ខេត្តក្រចេះ ៖ កាលពីវេលាម៉ោង ៨និង០០ នាទី យប់ថ្ងៃទី៣០ ខែធ្នូ ឆ្នាំ២០១៥ រថយន្តយីឌុបភ្លៅ ៥ ដែលគេស្គាល់ថា ជារថយន្តរបស់លោកឧកញ៉ា ថៃ បានក្រឡាប់ នៅចំណុចមុខវត្តស្រែត្រែង ភូមិក្បាលដំរី ឃុំសណ្តាន់ ស្រុកសំបូរ ខេត្តក្រចេះ តាមផ្លូវជាតិលេខ៧ ចាក់ឈើប្រណិតចោលពេញផ្លូវ មិនឃើញសមត្ថកិច្ច ឬមន្ត្រីជំនាញ ចុះទៅត្រួតពិនិត្យនោះឡើយ។
ក្រោយពេលក្រឡាប់ភ្លាមៗ មេការរបស់លោកឧកញ៉ា ថៃ ឈ្មោះ ធី ភ័យស្លន់ស្លោ ព្រោះខ្លាចដឹង ដល់អ្នកសារព័ត៌មាននិងសមត្ថកិច្ចមួយចំនួន ដែលមិនទាន់ទទួលបានសំណូក ទើបឈ្មោះ ធី បានទាក់ទង ទៅសមត្ថកិច្ចជំនាញ រួមទាំងអាជ្ញាធរ និងអ្នកសារព័ត៌មាន ដែលធ្លាប់ទទួលបានលាភសក្ការះ ឱ្យជួយបិទបាំង ព័ត៌មានខាងលើនេះ តែទោះជាយ៉ាងនា ដំរីងាប់យកចង្អេរទៅបាំង គឺមិនអាចបាំងជិត នោះឡើយ ។ លើសនេះទៅទៀត រថយន្តយីឌុប របស់លោកឧកញ៉ា ថៃ មិនគ្រាន់តែដឹកឈើប្រណិត ខុសច្បាប់ប៉ុណ្ណោះទេ ប៉ុន្តែថែមទាំង ដឹកលើសទម្ងន់ បំផ្លាញផ្លាញផ្លូវជាតិលេខ៧ ស្ទើរខូចខាតទាំងស្រុង ប៉ុន្តែមិនទាន់ឃើញ អាជ្ញាធរ ឬសមត្ថកិច្ច ចាត់វិធានការនោះឡើយ។
សេចក្តីរាយការណ៍បានឱ្យដឹងថា រថយន្តយីឌុបភ្លៅ៥ របស់លោកឧកញ៉ា ថៃ បានក្រឡាប់ ហើយក្អួតចេញសុក្រំ រាប់រយម៉ែត្រគូប ហើយគេមិនទាន់ដឹង អំពីមូលហេតុ នៃការក្រឡាប់នោះទេ គ្រាន់តែដឹងថា រថយន្តដឹកឈើប្រណិត របស់លោកឧកញ៉ា ថៃ គឺបើកចេញពីច្រកតុងមិន សំដៅទៅស្រុកមេមត់ និងឆ្ពោះទៅលក់ នៅប្រទេសវៀតណាម ហើយឈើទាំងអស់នេះ សុទ្ធតែជាឈើខុសច្បាប់ ។
គួររំលឹកផងដែរថា ក្រុមហ៊ុនរបស់លោកឧកញ៉ា ថៃ តាមរយៈមេការឈ្មោះ ធី បានប្រកបរបរជំនួញឈើខុសច្បាប់ ក្នុងទឹកដីនៃភូមិភាគឥសាន្តយូរឆ្នាំមកហើយ ពុំដែលមានសមត្ថកិច្ច ណាហ៊ានប៉ះ ឬបង្ក្រាបបានទេ ? ព្រោះតែពួកគេបានទទួលសំណែន ពីមេការឈ្មោះ ធី គ្រប់ៗគ្នា ។
សារព័ត៌មានយើងពុំអាចសុំការបំភ្លឺពីបុគ្គលពាក់ព័ន្ធខាងលើបានទេ ព្រោះគ្មានលេខទូរស័ព្ទ ៕
