(ខេត្តកែប) ៖ នៅរសៀល ថ្ងៃអង្គារ ១៥រោច ខែកត្តិក ឆ្នាំកុរ ព.ស ២៥៦៣ ត្រូវនឹងថ្ងៃទី២៦ ខែវិច្ឆិកា ឆ្នាំ ២០១៩ នៅសាលប្រជុំសាលាខេត្តកែប មានបេីកកិច្ចប្រជុំសាមញ្ញលើកទី៦ អាណត្តិទី៣ របស់ក្រុមប្រឹក្សាខេត្តកែប ដែលប្រព្រឹត្ត ទៅក្រោមអធិបតីភាព លោក សំ សារីន ប្រធានក្រុមប្រឹក្សាខេត្ត និងលោក កែន សត្ថា អភិបាល នៃគណ:អភិបាលខេត្តកែប ដោយសមាសភាពនៃកិច្ចប្រជុំរួមមាន លោក លោកស្រី សមាជិក សមាជិកា ក្រុមប្រឹក្សាខេត្ត លោក លោកស្រី អភិបាលរង ខេត្ត នាយក នាយករងរដ្ឋបាលសាលាខេត្ត នាយក នាយករងទីចាត់ការជំនាញ អភិបាល ក្រុង-ស្រុក ប្រធាន អនុប្រធានមន្ទីរអង្គភាពជុំវិញខេត្ត និងមន្ត្រីពាក់ព័ន្ធមួយចំនួនទៀត។
កិច្ចប្រជុំសាមញ្ញលើកទី៦ កិច្ចប្រជុំរបស់ក្រុមប្រឹក្សាខេត្ត នេះ បានលើកនូវរបៀបវារៈចំនួន៧ ដើម្បីយកមកពិនិត្យ ពិភាក្សា និងអនុម័តគឺ៖
១-ពិនិត្យ ពិភាក្សា និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៥របស់ក្រុមប្រឹក្សាខេត្ត អាណត្តិទី៣ កាលពីថ្ងៃព្រហស្បតិ៍ ទី២៤ ខែតុលា ឆ្នាំ២០១៩ ។
២-ពិនិត្យ ពិភាក្សា និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញរបស់ក្រុមប្រឹក្សាខេត្ត អាណត្តិទី៣ កាលពីថ្ងៃសុក្រទី២៥ ខែតុលា ឆ្នាំ២០១៩។
៣-ពិនិត្យ ពិភាក្សា និងអនុម័តលើសេចក្តីព្រាងរបាយការណ៍ ស្តីពីលទ្ធផលវេទិកាផ្សព្វផ្សាយ និង ពិគ្រោះយោបល់របស់ក្រុមប្រឹក្សាខេត្ត ឆ្នាំទី១ អាណត្តិទី៣ ឆ្នាំ២០១៩ នៅថ្នាក់ក្រុង-ស្រុក។
៤-សេចក្តីព្រាងរបាយការណ៍ ស្តីពី សកម្មភាពសំខាន់ៗ ដែលបានអនុវត្តដោយគណៈអភិបាលខេត្ត ក្នុងចន្លោះកិច្ចប្រជុំក្រុមប្រឹក្សាសាមញ្ញលើកទី៥ ដល់លើកទី៦ របស់រដ្ឋបាលខេត្ត។
៥-ពិនិត្យ ពិភាក្សា និងអនុម័តលើសេចក្តីព្រាងរបាយការណ៍បូកសរុបលទ្ធផលការងារប្រចាំខែតុលា ឆ្នាំ២០១៩ និងលើកទិសដៅអនុវត្តខែបន្ទាប់ របស់រដ្ឋបាលខេត្ត។
៦-ពិនិត្យ ពិភាក្សា និងអនុម័តលើសេចក្តីព្រាងនិមិត្តសញ្ញា(ឡូហ្គូ)របស់រដ្ឋបាលខេត្ត និងទី៧-គឺបញ្ហាផ្សេងៗ៕ សេង ណារិទ្ធ
