ខេត្តឧត្តរមានជ័យ ៖ បុរសជាន់មីនស្គរ បណ្តាលអោយផ្ទុះដាច់ជើងម្ខាង ពេលនាំកូនទៅរកកាប់ឈើប្រណីតនៅក្បែរជើងភ្នំកាលពី ថ្ងៃទី ០៧ ខែធ្នូ ឆ្នាំ ២០១៤ ម៉ោងប្រមាណជា ១១ : ៣០ នាទីព្រឹក នៅចំណុចបង្គោលសីម៉ាលេខ ១១ ស្ថិតក្នុងភូមិដងទង់ សង្កាត់កូនក្រៀល ក្រុងសំរោង ខេត្តឧត្តរមានជ័យ ។
តាមការអោយដឹងពីលោក សៅ ប៊ុនថេង ហៅ រី ជាមេភូមិដងទង់ បានប្រាប់ថា បុរសរងគ្រោះមានឈ្មោះ ហ៊ា តួ អាយុ ៤៨ ឆ្នាំ បែកប្រអប់ជើងខាងស្តាំ រស់នៅភូមិកើតហេតុ ។ ចំណែកមីនប្រភេទមីនស្គរសល់ពីសម័យសង្គ្រាម ។
លោកមេភូមិបានបញ្ជាក់ថា ធ្លាប់ប្រជុំប្រាប់ដល់ប្រជាពលរដ្ឋនៅតាមតំបន់នេះជាច្រើនដងមកហើយ ដើម្បីការពារអាយុជីវិតពួកគាត់ កុំអោយចូលព្រៃរកឈើ ដោយសារគ្រាប់មីនមាននៅសល់រាយប៉ាយច្រើន កាលពីសមយ័សង្គ្រាម ហើយក្រុមកំចាត់មីនមិនទាន់ចូលមកដល់ចំណុចនេះនៅឡើយទេ ។
សូមកងកម្លាំងដែលឈរជើងនៅតាមតំបន់នេះ ជាពិសេសកងកម្លាំងឈរជើងដូចជា ទាហ៊ានសឹករងក្រុងសំរោង នគបាលវរៈព្រំដែន ៩០៥ មេត្តាជួយប្រាប់ដល់ប្រជាពលរដ្ឋខ្លះផង ពីព្រោះពលរដ្ឋខ្លះ គាត់មិនបានដឹងតំបន់មីននេះទេ ៕
