ខេត្តមណ្ឌលគិរី ៖ កាលពីយប់ថ្ងៃទី៣១ ខែធ្នូ ឆ្នាំ២០១៥ ត្រូវបានប្រជាសហគមន៍ ចាប់ឃាត់ គោយន្តកែច្នៃ ដឹកឈើ ២គ្រឿង នៅត្រង់ចំណុចអូរបុល ស្ថិតក្នុងស្រុកអូររាំង ជិតប៉ុស្តិ៍នគរបាលការពារព្រំដែន ឡាំប៉ឹក ក្រោមការគ្រប់គ្រង របស់មេវរ:ការពារ ព្រំដែន គោកលេខ៦២១។
ប្រជាសហគមន៍ បានឱ្យដឹងទៀតថា ក្រុមជនជាតិវៀតណាមទាំងនោះ ឆ្លងមកដឹកឈើក្នុងដីខ្មែរ តាមប៉ុស្តិ៍ ឡាំប៉ឹក ដែលមានមុន្ត្រីប៉ូលិសឈ្មោះ ប្រាក់ ភារម្យ ជានាយប៉ុស្តិ៍នៅទីនោះ ក្រោមការគ្រប់គ្រង របស់លោក គេង សុភាន់ មេវរះការពារព្រំដែន លេខ៦២១។
ប្រជាសហគមន៍បានបន្តទៀតថា ពួកជនជាតិវៀតណាម ចូលដឹកឈើបានដោយរលូន ក៏ដោយសារមានការ ជ្រោមជ្រែងពី លោក អ៊ុក ណាខៃ ជាមន្ត្រីយោធាផងដែរ។ សហគមន៍ទាំង៧ នៅឃុំប៊ូស្រា ស្រុកពេជ្រាដា ខេត្តមណ្ឌលគិរី បានរាយការណ៍ និងប្តឹងមកអង្គការអាដហុក ស្នើសុំឱ្យចុះស៊ើបអង្កេត និង អន្តរាគមន៍បន្ទាន់ ទៅស្ថាប័នតុលាការ ដើម្បីស្វែងរកចាប់ជនល្មើស មកផ្តន្ទាទោស។
ប្រជាសហគមន៍អះអាងថា ជនជាតិវៀតណាមច្រើននាក់ បានចូលមកទឹកដីខ្មែរ កាប់ឈើខុសច្បាប់ កាលថ្ងៃទី៣១ ខែធ្នូ ឆ្នាំ២០១៥ ម៉ោងប្រហែល ១១យប់ ក្នុងព្រៃសហគមន៍ នៅចំណុចតំបន់អូរពុល ស្ថិតក្នុងឃុំដាក់ដាំ ស្រុកអូររាំង ខេត្តមណ្ឌលគិរី។ នៅក្នុងប្រត្តិបត្តិការនេះ កំលាំងសហគមន៍ ការពារដីព្រៃ ក្នុងតំបន់នោះ ធ្វើការឃាត់បាន គោយន្តដឹកឈើ ចំនួន ២គ្រឿង រណាយន្ត ៤គ្រឿង ព្រមទាំងម៉ូតូ ១គ្រឿង ចំណែកជនបង្ក រត់គេចខ្លួនបាត់ស្រមោល។
សារព័ត៌មានយើងពុំអាចសុំការបំភ្លឺពីលោក អ៊ុក ណាខៃ មេវរ:ការពារព្រំដែនគោកលេខ៦២១ បាននោះទេ ព្រោះគ្មាន លេខទូរស័ព្ទ ៕
