(ខេត្តកំពត)៖ លោកអភិបាលខេត្តកំពត បានអំពាវនាវដល់ ប្រជាពលរដ្ឋ អាជីវករ អ្នកផ្តល់សេវាទេសចរណ៍ សិស្សានុសិស្ស កងកម្លាំង មន្ត្រីរាជការ និងមន្ទីរ ស្ថាប័នរដ្ឋ និងឯកជនទាំងអស់ ត្រូវចូលរួម សម្អាតបរិស្ថាន ចេះទុកដាក់កាកសំណល់ប្រើប្រាស់ប្រចាំថ្ងៃឲ្យបានល្អ ដើម្បីរួមចំណែកធ្វើឲ្យបរិស្ថានក្រុងកំពត មានសោភ័ណភាព ល្អស្អាត អាចទាក់ទាញភ្ញៀវទេចរមកកម្សាន្តកាន់តែច្រើន ក្នុងពិធីបុណ្យសមុទ្រខាងមុខ និងប្រែក្លាយភូមិសាស្ត្រក្រុងកំពតទាំងមូលទៅជាក្រុងគំរូ។
ការថ្លែងបែបនេះ ជាប្រសាសន៍របស់លោក ជាវ តាយ អភិបាលខេត្តកំពត នៅក្នុងពិធីប្រារព្ធទិវាអនាម័យបរិស្ថានជាតិ២៣ វិច្ឆិកាឆ្នាំ ២០១៩ ក្រោមប្រធានបទ “ភូមិស្អាត សុខភាពល្អ” ស្ថិតនៅមាត់ព្រែកកំពត នាព្រឹកថ្ងៃទី២៨ ខែវិច្ឆិកា ឆ្នាំ២០១៩។
លោកអភិបាលខេត្ត បានលើកឡើងទៀតថា កំពតជាខេត្តទេសចរបែបធម្មជាតិ និងវប្បធម៌ដ៏ទាក់ទាញបំផុតមួយរបស់កម្ពុជា។ សកត្តានុពល និងធនធានធម្មជាតិសំបូរបែបរបស់ ខេត្តកំពតបានជំរុញដល់ក្រុមហ៊ុនវិនិយោគជាច្រើនចូលមកបណ្តាក់ទន់។ក្នុងនោះវិស័យទេសចរណ៍បានដើរតួយ៉ាងសំខាន់ គិតត្រឹមខែតុលាឆ្នាំ២០១៩ ភ្ញៀវទេសចរមកកម្សាន្ត សរុបប្រមាណជិត១លាន៥សែន២ម៉ឺននាក់។
លោកបានបន្តថាបុណ្យសមុទ្រលើកទី៨ ជុំទី២នៅក្រុងកំពត នឹងចាប់ពីថ្ងៃទី២០,២១, ២២ខែធ្នូ ឆ្នាំ២០១៩ ខាងមុខ ហើយរដ្ឋបាលខេត្តបាននិងកំពុងយកចិត្តទុកដាក់ខិតខំរៀបចំកែលម្អសោភ័ណភាពតាមដងផ្លូវ តាមសួនច្បារទីសារធារណៈតាមមាត់ព្រែកដើម្បីជាការទាក់ទាញចំណាប់អារម្មណ៍ពីភ្ញៀវជាតិ អន្តរជាតិមកទស្សនាលើទឹកដីខេត្តកំពតឲ្យកាន់តែច្រើនឡើងៗ។។
ដូច្នេះដើម្បីធានានូវគុណភាពបរិស្ថាន សោភ័ណភាពទីប្រជុំជន និងសុខភាពសាធារណៈល្អប្រសើរ លោក ជាវ តាយ អំពាវនាវដល់ មហាជនទូទៅ សូមចូលរួមធ្វើអនាម័យ រៀបចំសោភ័ណភាព សម្អាតតាមលំនៅស្ថាន និងចេះទុកដាក់សំរាម-សំណល់រាវ រឹង ឲ្យបានត្រឹមត្រូវ ដោយត្រូវវេចខ្ចប់ និងញែកសំរាមតាមប្រភេទដូចជា សំណល់អាចកែច្នៃបាន(អេតចាយ) សំណល់សរីរាង្គ(សំណល់ផ្ទះបាយធ្វើជាជីកំប៉ុស) សំណល់ផ្ទុកសារធាតុគ្រោះថ្នាក់ ឬអេឡិចត្រូនិច(ថ្មពិលទូរសព្ទ ទូរទស្សន៍) និងសំណល់ប្លាស្ទិកដើម្បីប្រែក្លាយសំណង់មួយចំនួនឱ្យមានតម្លៃសេដ្ឋកិច្ចនឹងកាត់បន្ថយបរិមាណសំណល់នៅទីលានសាធារណៈ គឺសំដៅធ្វើយ៉ាងឲ្យបរិស្ថានក្រុងកំពតមានសោភ័ណល្អស្អាត ក្លាយជាក្រុងគំរូ។
ដោយឡែក ប្រធានមន្ទីរបរិស្ថានខេត្ត លោក ស៊ុយ ធា បានឲ្យដឹងថា ទិវាបរិស្ថានជាតិ២៣ វិច្ឆិកា មានគោលបំណងសំខាន់ចំនួនពី ទី១ បំផុសចលនាប្រជាពលរដ្ឋ ព្រះសង្ឃ កងកម្លាំងប្រដាប់អាវុធគ្រប់លំដាប់ថ្នាក់ សិស្សនិស្សិត គ្រប់ភូមិសិក្សា ឱ្យចូលរួមធ្វើអនាម័យ កែលម្អសោភ័ណភាពទីក្រុង ទីផ្សារ និងមជ្ឈមណ្ឌលសេដ្ឋកិច្ច សំដៅរួមចំណែកកសាងកម្ពុជាល្អស្អាត និងភាពស្រស់បំព្រង។ទី២ បង្កលក្ខណៈរៀបចំបរិស្ថានឲ្យបានល្អប្រសើរសម្រាប់ពិធីបុណ្យសមុទ្រខាងមុខ។
ទាក់ទងនិងបញ្ហាអនាម័យ បរិស្ថាន និងសោភ័ណ្ឌភាពនេះដែរ យុវសិស្សនិងយុវជនកាកបាទក្រហម បានបង្ហាញអំពី ចំណាប់អារម្មណ៍ និងការយល់ឃើញរបស់ខ្លួនដែរថា ក្នុងនាមយុវជនជំនាន់ក្រោយ ចង់ឃើញក្រុងកំពតមានបរិស្ថានអនាម័យ និងសោភ័ណ្ឌភាពស្រល់ស្អាត ដូចការអំពាវនាវរបស់លោកអភិបាលខេត្តខ្លាំងណាស់ ។ យុវសិស្សរូបនោះបានស្នើរឲ្យមានការចូលរួមទាំងអស់គ្នាដើម្បីលើកកម្ពស់អនាម័យ បរិស្ថាន និងសោភ័ណក្រុង និងខេត្តកំពតទាំងមូលឱ្យកាន់តែស្រស់បំព្រង៕ សេង ណារិទ្ធ
