ខេត្តឧត្តរមានជ័យ ៖ នារសៀលថ្ងៃទី ៥ ខែធ្នូ ឆ្នាំ ២០១៤ សមត្តកិច្ចនគរបាលស្រុកអន្លង់វែង និងនគរបាលស្នងការដ្ឋានខេត្ត សហការគ្នាបង្ក្រាបឃាត់ខ្លួនជនសង្ស័យ កាច់សោរកម៉ូតូ និងចែកចាយគ្រឿងញៀនទាំង ១៦ នាក់ និងដកហូតបានវត្ថុតាងម៉ូតូចំនួន ២៦ គ្រឿង កសាងសំណុំរឿងបញ្ជូន ទៅតុលាការចាត់ការតាមនិតិវិធី ។
កម្លាំងសមត្ថកិច្ចបើកយុទ្ធនាការបង្ក្រាបរយៈពេល ២ ថ្ងៃក្នុងគោលដៅចំនួន ៥ កន្លែង កាលពីថ្ងៃទី ៤និង៥ ខែធ្នូ ឆ្នាំ ២០១៤ នៅស្រុកអន្លង់វែង និងស្រុកត្រពាំងប្រសាទ ខេត្តឧត្តរមានជ័យ ។
សមត្ថកិច្ចនគរបាលបានអោយដឹងថា ក្រុមជនសង្ស័យ ដែលសមត្ថកិច្ចធ្វើការបង្ក្រាបឃាត់ខ្លួនបាន មាន ចំនួន១៦នាក់ក្នុងនោះមានស្រីចំនួន៤នាក់ ប្រុស១២ នាក់ ហើយមានអ្នកកាច់សោម៉ូតូ៦នាក់អ្នករួមផ្សំគំនិត១នាក់ អ្នកទួលផលចោកម្ម ៨នាក់ អ្នកចែកចាយថ្នាំញៀន១នាក់។រកឃើញដកហូតបានម៉ូតូចំនួន ២៦ គ្រឿងដែលនៅទីតាំងបញ្ចាំម៉ូតូឥតច្បាប់ ។
មន្ត្រីនគរបាលបានបញ្ជាក់ថា មុនឈានដល់ការបង្ក្រាបចាប់ខ្លួនក្រុមជនសង្ស័យ លោកឧត្តមសេនីយ៍ត្រី ម៉ែន លី ស្នងការនគបាលខេត្តឧត្តរមានជ័យបាន រៀបចំគំរោងលើកផែនការអស់រយៈពេលមួយខែ ទើបបញ្ជាដាក់ផែនការចុះប្រតិបត្តិការ ចំនួន ៥ គោលដៅដោយមាន ៤ គោលដៅនៅស្រុកអន្លង់វែងនិង ១ គោលដៅ ទៀត នៅស្រុកត្រពាំងប្រាទ រហូតបានសម្រេច លទ្ធផលជោគជ័យជាផ្លែផ្កា ។
បច្ចុប្បន្នជន សង្ស័យទាំង១៦នាក់និងវត្ថុតាង ត្រូវបានកសាងសំណុំរឿង បញ្ជូនទៅតុលាការដើម្បីចាត់ការតាមនិតិវិធី ។
ប្រជាពលរដ្ឋសាទរកោតសសើរ ចំពោះការបង្ក្រាបរបស់សមត្ថកិច្ចឃាត់ខ្លួន ក្រុមចោរបានដល់ ១៦ នាក់ ហើយក៏ទទូចថែមទៀតដើម្បីភូមិឃុំសុវត្ថភាព សូមសមត្ថកិច្ចជួយបង្ក្រាបបិតល្បែងស៊ីសងគ្រប់ប្រភេទផងនោះ ទើបលប់បំបាត់ក្រុមចោរកម្ម ការលក់និងប្រើប្រាស់គ្រឿងញៀន មិនអោយវិលត្រឡប់មកវិញ ៕
ស៊ឹម. ខុន ឧត្តរមានជ័យ
