(ខេត្តកែប)៖ ក្រុមប្រឹក្សាខេត្តកែប នៅព្រឹកថ្ងៃទី២០ ខែវិច្ឆិកា ឆ្នាំ២០១៩នេះ បានបើកវេទិកាផ្សព្វផ្សាយ និងគ្រោះ យោបល់ លើកទី១ អាណត្តិទី៣ ឆ្នាំ ២០១៩ នៅវត្តកំពង់ត្រឡាច ស្ថិតនៅភូមិកំពង់ត្រឡាច សង្កាត់ព្រៃធំ ក្រុងកែប ខេត្តកែប ក្រោម អធិបតី ភាព លោក សំ សារីន ប្រធាន ក្រុមប្រឹក្សាខេត្ត និង លោក ងិន ងិនដា អភិបាលរងខេត្ត តំណាងដ៏ខ្ពង់ខ្ពស់ លោក កែន សត្ថា អភិបាលនៃគណៈអភិបាលខេត្តកែប ក្នុងនោះក៏មានការចូលរួម ពីសមាជិកក្រុមប្រឹក្សាខេត្ត គណៈអភិបាល ខេត្ត សមាជិកក្រុមប្រឹក្សាក្រុង-ស្រុក គណៈអភិបាល ក្រុង-ស្រុក សមាជិកក្រុមប្រឹក្សាឃុំ-សង្កាត់ រួមនឹងតំណាង សហគមន៍ប្រជាពលរដ្ឋ និងអ្នកពាក់ព័ន្ធដទៃទៀត ផងដែរ ។
លោក សំ សារីន ប្រធានក្រុមប្រឹក្សាខេត្ត មានប្រសាសន៍សំណេះសំណាលបេីកវេទិកាផ្សព្វផ្សាយ និងពិ គ្រោះ យោបល់ របស់ក្រុមប្រឹក្សាខេត្តនេាះថា ការរៀបចំឡេីង នៅកម្មវិធីថ្ងៃនេះ គឺដើម្បី ផ្តល់ព័ត៌មាន ដល់ក្រុមប្រឹក្សាក្រុង-ស្រុក ក្រុម ប្រឹក្សា ឃុំ-សង្កាត់ សហគមន៍ប្រជាពលរដ្ឋ និងអ្នកពាក់ ព័ន្ធអំពី សកម្មភាពនានា របស់ក្រុមប្រឹក្សា និងគណៈអភិបាលខេត្ត ក្នុងការ ឆ្លើយតបទៅនឹងសំណើទាំងឡាយ របស់ក្រុមប្រឹក្សាក្រុង-ស្រុក ក្រុមប្រឹក្សាឃុំ-សង្កាត់ និង សហគមន៍ប្រជាពលរដ្ឋ ប្រមូល ពិភាក្សាអំពីសំណើ និងមតិ យោបល់ នានា សម្រាប់សកម្មភាព ឆ្នាំក្រោយៗទៀត។
លោក ក៏បានធ្វើការផ្សព្វផ្សាយ ឲ្យបងប្អូនប្រជាពលរដ្ឋ បានយល់ជ្រាប អំពីសភាពការណ៍វិវឌ្ឍន៍ថ្មីៗ តាមខ្លឹម សារ របស់រដ្ឋាភិបាលសំដៅពង្រឹងសតិ អារម្មណ៍ បងប្អូន កុំ ឲ្យលង់ជឿតាមឧបាយកល របស់ក្រុមឧទ្ទាម ក្រៅច្បាប់ ហើយ នាំគ្នា ចូលរួមគាំទ្រ ក្នុងការថែរក្សា ការពារ សុខ សន្តិភាព សណ្តាប់ធ្នាប់ និងការអភិវឌ្ឍន៍ប្រទេស ជាតិ ក្រោមការ ដឹកនាំ ដ៏ឈ្លាសវៃ របស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
ជាមួយនេះ លោក សំ សារីន បានសំណូមពរ ដល់បងប្អូន ប្រជាពលរដ្ឋ ឲ្យចូលរួម ក្នុងការអនុវត្តន៍ គោលនយោបាយ ភូមិ ឃុំ មានសុវត្ថិភាព ដោយចូលរួម ទប់ ស្កាត់ បទល្មើសគ្រឿងញៀន ល្បែងស៊ីសង គ្រប់ប្រភេទ និងបើកបរ ត្រូវគោរពច្បាប់ ចរាចរណ៍ ផងដែរ ។
ក្នុងវេទិកាព្រឹកនេះ លោក ងិន ងិនដា អភិបាលរងខេត្ត ក៏បានមានរបាយការណ៍ ៩ ខែ អំពីការអភិវឌ្ឍន៍នៅសមិទ្ធផលនានាដែលរដ្ឋបាលខេត្តសម្រេចបានជូនអង្កវេទិកា ដោយលោកក៏បានបញ្ជាក់ផងដែរថា ការបើកវេទិកាសាធារណៈនេះ ក៏ជាផ្នែក មួយ បានផ្ដល់ឱកាស ជូនប្រជា ពលរដ្ឋ បានប្រាស្រ័យទាក់ទង គ្នា ទៅវិញទៅមក ជាមួយអាជ្ញាធរ សមត្ថកិច្ច សង្គមស៊ីវិល និង វិស័យ ឯកជន បានផ្លាស់ប្ដូរ នូវបទពិសោធន៍ និងផ្ដល់យោបល់ ប្រឹក្សា អំពី អាទិភាព នៃការ អភិវឌ្ឍន៍មូលដ្ឋាន ជាពិសេស ការអនុវត្តកម្មវិធី នយោបាយ និងយុទ្ធសាស្ត្រចតុកោណដំណាក់ កាលទី៤ របស់រាជ រដ្ឋាភិបាលកម្ពុជា ប្រកបដោយចីរភាព តម្លាភាព និងប្រសិទ្ធភាព ផងដែរ។
សូមជម្រាបថា៖ អង្គវេទិកានេះ បានដំណើរការ ដោយការលើក ឡើង នូវសំណួរ និងសំណូមពរ ចំនួន ៣ ពីសំណាក់អ្នកចូលរួម ដោយ ផ្ទាល់មាត់ និងលាយលក្ខណ៍ជាអក្សរ ទៅលើ បញ្ហា មួយចំនួន ដូចជា ៖ ការតបណ្ដាញ ទឹកស្អាត អគ្គិសនី ការសាងសង់ផ្លូវ ប្រព័ន្ធលូ រំដោះទឹក របង សាលារៀន ។ ល។ ជាមួយនោះដែរ ថ្នាក់ដឹកនាំ មន្ត្រីជំនាញ និងអាជ្ញាធរពាក់ព័ន្ធ បានធ្វើការដោះ ស្រាយ និងបកស្រាយ បំភ្លឺជូនប្រជាពលរដ្ឋ ប្រកបដោយប្រសិទ្ធភាព គ្រប់ទាំង ៣ ករណី ផងដែរ៕ សេង ណារិទ្ធ
