(ខេត្តកំពត)៖ តាមប្រភពព័ត៌មានច្បាស់ការណ៍បានបង្ហើបថា មានបុគ្គលិកផ្នែកចែកបៀរដែលស្នាក់នៅក្នុងបន្ទប់កាសីុណូហាទៀងវេហ្គាសម្នាក់បានស្លាប់យ៉ាងអណោចអធ័មក្នុងបន្ទប់ ខណៈមានអគ្គិសភ័យឆាបឆេះបន្ទប់ស្នាក់អាស្រ័យនាវេលាទៀបភ្លឺ ស្ថិតក្រោយកាសីុណូហាទៀងវេហ្គាស ដែលមានទីតាំងក្នុងច្រកទ្វារព្រំដែនអន្តរជាតិព្រែកចាក ឃុំឫស្សីស្រុកខាងលិច ស្រុកកំពង់ត្រាច ខេត្តកំពត។
ប្រភពដដែលបានបញ្ជាក់ទៀតថា ករណីឆេះបន្ទប់ស្នាក់ក្នុងបរិវេណកាសីុណូហាទៀងវេហ្គាសបណ្តាលឱ្យមនុស្សស្លាប់បាត់បង់ជីវិតនេះ បានកើតឡើងនៅម៉ោងប្រមាណជិត៥ទៀបភ្លឺ ថ្ងៃទី២០ ខែវិច្ឆិកា ឆ្នាំ២០១៩ ក្នុងបន្ទប់ជាន់ទី១នៃអគារស្នាក់របស់បុគ្គលិកកាសីុណូហាទៀងវេហ្គាស។
យោងតាមប្រភពដាច់ដោយឡែកបាននិយាយថា នៅក្នុងបន្ទប់កើតហេតុខាងលើមានបុគ្គលិកកាសីុណូស្នាក់នៅចំនួន៣នាក់ ប៉ុន្តែពេលកើតមានអគ្គិសភ័យឆាបឆេះគឺបុគ្គលិក២នាក់បានរត់ចេញពីបន្ទប់ទាន់ ចំណែកជនរងគ្រោះម្នាក់ដេកលង់លក់មិនដឹងខ្លួនទើបភ្លើងឆេះបណ្តាលឱ្យស្លាប់យ៉ាងអណោចអធ័មតែម្តង។
ទាក់ទិននឹងករណីឆេះបន្ទប់ស្នាក់នៅរបស់បុគ្គលិករបស់កាសីុណូហាទៀងវេហ្គាសនេះ សមត្ថកិច្ចមូលដ្ឋានបានបញ្ជាក់ថា គឺបណ្តាលមកពីទុស្សេរខ្សែចរន្តអគ្គិសនី ដោយខណៈនោះក៏មានការអន្តរាគមន៍ពីអាជ្ញាធរ និងសមត្ថកិច្ចជួយពន្លត់យ៉ាងសស្រាក់សស្រាំផងដែរ ទើបអណ្តាតភ្លើងមិនឆេះរាលដាលទៅបន្ទប់ផ្សេងទៀត។
ជាមួយនឹងករណីឆេះបន្ទប់ស្នាក់របស់បុគ្គលិកកាសីុណូហាទៀងវេហ្គាសខាងលើ គេមិនអនុញ្ញាតឱ្យក្រុមអ្នកសារព័ត៌មានចូលទៅថតយករូបភាពនោះឡើយ ហើយសពបុគ្គលិករងគ្រោះ ត្រូវបានគេដឹកបញ្ជូនទៅចាត់ចែងធ្វើបុណ្យតាមប្រពៃណីនៅឯស្រុកកំណើត ក្នុងខេត្តតាកែវ៕ សេង ណារិទ្ធ
