(ខេត្តកំពត)÷ នៅព្រឹកថ្ងៃទី១០ ខែកញ្ញា ឆ្នាំ២០១៩ ដោយមើលឃើញពីការលំបាករបស់ប្រជាពលរដ្ឋ លោក ជាវ តាយ អភិបាល នៃគណៈអភិបាលខេត្តកំពត និងជាប្រធានគណៈកម្មការកាកបាទក្រហមកម្ពុជា សាខាខេត្តកំពត បានអញ្ជើញចែកអំណោយមនុស្សធម៌ដល់ប្រជាពលរដ្ឋងាយរងគ្រោះចំនួន ២៦១គ្រួសារ មកពីស្រុកទឹកឈូ និងក្រុងកំពត។
អញ្ជើញចូលរួមក្នុងពិធីនេះក៏មាន លោក លោកស្រី សមាជិកក្រុមប្រឹក្សាខេត្ត អភិបាលរងខេត្ត លោក លោកស្រីនាយក នាយករងរដ្ឋបាលខេត្ត ប្រធាន អនុប្រធានមន្ទីរ-អង្គភាពជុំវិញខេត្ត សមាជិកគណៈកម្មាធិការ សមាជិកសកម្ម ក្រុមប្រតិបត្តិ យុវជនកាកបាទក្រហម អ្នកស្ម័គ្រចិត្ត អាជ្ញាធរភូមិ ឃុំ សង្កាត់ និងប្រជាពលរដ្ឋងាយរងគ្រោះ សរុប ៣៩៣នាក់។
លោក ជាវ តាយ អភិបាលខេត្តកំពត បានមានប្រសាសន៍ថា៖ ពិធីចែកអំណោយជូនបងប្អូនប្រជាពលរដ្ឋនាថ្ងៃនេះ ស្តែងឲ្យឃើញអំពីការយកចិត្តទុកដាក់របស់ថ្នាក់ដឹកនាំគ្រប់លំដាប់ថ្នាក់របស់ខេត្ត ដែលបានខិតខំកៀរគថវិកា ព្រមទាំងមានការចូលរួមឧបត្ថម្ភពីសប្បុរសជន ដើម្បីជួយដោះស្រាយទុក្ខលំបាក របស់ប្រជាពលរដ្ឋ។ ក្នុងឱកាសនោះ លោកអភិបាលខេត្ត ក៏បានស្នើសុំការយោគយល់ពីបងប្អូនប្រជាពលរដ្ឋទាំងអស់ផងដែរ ដោយជំនួយកាកបាទក្រហមមានចំនួនតិចតួចមិនបានសមស្របទៅនឹងទំហំនៃការខ្វះខាតរបស់បងប្អូនឡើយ ប៉ុន្តែទោះជាយ៉ាងណាក៏អំណោយនេះអាចជួយសម្រាលទុក្ខលំបាករបស់បងប្អូនប្រជាពលរដ្ឋយើងបានមួយរយៈផងដែរ ។
ចំពោះអំណោយដែលបានចែកជូននាថ្ងៃនេះរួមមាន៖ អង្ករ ២៥គីឡូក្រាម, ឃីតចំនួន១ មាន(មុង ភួយ ក្រមា សរុង), មី ១កេស, ស្ករស ១គីឡូក្រាម, ទឹកស៊ីអ៊ីវ ១យួរ, ត្រីខ ១០កំប៉ុង,ថវិកាមួយចំនួន ដែលគិតជាថវិកា សរុប ២.៦១០.០០០រៀល។
ក្នុងនោះដែរលោក ជាវ តាយ អភិបាលខេត្តកំពត បានឧបត្ថម្ភថវិកាសរុប ១.០៤០.០០០រៀល ដល់យុវជនកាកបាទក្រហម ចំនួន១០នាក់, អ្នកស្ម័គ្រចិត្ត ចំនួន២៨នាក់, នរគបាល ចំនួន២០នាក់, កងរាជអាវុធហត្ថចំនួន៨នាក់, ប្រជាការពារចំនួន២៨នាក់, និង មេភូមិ ចំនួន១០នាក់ ដោយម្នាក់ទទួលបានថវិកា ១ម៉ឺនរៀលផងដែរ៕ សេង ណារិទ្ធ
