(ខេត្តកំពត) នៅព្រឹក ថ្ងៃសុក្រ ៩រោច ខែមិគសិរ ឆ្នាំកុរ ព.ស ២៥៦៣ ត្រូវនឹងថ្ងៃទី២០ ខែធ្នូ ឆ្នាំ២០១៩ លោក ជាវ តាយ អភិបាលនៃគណៈអភិបាលខេត្តកំពត បានចូលរួមក្នុងកិច្ចប្រជុំត្រួតពិនិត្យផែនការការពារសន្តិសុខ ជូនសម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រ និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន អញ្ជើញជាអធិបតីភាព ក្នុងពិធីបុណ្យសមុទ្រកម្ពុជា លើកទី៨ ជុំទី២ ឆ្នាំ២០១៩ នៅខេត្តកំពត ក្រោមអធិបតីភាព នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង និងក៏មានការចូលរួមពី លោកអភិបាលរងខេត្ត កងកម្លាំងគ្រប់ប្រភេទ ប្រធានមន្ទីរអង្គភាពជុំវិញខេត្ត សរុបប្រមាណ៦០នាក់។
ដោយឡែក នៅព្រឹកថ្ងៃដដែល គណៈកម្មការអន្តរក្រសួង និងអនុគណៈកម្មការខេត្តកំពត ក៏បានរៀបចំការប្រកួតកីឡារត់ប្រណាំង ដើម្បីអបអរពិធីបុណ្យសមុទ្រកម្ពុជា លើកទី៨ ជុំទី២ ឆ្នាំ២០១៩ ក្រោមការអញ្ជើញចូលរួម ពីសំណាក់ លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងលោក បុឹល កុសល អភិបាលរងខេត្តកំពត។ពិធីរត់ប្រណាំងនេះក៏មានការចូលរួមពីអាជីវករ លោកគ្រូ អ្នកគ្រូសិស្សានុសិស្ស និងប្រជាពលរដ្ឋប្រមាណជាង២០០នាក់ផងដែរ។
សូមបញ្ជាក់ផងដែរថា នៅព្រឹកថ្ងៃទី២០ ខែធ្នូ ឆ្នាំ២០១៩ ដែលជាថ្ងៃចាប់ផ្តើម នៃពិធីបុណ្យសមុទ្រ គេសង្កេតឃើញក្រុមអ្នកទេសចរណ៍ ពិសេសប្រជាពលរដ្ឋនៅតាមបណ្តាខេត្តឆ្ងាយៗ នាំក្រុមគ្រួសារធ្វើដំណើរមកលេងកម្សាន្តនៅក្នុងខេត្តកំពតយ៉ាងច្រើនស្អេកស្កះ ដើម្បីចូលរួមសប្បាយក្នុងពិធីបុណ្យសមុទ្រលើកទី៨ ជុំទី២ ឆ្នាំ២០១៩ ដែលខេត្តកំពតបានធ្វើជាម្ចាស់ផ្ទះនោះ៕ សេង ណារិទ្ធ
