(ខេត្តកំពត)៖ នៅព្រឹកថ្ងៃទី២៤ ខែវិច្ឆិកាឆ្នាំ ២០១៩ លោក ជាវ តាយ អភិបាលនៃគណៈអភិបាលខេត្ត និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្ត បានអញ្ជើញជាអធិបតីក្នុងពិធីប្រារព្ធទិវាអន្តរជាតិរំលឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោកលើកទី ១៤។
ពិធីនេះបានប្រព្រឹត្តទៅដោយមានការអញ្ជើញចូលរួមពីថ្នាក់ដឹកនាំក្នុងខេត្ត មន្ទីរអង្គភាពមន្ត្រីរាជការជុំវិញខេត្ត អាជ្ញាធរក្រុងស្រុកសមត្ថកិច្ចកងកម្លាំងទាំងបី សិស្សនិស្សិត និងយុវជនកាយរិទ្ធ យុវជនកាកបាទក្រហមប្រមាណជិត ៣០០នាក់។
លោកជីញ គួងប្រធានមន្ទីរសាធារណការនិងដឹកជញ្ជូនខេត្តនិងជាប្រធានលេខាធិការដ្ឋានគណៈកម្មការសុវត្ថិភាពចរាចរណ៍ផ្លូវគោកខេត្តកំពត បានធ្វើរបាយការណ៍ឲ្យដឹងថា នៅក្នុងរយៈពេល៩ ខែដើមឆ្នាំ២០១៩ នេះស្ថានភាពគ្រោះថ្នាក់ចរាចរណ៍នៅក្នុងខេត្តកំពតមានចំនួន ១៩២ ករណីក្នុងនោះស្លាប់ ៤៦ នាក់របួសធ្ងន់១៣៧នាក់ របួសស្រាល ១០៥នាក់។ករណីបង្កគ្រោះថ្នាក់មានរថយន្តខូចកម្រិតស្រាល៧៧ គ្រឿងរថយន្តខូចកំរិតធ្ងន់ ៧៣ ម៉ូតូខូចកំរិតធ្ងន់១៥៦គ្រឿង។ក្នុងនោះមិនពាក់មួកសុវត្ថិភាព ១៣១ នាក់ បើកបរហួសល្បឿនកំណត់ ២៨ករណីមិនប្រកាន់ស្ដាំ៤១ករណី មិនគោរពសិទ្ធិ ២៣ករណី ប្រជែងគ្រោះថ្នាក់៣២ ករណី ស្រវឹង៨ករណី បត់ឆ្វេងស្តាំមិនប្រយ័ត្ន២៣ករណី ខូចហ្វ្រាំង៥ករណីខូចចង្កូត៥ករណី ផ្ទុះកង់២ករណី បញ្ហាសុខភាព១២ករណី បើកថយក្រោយមិនប្រយ័ត្ន០១ករណី និងផ្សេងៗ៥ករណី។
មានប្រសាសន៍ក្នុងឱកាសនោះ លោក ជាវ តាយអភិបាលខេត្តនិងជាប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្ត បានលើកបញ្ជាក់ថា គ្រោះថ្នាក់ចរាចរណ៍ ជាបញ្ហាប្រឈមមួយក្នុងដំណើរការអភិវឌ្ឍប្រទេសជាតិនិងការកាត់បន្ថយភាពក្រីក្ររបស់ប្រជាពលរដ្ឋ ព្រមទាំងប៉ះពាល់ដល់សន្តិសុខ សណ្តាប់ធ្នាប់ សុវត្ថិភាពចរាចរណ៍ នៅលើដងផ្លូវសាធារណៈទៀតផង។ ប៉ុន្តែទោះបីយ៉ាងណាលោកអភិបាលខេត្តក៏បានបញ្ជាក់ថា ដោយយោងតាមទិន្នន័យ របស់លេខាធិការដ្ឋានគណកម្មការសុវត្ថិភាពចរាចរណ៍ផ្លូវគោកខេត្ត អាចឆ្លុះបញ្ចាំងបានថាស្ថានភាព គ្រោះថ្នាក់ចរាចរណ៍ផ្លូវគោក នៅក្នុងខេត្តកំពត ពីមួយឆ្នាំ ទៅមួយឆ្នាំគឺមានការថយចុះ។
ជាមួយនេះ លោក ជាវ តាយ អភិបាលខេត្តក៏បានចាត់ទុកទិវាដ៏មានសារៈសំខាន់នាពេលនេះ គឺជាការឆ្លុះបញ្ចាំងពីសកម្មភាពនៃការចូលរួមជាមួយ គណៈកម្មាធិការជាតិសុវត្ថិភាពចរាចរណ៍ផ្លូវគោក ក្នុងការទប់ស្កាត់និងការ កាត់បន្ថយគ្រោះថ្នាក់ចរាចរណ៍ ដែលកំពុងតែកើនទ្បើងឥតឈប់ឈរជារៀងរាល់ឆ្នាំ ហើយលោកអភិបាលខេត្តក៏បានថ្លែងអំណរគុណចំពោះអនុគណៈកម្មការសុវត្ថិភាពចរាចរណ៍ ផ្លូវគោកខេត្ត អង្គការ និងក្រុមហ៊ុនឯកជន នានាដែលបានជួយឧបត្ថម្ភ សម្ភារៈ ថវិកានិងស្មារតីកន្លងមកពិសេសក្នុងការរៀបចំកម្មវិធីនៅពេលនេះ។
លោកអភិបាលខេត្តក៏បានបន្តអំពាវនាវដល់អង្គការជាតិ អន្តរជាតិ ប្រទេស ផ្តល់ជំនួយ ក្រុមហ៊ុនឯកជនក្នុងស្រុក និងបរទេស ព្រមទាំងដៃគូរផ្សេងៗទៀត មេត្តាជួយឧបត្ថម្ភ ដល់អនុគណៈកម្មការសុវត្ថិភាពចរាចរណ៍ផ្លូវគោកខេត្តកំពត ថែមទៀតនូវថវិកា សម្ភារៈ និងបច្ចេកទេសដើម្បីផ្តល់លទ្ធភាព ក្នុងការអនុវត្តន៍ឱ្យបានដោយជោគជ័យ នូវផែនការសកម្មភាពរបស់គណៈកម្មាធិការជាតិសុវត្ថិភាពចរាចរណ៍ ផ្លូវគោក ទាំង៨ចំណុច ឲ្យទទួលបានប្រសិទ្ធភាពបំផុត៕ សេង ណារិទ្ធ
