(ខេត្តកែប)៖ នៅព្រឹកថ្ងៃចន្ទ ១១កើត ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៩ខែកញ្ញា ឆ្នាំ២០១៩ សាខាកាកបាទក្រហមកម្ពុជាខេត្តកែប បានបើកអង្គសន្និបាតអាណត្តិទី៥(ឆ្នាំ២០១៩-២០២៥)ក្រោមគណៈអធិបតីពីលោកស្រី ពុំ ចន្ទីនី អគ្គលេខាធិការ កាកបាទក្រហមកម្ពុជា លោក កែន សត្ថា ប្រធានកិត្តិយសសាខាកាកបាទក្រហមកម្ពុជាខេត្ត លោក ឡាយ ផេង អនុប្រធានកិត្តិយសសាខាកាកបាទក្រហមកម្ពុជាខេត្តកែប និងមានការចូលរួមពីគណៈកិត្តិយសសាខា គណៈកម្មាធិការសាខាអាណត្តិទី៤ សមាជិក-សមាជិកាពេញសិទ្ធិ មន្ត្រីបច្ចេកទេសទីស្នាក់ការកណ្តាល ក្រុមប្រតិបត្តិសាខា យុវជនកាកបាទក្រហមកម្ពុជា និងអ្នកស្ម័គ្រចិត្តផងដែរ។
អង្គសន្និបាតបានប្រព្រឹត្តទៅក្នុងគោលបំណងសំខាន់គឺ ៖
១/ ពិនិត្យនិងអនុម័តរបាយការណ៍សកម្មភាពការងារ ក្នុងអាណត្តិទី៤ និងផែនការទិសដៅអាណត្តិទី៥ (២០១៩-២០២៥)
២/ ពិនិត្យនិងអនុម័តរបាយការណ៍ហិរញ្ញវត្ថុក្នុងអាណត្តិទី៤ និងផែកការទិសដៅអាណត្តិទី៥ (២០១៩-២០២៥)
៣/ បោះឆ្នោតជ្រើសរើសគណៈកម្មា ធិការសាខាអាណត្តិទី៥
៤/ ប្រកាសសេចក្ដីសម្រេចតែងតាំង ប្រធាន អនុប្រធានកិត្តិយសសាខាអាណត្តិទី៥។
ក្នុងអង្គសន្និបាតអាណត្តិទី៥នេះដែរកាកបាទក្រហមកម្ពុជា ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដោយខណៈនោះ សមាជិក សមាជិកាពេញសិទ្ធិបានបោះឆ្នោតជ្រើសរើសគណៈកម្មាធិការសាខាអាណត្តិទី៥ ដែលមានសមាសភាព១៥រូប ក្នុងនោះ លោក កែន សត្ថា ជាប្រធានកិត្តិយសសាខាកាកបាទក្រហមកម្ពុជា ខេត្តកែប អាណត្តិទី៥។
ក្នុងឱកាសនោះ លោក កែន សត្ថា ប្រធានកិត្តិយសសាខាកាកបាទក្រហមកម្ពុជាខេត្តកែប អាណតិ្តទី៥ បានប្តេជ្ញាចិត្តថា នឹងខិតខំពង្រឹងអភិបាលកិច្ចល្អ ,ពង្រឹង និងពង្រីកសមត្ថភាព គៀងគររកមូលនិធិ និងគ្រប់គ្រង មានគណនេយ្យភាព និងតម្លាភាព ,ខិតខំពង្រឹងសមត្ថភាពគ្រប់គ្រងគ្រោះហន្តរាយប្រកបដោយប្រសិទ្ធភាព ,ខិតខំពង្រឹងពង្រីក អភិវឌ្ឍកម្លាំងចលករ រួមមានយុវជននិងអ្នកស្ម័គ្រចិត្ត ឲ្យកាន់តែសកម្មថែមទៀត និងខិតខំអភិវឌ្ឍសាខា អនុសាខាឲ្យនៅជាសាខាមានដំណើរការលើគ្រប់វិស័យ។
ក្នុងអង្គសន្និបាតព្រឹកនេះ លោកស្រី ពុំ ចន្ទីនី អគ្គលេខាធិការកាកបាទក្រហមកម្ពុជា បានមានប្រសាសន៍សម្តែងការគាំទ្រយ៉ាងពេញទំហឹងចំពោះសមាជិក សមាជិកា គណៈកម្មាធិការសាខាដែលទើបជាប់ឆ្នោត និងណែនាំតម្រង់ទិសដៅការងារបន្តសម្រាប់អាណត្តិទី៥ដែលអង្គសន្និបាតបានអនុម័តក្នុងអង្គសន្និបាតរួចហើយ៕ សេង ណារិទ្ធ
