(ខេត្តកំពត)៖ នៅព្រឹក ថ្ងៃសៅរ៍ ៩កើត ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៧ ខែកញ្ញា ឆ្នាំ២០១៩ សាខាកាកបាទក្រហមកម្ពុជាខេត្តកំពត បានដំណើរការបើកអង្គសន្និបាតអាណត្តិទី៥ (ឆ្នាំ២០១៩-២០២៥) នៅសាលសន្និសីទខេត្តកំពត ក្រោមអធិបតីភាព លោកស្រី ពុំ ចន្ទីនី អគ្គលេខាធិការកាកបាទក្រហមកម្ពុជា លោកបណ្ឌិត ប៉ែន ស៉ីម៉ន អ្នកតំណាងរាស្ត្រ និងជាប្រធានគណៈកម្មការទី១០នៃរដ្ឋសភា លោក ជាវ តាយ ប្រធានកិត្តិយសសាខាកាកបាទក្រហមកម្ពុជាខេត្ត លោក ជឹង ផល្លា ប្រធានក្រុមប្រឹក្សាខេត្ត និងលោកស្រី យូ សុគន្ធ ប្រធានគណៈកម្មាធិការសាខាកាកបាទក្រហមកម្ពុជាខេត្តកំពត អាណត្តិទី៤ ។
សន្និបាតព្រឹកនេះក៏មានការចូលរួមពីសំណាក់ សមាជិក សមាជិកាពេញសិទ្ធិ មន្ត្រីបច្ចេកទេសទីស្នាក់ការកណ្តាល ក្រុមប្រតិបត្តិសាខា យុវជនកាកបាទក្រហមកម្ពុជា និងអ្នកស្ម័គ្រចិត្ត សរុបចំនួន ៣៩០នាក់។
ក្នុងឱកាសនោះ លោក ជាវ តាយ ត្រូវបានតែងតាំងជា ប្រធានគណៈកម្មាធិការសាខាកាកបាទក្រហមកម្ពុជា ខេត្តកំពត សម្រាប់អាណត្តិទី៥ និងបានធ្វើការប្តេជ្ញាចិត្តយ៉ាងមុតមាំថា ៖
១-ពង្រឹងអភិបាលកិច្ចល្អ
២-ពង្រឹង និងពង្រីកសមត្ថភាព កៀរគររកមូលនិធិ និងគ្រប់គ្រង មានគណនេយ្យភាព និងតម្លាភាព
៣-ខិតខំពង្រឹងសមត្ថភាពគ្រប់គ្រងគ្រោះមហន្តរាយប្រកបដោយប្រសិទ្ធភាព
៤-ខិតខំពង្រឹងពង្រីក អភិវឌ្ឍកម្លាំងចលករ រួមមានយុវជន និងអ្នកស្ម័គ្រចិត្តកាកបាទក្រហមកម្ពុជា ឱ្យកាន់តែសកម្មថែមទៀត
៥-ខិតខំអភិវឌ្ឍសាខា អនុសាខា ឱ្យនៅជាសាខាមានដំណើរការល្អលើគ្រប់វិស័យ។
ក្នុងឱកាសនេះដែរ លោក ជាវ តាយ ប្រធានគណៈកម្មាធិការសាខាកាកបាទក្រហមកម្ពុជា ខេត្តកំពត អាណត្តិទី៥ បានឧបត្ថម្ភ ថវិកាសរុប ៣,១៦០,០០០រៀល ដល់ អ្នកស្ម័គ្រចិត្ត កាកបាទក្រហម ចំនួន៦៦នាក់, យុវជនកាកបាទក្រហម ចំនួន៣៧នាក់ និងសិស្សនិស្សិត វិទ្យាស្ថានពហុបច្ចេកទេសតេជោសែនខេត្តកំពត ចំនួន៥៥នាក់ ដោយម្នាក់ៗទទួលបានថវិកា ២ម៉ឺនរៀល៕ សេង ណារិទ្ធ
