(ខេត្តកំពត)៖ នាយកប្រតិបត្តិសាលាអន្តរជាតិ អែស អេ អាយ (សឹង្គបុរី) បានលើកឡើងថា បច្ចុប្បន្នប្រទេសកម្ពុជាកំពុងរីកចម្រើនទៅមុខជាលំដាប់លើគ្រប់វិស័យ ពិសេសវិស័យព័ត៌មានវិទ្យា និងបច្ចេកវិទ្យាទំនើបថ្មីៗដែលបាននិងកំពុងរីកដុះដាលនៅគ្រប់ទីកន្លែងធ្វើការងារទាំងអស់។និយាយដោយឡែក ប្រព័ន្ធអប់រំ ដើម្បីប្រកួតប្រជែងដណ្តើមយកទីផ្សារបាន សម្រាប់លាសា និងសិស្សានុសិស្ស ត្រូវផ្តោតសំខាន់បំផុតទៅលើគុណភាពជាចម្បង។
ការលើកឡើងបែបនេះ នៅក្នុងពិធីប្រគល់វិញ្ញាបនបត្រជូនសិស្សានុសិស្សជ័យលាភី និងសិស្សបញ្ចប់វគ្គ នៃសាលាអន្តរជាតិ អែស អេ អាយ (សិង្ហបុរី) ដែលបានធ្វើឡើងនៅសាលសណ្ឋាគារមិត្តភាព ក្រុងកំពតនៅថ្ងៃទី១៣ ខែកញ្ញា ឆ្នាំ២០១៩ របស់នាយកប្រតិបត្តិ សាលាអន្តរជាតិ អែស អេ អាយ (សិង្ហបុរី ) (SAIS) គឺលោក ហឿង ប៊ុនលី ដោយពិធីនេះក៏មានការចូលរួមជាគណៈអធិបតីពីសំណាក់ លោក លាង រឿនសុធី អភិបាលក្រុងកំពតផងដែរ។
លោកនាយកបានបញ្ជាក់ផងដែរថា ស្ថានភាពជាក់ស្តែងរបស់សង្គមកម្ពុជានាពេលបច្ចុប្បន្ន គឺមានការរីកចម្រើនខ្លាំងណាស់ ពិសេសរាល់ការងារគ្រប់គ្រងឯកសារទិន្នយ័នទាំងអស់ របស់ក្រសួង ស្ថាប័ន អង្គភាពនានាត្រូវប្រើប្រព័ន្ធព័ត៌មានវិទ្យា ក្នុងបច្ចេកវិទ្យាទំនើប ដូច្នេះហើយការបណ្តុះបណ្តាល់ធនធានមនុស្សត្រូវពង្រឹងបន្ថែមដើម្បីឲ្យដើរទាន់សម័យកាលអភិវឌ្ឍន៍មួយនេះ។
លោកនាយកប្រតិបត្តិបានបន្តថា ដោយមើលឃើញបែបនេះ ទើបសាលារៀងរបស់លោក បានដាក់ចេញជាគោលការណ៍ដ៏តឹងរឹងដល់គ្រូបង្រៀននឹងសិស្សានុសិស្ស ក្នុងការពូនផ្តុំសមត្ថភាព គុណភាព និងឈរលើគោលការណ៍ទ្រឹស្តីផ្សាភ្ជាប់នឹងការអនុវត្តជាក់ស្តែង។ជាងនេះទៅទៀត សាលាអន្តរជាតិ អែស អេ អាយ (សឹង្ហបុរី) មានបង្រៀនចំណេះដឹងទូទៅចាប់ពី ថ្នាក់មតេយ្យ រហូតដល់ថ្នាក់ទី១២ ក្នុងនោះក៏មានបង្រៀនភាសាអង់គ្លេស ចិន ខ្មែរ ដោយគ្រូជនជាតិដើម ព្រមទាំងមានកម្មវិធីសិស្សកុំព្យូទ័រជាច្រើនទៀតផង។
លោកបានបញ្ជាក់បន្ថែមទៀតថា រយៈពេល៥ឆ្នាំក្នុងការបើកបបង្រៀនសិស្ស សាលាបានផ្តោតសំខាន់បំផុតរឿងគុណភាព គ្រូត្រូវមានឆន្ទៈបង្រៀនសិស្ស ដោយផ្ទេរអ្វីដែលខ្លួនចេះចាំទៅឲ្យសិស្ស ក្នុងក្រមសីលធម៌វិជ្ជាជីវៈ។ ចំណែកសិស្ស ត្រូវតែគោរពវិន័យសាលា នឹងឆ្លងកាត់ការប្រឡងញឹកញាប់ តាមការកំណត់របស់សាលា។ រាល់ការបញ្ចប់វគ្គនិមួយៗ សិស្សត្រូវធ្វើបទបង្ហាញជាសាធារណៈ លើប្រធានបទអ្វីមួយដែលខ្លួនបានសិក្សាស្រាវជ្រាវ ប្រកួតប្រជែងគ្នា ដើម្បីទទួលបានជ័យលាភីមេដាយមាស និងប្រាក់រង្វាន់លើកទឹកចិត្ត។ រាល់ការប្រកួតប្រជែង ការធ្វើបទបង្ហាញជាសាធារណៈ ការប្រឡងក្នុងថ្នាក់ត្រូវបានរៀបចំឡើងដោយតម្លាភាព ហើយពិន្ទុសរុបរបស់សិស្សត្រូវបូកបញ្ចូលគ្នាគ្រប់សកម្មភាពទាំងអស់ផងដែរ៕ សេង ណារិទ្ធ
