើយត្រូវបានក្រុមរថយន្តដឹកជញ្ជូនមួយចំនួនត្អូញត្អែថា ស្ថានីយជញ្ជីងអូរចំណារ គឺជាស្ថានីយជញ្ជីងគៀបសង្កត់ញើសឈាមរាស្ត្រជាងគេ ក្នុងចំណោមជញ្ជីងគៀបសង្កត់រាស្ត្រមានចំនួន២កន្លែង តាមបណ្តោយផ្លូវជាតិលេខ៤នេះ ។
មហាជនបានលើកឡើងថា បើនេះជាគោលការណ៍អនុញ្ញាតិឲ្យរថយន្តដឹកលើសបានប៉ុណ្ណឹងដដែល ហេតុអ្វីចំបាច់ត្រូវទារលុយបាយទឹកពីរថយន្តដឹកជញ្ជូន ហើយតាមការកំណត់របស់ស្ថានីយជញ្ជីងទៀត? តើនេះជាករណីអំពើពុករលួយដែរឬទេ? ហើយបើជាគោលការណ៍ក្រសួងសាធារណៈការ និងដឹកជញ្ជូន គិតថ្លៃបាយទឹកសំរាប់មន្ត្រីស្ថានីយជញ្ជីងចុះអង្គភាពដ៏ទៃ តើគេគិតដូចគ្នាដែរទេ? បើតែយ៉ាងនេះតើប្រទេសជាតិនិងក្លាយទៅជាយ៉ាងណាវិញ ? នេះបានក្រុមរថយន្តដឹកជញ្ជូនលើកឡើងថា រកស៊ីមិនចិញ្ចឹមគ្រួសារឯក តែបែរជាចិញ្ចឹមគ្រួសារអ្នកដ៏ទៃពិតប្រាកដមែន! ព្រោះគេអង្គុយស្ងៀមចំយកតែលុយមិនពិបាក់ទេ ។
សេចក្តីរាយការណ៍បានបញ្ជាក់ថា បើតាមរចនាសម្ព័ន្ធការគ្រប់គ្រងជញ្ជីង ប្រធានស្ថានីយជញ្ជីង គឺជាតំណាងរបស់ខេត្តហើយអនុប្រធាន គឺជាតំណាងរបស់ក្រសួងសាធារណៈការ និងដឹកជញ្ជូន ក្រោមឳវាទរបស់លោក សេង ឈួន រដ្ឋលេខាធិការក្រសួងសាធារណៈការ និងដឹកជញ្ជូន ទទួលបន្ទុកគ្រប់គ្រងជញ្ជីងទូរទាំងប្រទេស ។ ហើយកញ្ចប់ប្រចាំខែរបស់ស្ថានីយជញ្ជីង គឺនៅក្រោមការប្រមូលរបស់លោកអនុប្រធានស្ថានីជញ្ជីង និងធ្វើការបែងចែកប្រចាំខែ ។
មតិរិះគន់បានលើកឡើងថា តើកញ្ចប់ប្រចាំខែនោះលោក សេង ឈួន រដ្ឋលេខាធិការក្រសួងសាធារណៈការ និងដឹកជញ្ជូន បានទទួលប៉ុន្មានក្នុងមួយខែៗ បានជាលោកប្រធានស្ថានីយជញ្ជីងអូរចំណារហ៊ានបើកឲ្យកូនចៅប្រព្រឹតអំពើពុករលួយទាំងបើកចំហរបែបនេះ ។
ជុំវិញព័ត៌មានខាងលើនេះ ទូរទស្សន៍អនឡាញ អឹម អេស ព្យាយាមទំនាក់ទំនងសុំការបំភ្លឺពីលោកប្រធានមន្ទីរសាធារណៈការ និងដឹកជញ្ជូន ខេត្តព្រះសីហនុ មិនទាន់បាននៅឡើយទេនៅពេលនេះ។
