(ខេត្តកំពត)៖ ព្រឹកថ្ងៃពុធ ១៣កើត ខែភទ្របទ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១១ ខែកញ្ញា ឆ្នាំ២០១៩ រដ្ឋបាលខេត្តកំពត សហការជាមួយមន្ទីរផែនការខេត្ត បានរៀបចំវគ្គបណ្តុះបណ្តាលបច្ចេកទេសស្តីពីការរៀបចំនិងកសាងផែនការអភិវឌ្ឍន៍៥ឆ្នាំខេត្ត នៅសាលប្រជុំសាលាខេត្ត ក្រោមអធិបតីភាព លោកស្រី យូ សុគន្ធ អភិបាលរងខេត្ត តំណាងដ៏ខ្ពង់ខ្ពស់ លោក ជាវ តាយ អភិបាលនៃគណៈអភិបាលខេត្តកំពត។
អញ្ជើញចូលរួមក្នុងវគ្គបណ្តុះបណ្តាលនេះមាន លោក លោកស្រីសមាជិកក្រុមប្រឹក្សាខេត្ត លោកប្រធាន អនុប្រធានមន្ទីរ អង្គភាព ជុំវិញខេត្ត តំណាងទីចាត់ អង្គភាព ចំណុះសាលាខេត្ត ក្រុមការងារកសាងផែនការខេត្ត សរុប ៦៥នាក់។
វគ្គបណ្តុះបណ្តុះបណ្តាលនេះមានគោលបំណងឲ្យអ្នកចូលរួមទាំងអស់យល់នូវរាល់គោលការណ៍ បែបបទ និងនីតិវិធីទាំងអស់ក្នុងការរៀបចំ និងកសាងផែនការអភិវឌ្ឍន៍ខេត្ត ពិសេសធ្វើឲ្យសម្រេចបាននូវផែនការអភិវឌ្ឍន៍៥ឆ្នាំ សម្រាប់អាណត្តិទី៣ ក្រុមប្រឹក្សាខេត្ត (២០២០-២០២៤) ឆ្លើយតបនិងតម្រូវការ ជាអទិភាពរបស់ប្រជាពលរដ្ឋនៅមូលដ្ឋាន ជាមួយការចូលរួមការការពារធនធានធម្មជាតិ ដែលមានសក្តានុពលយូរអង្វែង និងការចូលរួមចំណែកសម្រេចបាននូវផែនការយុទ្ធសាស្ត្រអភិវឌ្ឍន៍ជាតិ៕ សេង ណារិទ្ធ
