(ខេត្តកែប)៖ នៅព្រឹកថ្ងៃទី២៦ ខែធ្នូ ឆ្នាំ២០១៩ ស្នងការដ្ឋាននគរបាលខេត្តកែប បានបើកកិច្ចប្រជុំដើម្បីត្រៀមទទួលព្រឹត្តិការណ៍ប្រណាំងកង់ពិភពលោកនៅតំបន់ឆ្នេរសមុទ្រកម្ពុជា លើកទី១ ដែលនឹងប្រព្រឹត្តទៅនៅដើមខែមករា ឆ្នាំ២០២០ ដោយកិច្ចប្រជុំនេះបានធ្វើឡើងនៅសាលប្រជុំធំស្នងការដ្ឋាននគរបាលខេត្តកែប ក្រោមអធិបតីភាពដ៏ខ្ពង់ខ្ពស់ នាយឧត្តមសេនីយ៍ ទូច ណារ៉ុថ អគ្គស្នងការរង និងជាប្រធាននាយកដ្ឋានអង្គរក្ស និងមានការអញ្ជើញចូលរួមពីលោក លោកស្រីជាប្រតិភូអមដំណើរ លោក លោកស្រីតំណាងរដ្ឋបាលខេត្តទាំង៤ខេត្ត (កោះកុង ព្រះសីហនុ កំពត កែប) លោកឧត្តមសេនីយ៍ ស្នងការ និងតំណាងស្នងការខេត្តទាំង៣ និងបណ្តាអង្គភាព ស្ថាប័នពាក់ព័ន្ធសរុបចំនួន៩៥នាក់។
ក្នុងឱកាសនោះ នាយឧត្តមសេនីយ៍ ទូច ណារ៉ុថអគ្គស្នងការរង បានមានប្រសាសន៍ទៅកាន់អង្គប្រជុំថា ព្រឹត្តិការណ៍ប្រណាំងកង់ពិភពលោកនឹងធ្វើឡើងក្នុងរយៈពេលបីថ្ងៃចម្ងាយផ្លូវ៤៧៤គីឡូម៉ែត្រ៖ ថ្ងៃទី៤ ខែមករា ឆ្នាំ២០២០ ការប្រណាំងនឹងចាប់ចេញដំណើរពីតារាសាគរឆ្ពោះទៅខេត្តកោះកុងដោយបញ្ចប់នៅមុខសាលាខេត្តកោះកុង។ ថ្ងៃទី៥ ខែមករា ឆ្នាំ២០២០ ចាប់ចេញដំណើរពីរង្វង់មូលសាយភូ ថងកាត់តាមវាលរេញចុះមកកាន់ផ្លូវជាតិលេខ៣ រួចឡើងទៅកំពូលភ្នំបូកគោ។
ថ្ងៃទី៦ ខែឆ្នាំ ដដែល ជាថ្ងៃចុងក្រោយ ក្រុមកីឡាករត្រូវចេញដំណើរពីជើងភ្នំបូកគោកាត់តាមរង្វង់មូលរូបសំណាកផ្លែទុរេនក្រុងកំពត និងបន្តតាមផ្លូវជាតិលេខ៣៣ សំដៅទៅខេត្តកែបដោយជិះព័ទ្ធជុំវិញភ្នំកែប លើផ្លូវជាតិលេខ៣៣ និង៣៣A ចំនួនប្រាំជុំផ្តាច់ព្រ័តនៅមុខសាលាខេត្តកែប។
នាយឧត្តមសេនីយ៍ ទូច ណារ៉ុថ បានបញ្ជាក់ផងដែរថា ព្រឹត្តិការណ៍ប្រណាំងកង់នេះ គឺ ជាការលើក កិត្យានុភាព ជាតិ និង កិត្តិយស ប្រទេស ជាតិ ដោយ ត្រូវ ធានា ឲ្យ បាន ដាច់ខាត នូវ សន្តិសុខ សុវត្ថិភាព សណ្តាប់ធ្នាប់ សាធារណៈ នៃ ព្រឹត្តិការណ៍ប្រណាំងកង់ពិភពលោក លើកទី១ និង ធានា ការពារ ឲ្យ បានជូន ឥស្សរជន ជាន់ខ្ពស់ ជាតិ – អន្តរជាតិ ព្រមទាំង គណៈប្រតិភូ កីឡាក ដែល អញ្ជើញ ចូលរួម ក្នុង ក្នុងព្រឹត្តិការណ៍ខាងលើនេះ ឱ្យបានជោគជ័យ៕ សេង ណារិទ្ធ
