ប៉ៃលិន៖ នាព្រឹកថ្ងៃទី០៥ ខែកញ្ញា ឆ្នាំ២០១៩ ឯកឧត្តម ហុក សុផល អភិបាលរងខេត្ត តំណាងឯកឧត្តម ផាន់ ចាន់ធុល អភិបាលខេត្តប៉ៃលិន បានជំរុញដល់មន្ត្រី នៃមន្ទីររៀបចំដែនដី ត្រូវធ្វើការពន្លឿនការចុះបញ្ជីក្បាលដីជូនប្រជាពលរដ្ឋ និងការត្រួតពិនិត្យលើការសាងសង់សំណង់នានានៅទូទាំងខេត្តប៉ៃលិន ដើម្បីឲ្យស្របទៅតាមវិធានការរបស់រាជរដ្ឋាភិបាល និងក្រសួង ដែលបានដាក់ចេញ។
លោក សូ សុខន ប្រធានមន្ទីររៀបចំដែនដី នគរូបនីយកម្ម សំណង និងសុរិយោដីខេត្តប៉ៃលិន ព្រមទាំងអនុប្រធានមន្ទីរ និងមន្ត្រីរាជការ មន្ត្រីជាប់កិច្ចសន្យា នៃមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្ត ជាច្រើននាក់។
បើតាមរបាយការរបស់លោក សូ សុខន ប្រធានមន្ទីររៀបចំដែនដី នគរូបនីយកម្ម សំណង និងសុរិយោដីខេត្តប៉ៃលិន បានឲ្យដឹងថា៖ មន្ទីរមានមន្ត្រីធ្វើការទាំងអស់ចំនួន៥២នាក់ ស្រី០៦នាក់ ហើយចំពោះការងារ ដែលអនុវត្តកន្លងមក មានការលំបាក និងងាយស្រួល ក្នុងនោះកិច្ចការងាយស្រួលគឺមន្ត្រីយើងមានការសម្របសម្រួលជាប្រចាំ ពីក្រសួង ក៍ដូចជាថ្នាក់ដឹកនាំខេត្ត ក្នុងការអនិវត្តការងារ ការផ្តល់ទីកន្លែងសមរម្យសម្រាប់មន្ត្រីចុះបំពេញការងារតាមមូលដ្ឋាន និងមានការសហការល្អជាមួយអាជ្ញាធរមូលដ្ឋាន។ ចំណែកការងារដែលលំបាកនោះ ដូចជា មន្ត្រី របស់ក្រុមការងារចុះបញ្ជីដីធ្លីមានលក្ខណៈជាប្រព័ន្ធមួយចំនួន ជាប់រវល់បំពេញការងារនៅក្នុងក្រុមចុះបញ្ជីដីធ្លីផង និងបំពេញការងារស្នូលនៅតាមការិយាល័យផង ធ្វើឲ្យការចុះអនុវត្តការការវាស់វែងដីធ្លីមានលក្ខណៈជាប្រព័ន្ធពុំបានពេញលេញ ,ចំពោះអាជីវករ ដែលធ្វើអាជីវកម្មពុះដីឡូត៌លក់ មិនសុំច្បាប់អនុញ្ញត្តត្រឹមត្រូវ ពីអាជ្ញាធរ និងស្ថាប័នជំនាញ ហើយប្រជាពលរដ្ឋមួយចំនួន នៅមិនទាន់សុំច្បាប់អនុញ្ញត្តសាងសង់សំណង់ខ្លូននៅឡើយ។
ឯកឧត្តម ហុក សុផល អភិបាលរងខេត្ត តំណាងឯកឧត្តម ផាន់ ចាន់ធុល អភិបាលខេត្តប៉ៃលិន បានបញ្ជាក់ថា
សារៈសំខាន់ៗក្នុងការស្វែងយល់ពីលទ្ធផល ដែលសម្រេចបាន បញ្ហាប្រឈម សំណូមពរ និងដំណោះស្រាយ សម្រាប់ពង្រឹងបន្ថែមលើចំណុចខ្វះខាតកន្លងមក ដើម្បីធ្វើការអភិវឌ្ឍ និងពង្រឹងសមត្ថភាពបន្ថែមលើតួនាទី ភារកិច្ច ក្នុងគោលដៅជំរុញការគ្រប់គ្រង់ ប្រើប្រាស់ និងអភិវឌ្ឍដីធ្លី ឲ្យកាន់តែមានប្រសិទ្ធិភាព ពិសេសជំរុញការវាស់វែង ចុះបញ្ជី និងផ្តល់ប័ណ្ណកម្មសិទ្ធិដីធ្លី មានលក្ខណៈជាប្រព័ន្ធ ដោយឥតគិតថ្លៃជូនប្រជាពលរដ្ឋ ស្របតាមគោលនយោបាយ របស់រាជរដ្ឋាភិបាលកម្ពុជា។
ឯកឧត្តម មានប្រសាសន៍បន្តថា៖ ជាមួយនិងការងារ ភារកិច្ច ដែលត្រូវអនុវត្តនេះដែរ ប្រធានមន្ទីរ ត្រូវធ្វើការត្រួតពិនិត្យនូវបញ្ជីវត្តមានជាប្រចាំ ដូចភ្លៀងរលឹម តាមអនុសាសន៍ដ៍ខ្ពង់ខ្ពស់ របស់សម្តេចតេជោ ហ៊ុន សែន នាយករដ្ឋមន្ត្រី ក្នុងការអនុវត្តអភិក្រមទាំង៥ គឺ «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់» ដែលមានចែងក្នុងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល នីតិកាលទី៦ នៃរដ្ឋសភា ។
ឯកឧត្តម អភិបាលរងខេត្ត ក៍បានបញ្ជាក់ដែរថា៖ សំណង់នៅខេត្តប៉ៃលិន បានរីកដុះដាលយ៉ាងច្រើន ជាពិសេសនៅតំបន់ព្រំដែន ដូច្នោះសូមឲ្យមន្ត្រីយើង ត្រូវពង្រឹងលើការត្រួតពិនិត្យសំណងដែលមានច្បាប់ និងគ្មានច្បាប់ ជៀសវាងកើតហានីភ័យ ដោយប្រការណាមួយក្នុងខេត្តប៉ៃលិនយើង ហើយចំពោះការចុះបញ្ជីក្បាលដីមានលក្ខណៈជាប្រព័ន្ធ ក៍ត្រូវតែពន្លឿនក្នុងការអនុវត្តការងារនេះឲ្យបានឆាប់រហ័សផងដែរ៕
កាសែត កម្ពុជាអភិវឌ្ឍន៍
