ខេត្តប៉ៃលិន ៖ បុរសម្នាក់បានស្លាប់ពេលបញ្ជូនមកសង្គ្រោះនៅមន្ទីរពេទ្យបង្អែកខេត្ត ប៉ៃលិនដោយសារតែបើកបរម៉ូតូលឿនពេកជ្រុកទៅបុកគូទគោយន្តកន្ត្រៃ ពេញទំហឹងខណៈពេលកំពុងធ្វើដំណើរ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោងប្រមាណ ជា៦ ល្ងាចថ្ងៃទី០៦ ខែធ្នូ ២០១៤ស្ថិតនៅតាមបណ្តោយផ្លូវក្រួសក្រហមពីស្រុកសាលាក្រៅទៅឃុំ ស្ទឹងត្រង់ស្ថិត ក្នុងភូមិទំនប់ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
មន្ត្រីប៉ូលិសចរាចណ៍ស្រុកសាលាក្រៅបានឱ្យដឹងថាបុរសបុរសរងគ្រោះ ឈ្មោះ គង់ ប៊ុនធាហៅស្មាច់ ភេទប្រុស អាយុ៣១ឆ្នាំមុខរបរជាកសិករមានស្រុកកំណើតនៅភូមិចំការសំរោងពីរ ឃុំចំការសំរោង ស្រុកបាត់ដំបងខេត្តបាត់ដំបង បច្ចុប្បន្នរស់នៅភូមិទួល ឃុំសាលាក្រៅ ស្រុកសាលាក្រៅរងរបួសបែកក្បាលផ្នែកខាងមុខ និងរបួសទ្រូងធ្ងន់ធ្ងរ ស្លាប់ពេលបញ្ជូនមកសង្គ្រោះនៅមន្ទីរ ពេទ្យ បង្អែកខេត្តប៉ៃលិន។ជនរងគ្រោះបើកបរម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០០៣ ពាក់ស្លាកលេខភព១ -៨៧០៩ ម៉ូតូរងការខូចខាតផ្នែកខាងមុខទាំងស្រុង ។ចំណែកអ្នកបើកគោយន្តកន្ត្រៃ ឈ្មោះ ឆុន ឈូ ភេទប្រុស អាយុ៣១ឆ្នាំរស់នៅភូមិកើតហេតុខាងលើ គ្មានរងរបួសទេ ។
ប្រជាពលរដ្ឋដែលរស់នៅក្បែរកន្លែងកើតហេតុបាននិយាយថាមុនពេលកើតហេតុ គេឃើញបុរសម្នាក់បើកបរគោយន្តកន្ត្រៃតាមផ្លូវក្នុងទិសដៅពីកើតទៅ លិច លុះមកដល់ចំណុចកើតហេតុស្រាប់តែមានបុរសម្នាក់ជិះម៉ូតូមកបុកគូទ គោយន្តកន្ត្រៃរបស់ពេញទំហឹងបណ្តាលបែកក្បាល សន្លប់បាត់ស្មារតីនៅនឹងកន្លែងហើយក៏ត្រូវបានម្ចាស់គោយន្តបញ្ជូនមក សង្គ្រោះនៅមន្ទីរពេទ្យបង្អែកខេត្តតែម្តង។
ប៉ូលិសចរាចរនៃអធិការស្រុកសាលាក្រៅ បានបញ្ជាក់ទៀតថាករណីគ្រោះថ្នាក់ចរាចរណ៍នេះកើតឡើងដោយសារតែ អ្នកបើកបរម៉ូតូបើកបរក្នុងល្បឿនលឿនមិនប្រុងប្រយ័ត្ន ទើបបណ្តាលឲ្យជ្រុលទៅបុកគូទគោយន្តបែបនេះ។គោយន្តកន្ត្រៃនិងម៉ូតូ ត្រូវសមត្ថកិច្ចនាំយកមករក្សាទុកនៅអធិការនគរបាលស្រុកសាលាក្រៅ ដើម្បីរងចាំធ្វើការដោះស្រាយតាមផ្លូវច្បាប់ ៕ សំ គូលីន
