(ខេត្តកែប)៖ ដើម្បីអបអរសាទរបុណ្យឆ្លងឆ្នាំសកល ២០១៩-២០២០ និងអបអរសាទរខួបលើកទី៤១ នៃទិវាជ័យជម្នះ (ថ្ងៃ៧ មករា ឆ្នាំ១៩៧៩- ៧មករា ឆ្នាំ២០២០) រដ្ឋបាលខេត្តកែប បានរៀបចំពិធីបង្ហើរខ្លែងខ្មែរ ប្រចាំឆ្នាំ២០១៩ ដែលពិធីនេះ បានប្រព្រឹត្តឡើងនៅក្នុងបរិវេណ កីឡដ្ឋានខេត្តកែប ក្រោមអធិបតីភាព លោក កែន សត្ថា អភិបាល នៃគណៈអភិបាលខេត្តកែប និងលោក សំ សារីន ប្រធានក្រុមប្រឹក្សាខេត្ត ព្រមទាំងមានការចូលរួមពីសំណាក់ លោក លោកស្រី សមាជិកក្រុមប្រឹក្សាខេត្ត អភិបាលរងខេត្ត លោក លោកស្រី ប្រធានមន្ទីរអង្គភាពជំនាញក្នុងខេត្ត ក្រុមយុវជនទាំងបី លោកគ្រូ អ្នកគ្រូ និងសិស្សានុសិស្សយ៉ាងច្រើនកុះករ។
តាមរបាយការណ៍របស់ លោក តុង ភោ ប្រធានមន្ទីរវប្បធម៌ និងវិចិត្រសិល្បៈខេត្តកែប បានឱ្យដឹងថា ជារៀងរាល់ឆ្នាំក្រសួងវប្បធម៌ និងវិចិត្រសិល្បៈ បានប្រារព្ធមហោស្រពបង្ហើរខ្លែងខ្មែរក្នុងក្របខណ្ឌទូទាំងប្រទេសបានចំនួន២៣លើករួចមកហើយ(គិតត្រឹមឆ្នាំ២០១៩នេះ) ក្នុងនោះមន្ទីរក៏បានដឹកនាំប្រតិភូខ្លែងរបស់ខេត្ត ទៅចូលរួមមហោស្រពថ្នាក់ជាតិ ដោយទទួលបានចំណាត់ថ្នាក់ជ័យលាភីជាបន្តបន្ទាប់ផងដែរ ហើយការបង្ហើរខ្លែងក្នុងឆ្នាំ២០១៩នេះ មានខ្លែងគ្រប់ប្រភេទមកចូលរួមបង្ហើរសរុបចំនួន ១៥៧ ក្នុងនោះខ្លែងឯកមានចំនួន២៧ និងខ្លែងច្នៃប្រឌិតមានចំនួន១៣០។
មានមតិសំណេះសំណាលក្នុងឱកាសនោះ លោក កែន សត្ថា អភិបាលខេត្ត បានបញ្ជាក់ថា ការបង្ហើរខ្លែងខ្មែរក្នុងពេលនេះ មានលក្ខណៈប្រកួតប្រជែងផង និងការបង្ហើរកំសាន្តសប្បាយផង គឺក្នុងគោលបំណងថែរក្សានូវវប្បធម៌ ប្រពៃណី ទនៀមទម្លាប់ ដ៏ល្អផូរផង់របស់ជាតិយើង ដើម្បីជំរុញលើកកម្ពស់វិស័យទេសចរណ៍ខេត្ត និងបង្កការសប្បាយរីករាយដល់ប្រជាពលរដ្ឋ និងភ្ញៀវទេសចរណ៍ជាតិ-អន្តរជាតិ ក្នុងឱកាសបុណ្យឆ្លងឆ្នាំសកល និងអបអរសាទរទិវាបុណ្យជាតិ ៧មករា ខួបលើកទី៤១។
សូមបញ្ជាក់ថា ការបង្ហើរខ្លែងខ្មែរប្រចាំឆ្នាំ២០១៩នេះ ខ្លែងដែលទទួលចំណាត់ថ្នាក់ជ័យលាភី លេខ១(ខ្លែងឯក) គឺខ្លែងរបស់មន្ទីរវប្បធម៌ និងវិចិត្រសិល្បៈខេត្តកែប។ចំណែកខ្លែងជាប់ចំណាត់ថ្នាក់លេខ២(ខ្លែងឯក) ជារបស់មន្ទីរធម្មការ និងសាសនាខេត្តកែប។ ដោយឡែក ខ្លែងដែលជាប់ចំណាត់ថ្នាក់លេខ៣(ខ្លែងឯក) បានទៅមន្ទីរអប់រំ យុវជន និងកីឡាខេត្តកែប៕ សេង ណារិទ្ធ
