(ខេត្តកែប)៖ នៅព្រឹកថ្ងៃទី៣១ ខែធ្នូ ឆ្នាំ២០១៩នេះ រដ្ឋបាលខេត្តកែប បានរៀបចំព្រឹត្តិការណ៍ប្រណាំងទូកផ្កាចារសមុទ្រ ដើម្បីអបអរសាទរបុណ្យឆ្លងឆ្នាំសកល(២០១៩-២០២០) និងអបអរសាទរខួបលើកទី៤១ នៃទិវាបុណ្យជាតិ (៧មករា ១៩៧៩, ៧មករា ២០២០)។
ពិធីនេះបានប្រព្រឹត្តឡើងក្រោមអធិបតីភាព លោក កែន សត្ថា អភិបាល នៃគណៈអភិបាលខេត្តកែប លោក គឹម ទូច រដ្ឋលេខាធិកាក្រសួងឧស្សាហកម្ម និងសិប្បកម្ម លោកសំ សារីន ប្រធានក្រុមប្រឹក្សាខេត្ត និងអស់លោកជាសមាជិកព្រឹទ្ធសភា លោក លោកស្រី សមាជិកក្រុមប្រឹក្សាខេត្ត អភិបាលរងខេត្ត លោកស្នងការនគរបាលខេត្ត លោកមេបញ្ជាការកម្លាំងប្រដាប់អាវុធ ក្រុមយុវជនទាំងបី និងក្រុមកីឡាអុំអូកជាច្រើននាក់។
លោក កែន សត្ថា អភិបាលខេត្តកែបបានគូសបញ្ជាក់ថា ព្រឹត្តិការណ៍ប្រណាំងទូកឆ្នាំនេះ ពិតជាបានភាពអធិកអធម គគ្រឹកគគ្រេង ដោយមានទូកច្រើនគូរចូលរួមប្រណាំង មានកីឡាអុំទូកដ៏ច្រើនកុះករ ដោយការប្រណាំងនេះតម្រូវឱ្យមានការប្រជែងយកចំណាត់ថ្នាក់ ជ័យលាភី ដើម្បីទទួលយករង្វាន់លើកទឹកចិត្តទាំងអស់គ្នា។
លោកអភិបាលខេត្តបានបញ្ជាក់ទៀតថា ស្ថិតក្រោមដំបូលនៃសុខសន្តិភាព ក្រោមការដឹកនាំប្រកបដោយគតិបណ្ឌិតខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឱ្យបណ្តាខេត្តរាជធានីទាំងអស់មានការអភិវឌ្ឍន៍រីកចម្រើនគ្រប់វិស័យ ពិសេសបានបង្កភាពសប្បាយរីករាយដល់ប្រជាពលរដ្ឋនៅទូទាំងខេត្តកែប ដែលពួកគាត់បានមកទស្សនាការប្រណាំងទូកផ្កាចារសមុទ្រនាព្រឹកនេះផងដែរ។
ជាមួយគ្នានេះ លោកអភិបាលខេត្ត ក៏សូមថ្លែងអំណរគុណយ៉ាងជ្រាវជ្រៅ ចំពោះសម្តេចតេជោ ហ៊ុន សែន ដែលបានផ្តួចផ្តើមគំនិតឱ្យគណៈកម្មការអន្តរក្រសួង ក៏ដូចជាសហភាពសហព័ន្ធកីឡាកម្ពុជា ដើម្បីបង្កើតព្រឹត្តិការណ៍ប្រណាំងទូក និងព្រឹត្តិការណ៍ប្រណាំងកង់ ដែលមានរយៈពេលបីថ្ងៃ ហើយត្រូវចាប់ផ្តើមនៅថ្ងៃទី០៤ រហូតដល់ថ្ងៃទី០៦ ខែមករា ឆ្នាំ២០២០ខាងមុខនេះ។
សូមជម្រាបថា ពិធីប្រណាំងទូកនៅឆ្នេរលេងទឹកខេត្តកែបក្នុងឆ្នាំនេះមានទូកប្រភេទផ្កាចារសមុទ្រចំនួន៣៧ទូក។ក្នុងចំណោមនោះ ទូកទទួលបានចំណាត់ថ្នាក់ ជ័យលាភីលេខ១ មានចំនួន១១ទូក ទូកទទួលបានជ័យលាភី ចំណាត់ថ្នាក់លេខ២ មានចំនួន០៩ទូក និងទូកជាប់ចំណាត់ថ្នាក់លេខ៣ មានចំនួន១៥ទូក៕ សេង ណារិទ្ធ
