(ខេត្តកែប)៖ លោក កែន សត្ថា អភិបាល នៃគណៈអភិបាលខេត្តកែប បានលើកឡើងថា ការដំឡើងថ្លៃមុខម្ហូបអាហារ ឬសម្ភារៈផ្សេងៗក្នុងពិធីបុណ្យជាតិនានា ហាក់ដូចជាបោកឆ្នាំងចានរបស់ខ្លួន។ដូច្នេះក្រុមអាជីវករទាំងឡាយដែលប្រកបអាជីវកម្មគ្រប់ប្រភេទ ក្នុងរមណីយដ្ឋានឆ្នេរកែប គួរកុំដំឡើងថ្លៃរបស់របរក្នុងឱកាសបុណ្យភ្ជុំបិណ្ឌ ឬក្នុងព្រឹត្តិការណ៍ផ្សេងៗឲ្យសោះ។
ការលើកឡើងបែបនេះក្នុងឱកាសដែល លោកអភិបាលខេត្តកែបមានប្រសាសន៍ក្នុងទិវាពិភពលោកស្អាត ២១កញ្ញា ឆ្នាំ២០១៩ ដែលបានរៀបចំឡើងដោយមន្ទីរបរិស្ថាន និងមន្ទីរទេសចរណ៍ ខេត្តកែប កាលពីថ្ងៃទី២៦ ខែកញ្ញា ឆ្នាំ២០១៩ នៅមាត់ឆ្នេរលេងទឹកខេត្តកែប។
លោក កែន សត្ថា អភិបាលខេត្តបានសង្កត់ធ្ងន់ទៀតថា ដើម្បីធ្វើឲ្យទីក្រុងយើងស្អាត ពិសេសទីប្រជុំជនដែលកំពុងប្រឈមនឹងការកើើនឡើងនូវបរិមាណសំរាម សំណល់រាវ-រឹង និងការថយចុះគុណភាពទឹក ដី និងខ្យល់ គួរណាស់យើងត្រូវរួមគ្នាយកចិត្តទុកដាក់ ក្នុងការស្វែងរកវិធានការទប់ស្កាត់និងដោះស្រាយឲ្យបានសមស្រប និងបង្កើនការយកចិត្តទុកដាក់ក្នុងការអនុវត្តតួនាទី ភារកិច្ចរបស់ខ្លួនដោយស្មារតីទទួលខុសត្រូវ ដើម្បីស្វែងរកជម្រើសដ៏ប្រសើរក្នុងការគ្រប់គ្រងអនាម័យបរិស្ថានឲ្យមាននិរន្តរភាព ដើម្បីឲ្យស្របជាមួយនឹងការបង្កើនភាពប្រកួតប្រជែងក្នុងតំបន់ឆ្នេរសមុទ្រកម្ពុជា ដែលត្រូវបានប្រសិទ្ធនាមថា”ឆ្នេរសមុទ្រកម្ពុជា៖ តារារះនាទិសនិរតី”។
ជាមួយគ្នានេះ លោក កែន សត្ថា អភិបាលខេត្ត ក៏បានណែនាំដល់មន្ទីរអង្គភាពពាក់ព័ន្ធត្រូវតែពិនិត្យរាល់សកម្មភាពទាំងឡាយណាដែលធ្វើឲ្យប៉ះពាល់ផ្នែកបរិស្ថាន និងការផ្តល់សេវាកម្មទេសចរណ៍ជូនភ្ញៀវ ដោយត្រូវណែនាំដល់ក្រុមអាជីវករកុំឲ្យដំឡើងថ្លៃសេវាម្ហូបអាហារលើសពីគោលការណ៍ ដែលនាំឲ្យប៉ះពាល់ដល់អារម្មណ៍ភ្ញៀវទេសចរជាតិនិងអន្តរជាតិដែលមក សម្រាក លម្ហែ កម្សាន្ត នៅខេត្តទេសចរណ៍របស់យើង។
សូមជម្រាបផងដែរថា ក្នុងថ្ងៃបុណ្យភ្ជុំបិណ្ឌធំ ថ្ងៃទី២៨ ខែកញ្ញា ឆ្នាំ២០១៩ ក្នុងរមណីយដ្ឋានឆ្នេរកែប ក៏មានកើតបញ្ហាបន្តិចបន្តួចដោយសារមានការជជែកតតាំងគ្នារវាងអាជីវករម្ចាស់តូបលក់ដូរ ជាមួយភ្ញៀវទេសចរ រឿងតម្លៃសេវាថ្លៃជួលកន្លែងអង្គុយញាុំអាហារ ប៉ុន្តែករណីនេះ ត្រូវបានដោះស្រាយរួចរាល់ហើយ ខណៈមានអន្តរាគមន៍ភ្លាមៗពីលោកប្រធានមន្ទីរទេសចរណ៍ខេត្តកែប។
ទាក់ទិននឹងករណីមិនគួរកើតឡើងបែបនេះ លោក សោម ចិន្តា ប្រធានមន្ទីរទេសចរណ៍ខេត្តកែប បានប្រាប់អ្នកសារព័ត៌មាន នៅព្រឹកថ្ងៃទី០១ ខែតុលា ឆ្នាំ២០១៩នេះថា បញ្ហានេះ ជាការភាន់ច្រឡំរវាងម្ចាស់តូប និងភ្ញៀវ ពោលគឺបណ្តាលមកពីស្តាប់ហេតុផលមិនច្បាស់លាស់ ទើបមានការជជែកគ្នារឿងតម្លៃតូបអង្គុយ ប៉ុន្តែនេះជាបញ្ហាតូចតាចប៉ុណ្ណោះ ហើយភាគីទាំងសងខាងក៏បានអធ្យាស្រ័យគ្នាទៅវិញទៅមកហើយដែរ៕ សេង ណារិទ្ធ
