(ខេត្តកំពត)៖ នៅព្រឹកថ្ងៃទី១៧ ខែកញ្ញា ឆ្នាំ២០១៩ សាខាកាកបាទក្រហមកម្ពុជា ខេត្តកំពត ដឹកនាំដោយ លោកស្រី លាង ហៃ ជាវ តាយ អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជា ខេត្តកំពត ដែលមានការអញ្ជើញចូលរួមពីសំណាក់ លោក លោកស្រី សមាជិក សមាជិកា គណៈកម្មាធិការសាខា អនុសាខា យុវជនកាកបាទក្រហមកម្ពុជា និងអ្នកស្ម័គ្រចិត្ត បានចុះសួរសុខទុក្ខនាំយកអំណោយមនុស្សធម៌របស់កាកបាទក្រហមកម្ពុជា ទៅផ្តល់ជូនកុមារកំព្រារ នៅក្នុងមជ្ឈមណ្ឌលអភិវឌ្ឍក្មេងកំព្រារ មនុស្សចាស់ជរា និងជនពិការចំនួន ៨៥នាក់ ដែលមានទីតាំងស្ថិតនៅក្នុងភូមិត្រពាំងខ្យង ឃុំអង្គភ្នំតូច ស្រុកអង្គរជ័យ ខេត្តកំពត។
នាឱកាសនេះ លោកស្រី លាង ហៃ ជាវ តាយ បានពាំនាំមកនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្តេចតែងតែគិតគូរពីសុខទុក្ខរបស់បងប្អូនប្រជាពលរដ្ឋជួបការលំបាក ទីទ័លក្រ មានជំងឺ ជនងាយរងគ្រោះ ជនរងគ្រោះដោយគ្រោះមហន្តរាយផ្សេងៗ ដោយមិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ និងផ្តាំផ្ញើដល់បងប្អូនប្រជាពលរដ្ឋទាំងអស់ប្រកាន់យកនូវ អនាម័យល្អ រស់នៅស្អាត ហូបស្អាត ផឹកស្អាត ។
ចំពោះអំណោយដែលផ្តល់ជូននាពេលនេះរួមមាន៖ អង្ករ២០បាវ ស្មើរនឹង៥០០គីឡូក្រាម មី៤០កេសតូច ទឹកត្រី និងទឹកស៊ីអីវ២០យួរ ស្ករសរ២០គីឡូក្រាម នុំប័ង១០០ដើម ទឹកផ្លែឈើ២០កេស សៀវភៅ២០០ក្បាល ប៊ិច១០០ដើម និងថវិកាចំនួ ន ៥០០,០០០រៀល និងឧបត្ថម្ភជូនដល់លោកតាលោកយាយចាស់ជរា,កុមារកំព្រា, យុវជនកាកបាទក្រហម និងកងម្លាំង សរុបថវិកាចំនួន ៥៦៤.០០០រៀល ផងដែរ៕ សេង ណារិទ្ធ
